NDUMBA 16 - Boy Lonana

Kore mbuɗ honira eg Moiz u Aaron

¹ Kore ma goŋ Isar, goŋ Kehatna, goŋ Levina, ganyam Datan u Abiram goŋ Eliyabma u On ma goŋ Peletna ma hu njaf Rubenna.

² Asi tum kolo yara u Moiz u suuna kay ceeresi na 250 ni suu Israelna lay, ni suu may suu ŋgolo suu ay fok suunana halaŋ, ni suu tokka cukusi ayna suu sesi tii ki cocona lay.

³ Asi mba mol kolo fok gi Moiz u Aaron dasi ana, «Tlaagira ndakami wa. Suu Israelna halaŋŋi teteɗ, Yawe ka ni dukusi halaŋ, agi tli tagi kolo kay suu vi Yawena na halaŋŋi kay mege?»

⁴ Moiz hum boy namma na ni kuluɓ vogom ga duk ndaŋgara.

⁵ Hin di Kore u suu mam suu umma ana, «Vini maɗii ni Yawe hin tak saamma kiyo, tak sa ma teteɗna kiyo, hin tak sa ma a ɦuɗ ay egem tokŋa kiyo, ni sa ma nam hin manamma, sa namma nam hin ɦuɗum ay egemu.

⁶ Lagi ko wanda na aŋ Kore u suu maŋsina, yowogi ganun magisina suu ŋgal kura aya.

⁷ Vin maɗii ni agi yowogi kura ay huwa, cukugi mbilla his jivira kayam may tuɗusi ha fok Yawe. Sa ma Yawe hin manamma ni sa ma teteɗna. Gola ndak wa na ga, goryoŋ Levina.»

⁸ Moiz hin di Kore olo ana, «Humugi haa, agi goryoŋ Levina.

⁹ Yawe Lona managi kiyo, tinigi ki zeɗ a li sunda fok suu tokka, a ɦuɗ tagi ay egem hu Ziŋ Lonara, a tak suu Israelna fok Lona hu li ma agi ka li sunda na ni ew su?

¹⁰ Nam hinigi a agi ɦuɗ tagi ay egem tok, aŋ Kore u gorseŋ suu vi Levina halaŋ, sun ndaɗta na ni ndakagi kaɗi tu su?

¹¹ Kay ndaɗta aŋ u suu maŋ suu uŋŋa halaŋ taɓagi tagi a duu u Yawe, Aaron nammi ge ba agi a duu u nam mige?»

Honira vi Datan u Abiram

¹² Moiz gi sunda ana yam gi Datan u Abiram goŋ Eliyabma aya, goryoŋ Eliyabma hoŋ dira ana, «Ami ka tuɗ haɗi.

¹³ Cuk mayra aŋ cukumi ay ki hu mbas mayra law ki mbiira u mbul yumma mba lakami ki ŋgoo bagi hu fulla tanira ndakaŋ ka tuɗi su? Cemi olo an min ana aŋ kak a mulla kamiya?

¹⁴ Aŋ tinimi ka hu mbas mayra law mbiira u mbul yummaɗi lay, aŋ ɦami li ma sene kaɗi lay, ɦami gu gugutlu kaɗi lay, aŋ gol suu warna ni ko suu dugina na su? Ami ka tuɗ uŋgi».

¹⁵ Moiz hurum ɓeŋ ki cocoo, nam di Yawe ana, «Vasi ɓivun masinaɗi, an lasi dla co ka egesi na ndeɗi, koro masi ta dew lay an vi kaɗi.»

Kaɓakŋa kay Kore u suu mamsina

¹⁶ Moiz di Kore ana, «Aŋ u suu maŋsina halaŋ, mbaagi ay vini maɗii tani fok Yawe. Aŋ may, asi may, Aaron may.

¹⁷ Gegelay ni tli ganun mamma ŋgal mbitla ay komu, cukugi mbitla his jivira ay hu may. Dukugi ni gegelay mbaa mamma ay fok Yawe, mbaa ganun ay ni 250 halaŋ, na lay aŋ may Aaron may mbaaragi magisina ay may.»

¹⁸ Asi halaŋ gegelay ni tli ganun mamma yow kura ay komu, asi cuk kura hu halaŋ halaŋ, cuk mbitla his jivira kayam hu may, mba col fun Mbutluɓ ma Tokkana ko tasi u gi Moi Aaron may.

¹⁹ Kore tok suu mamsina ay egesi halaŋ fun Mbutluɓ ma Tokkana, na ɗaŋŋi bibiŋilla vi Yawera tak taɗ ki ii suu tokkina halaŋ.

²⁰ Yawe di gi Moi Aaron ana,

²¹ «Walagi dukugi ki u suu toki suu co asina, an min casi ki hu li namma ni gaw.»

²² Asi girif kaŋga daɓ vogosi ga di ana, «Ҥii, Lona, Lo ma ɦal musukka huu tlena halaŋŋa, sa ma dewna li cora aŋ min tin co ndaɗta kay suuna na halaŋ gaw su?»

Kaɓakŋa kay Datan u Abiram

²³ Yawe di Moiz ana,

²⁴ «Di suuna asi ɦuɗ tasi ki day fun ziŋ Kore, Datan u Abiramma.»

²⁵ Moiz col ay a tuɗ eg gi Datan u Abiram, suu ŋgolo suu Israelna tuɗ ay kay cerem may.

²⁶ Nam di suu toki gana ana, «Ҥuɗugi tagi ha ki fun ziŋ suu co asina, tlasi vaasi ma kogiɗi lay, kay ana agi ka ba tagi ki kay dla coosira asi laɗtaɗi.»

²⁷ Suuna halaŋ ɦuɗ tasi ki fun ziŋ Kore, Datan u Abiramma. Datan u Abiram sel ay ki kiɗiki, mba col ki vun grekŋa u boyogosi u goryosi u gor ŋgologi masisina halaŋ.

²⁸ Moiz di ana, «Cemini agi halaŋ hin wi ki ana Yawe sunun ay a lam sun mamba ni namu, an li dla ndaɗta ni ka u min manda a hal mul kay tanɗi.

²⁹ Suu asina ca ni miɗ wa maɗ dlaɗta, miɗ ko ndal suu warna halaŋ miɗta na ni Yawe sunun ay ni ka nambi.

³⁰ Na may lini Yawe lasi dlara mbuɗ mbuɗta egesiya, lini ndaŋgara ŋgoo vunuɗ ki likisi wa u tlegeyesi halaŋ, lini asi cuk hu zulla u sesi wa ni agi wi ki ana suu asina panni Yawe.»

³¹ Vunum bay ndi ga tu may ni ndaŋgara wak ki u sesi na ŋguk.

³² Mal vunuɗ ki likisi ki u suu masisina halaŋ, suu vi Korena u tlegeyesi halaŋ lay.

³³ Asi cuk hu zulla iiri u tlegeyesi halaŋ halaŋ, ndaŋgara hoŋ ha dukka kasi ni na gaw may, sesi bulum ki duk suu Israelna wa.

³⁴ Suu Israelna humusi tii ma kasina na ni tum liŋŋa, asi di ana, «Liŋiygi kiyo, gola ndaŋgara mbuɗ vunuɗ ay kaygi likiygi ki may.»

³⁵ Kura col ay eg Yawe mba ŋgal suu 250 suu ŋgal mbitla his jivira ay kosina ki halaŋ.