MISE 2 - Boy Lonana

Suu mbuɗ tasi boyna u saɓak masinana

¹ Hahawra ka kay suu njay boy ma cona kina, suu hal dlara cora ay kaŋga kay lay masi ma buuna layna. Ŋgarpii wanni asi li dla ndaɗta kay ana saɓakŋa ni kosiya.

² Asi ŋgisiɗ senena, hin kulumu, ziginina, hin tlasi may. Asi vi malaŋ zina u ziimu, sana u bege mamba.

³ Ni kay ndaɗta Yawe di ana, gola suu ko ndaɗta nana an tinisi hahawra kasiya. Agi hin ka ndak a paɗagi delegi kiɗi, ka a tuɗ yagi kolo tliɗi lay, kay ana li namma hin li ni li ma hahawra.

⁴ Hu buu namma asi hin njaɗ boy ma cona, asi hin gi soolla yoora, dlara ki liya. Asi hin di ana, «Ami halaŋ halaŋ ki ɓeŋiya. Asi ɦal tlesuu vi suu mansinana ki maŋ suu hiŋŋa. Dla ndaɗta li ni ana me asi tlanna ki konni ge? Asi ɓorowomi sene mamina ki maŋ suu ci suuna.»

⁵ Ni kay ndaɗta ndak hin ka fi sa a ŋgaak ii li ma kak duk suu vi Yawenaɗi.

Suu ci wayra kay boy ma vi sa jok vun Lonana

⁶ «Ɓakagi boy nammaɗi, asi ɓakam su? Asi ka ndak a ɓak ko wanda naɗi, boy ma cona hin ka a ɦuɗ ki keŋ dayɗi.

⁷ Boy namma li ay ka ki di jew kala zi ma vi Yakobma? Siɓpa vi Yawera tew ki eg liiɗwa? Ni gasi voɗ mayra li dlara su? Boy manna na ni ka ni jivira maŋ sa ma ka tuɗ hu voɗta ɗegeeraɗi su?»

⁸ Suu manna kaa wanni min tasi a duu u saasi ma babalira. Agi fokogi baraw ma cuki kolo kay ndarammana kiyo, ma vi suu ay fun duuna hoŋ ay vo u heɓpana na.

⁹ Boyogi suu vi suu mansinana agi dikisi kiyo, taragelay ay ki hu zi ma ndaɗ minimma. Agi ɓaɗagi jivira an laɗ eg goryosira ki a fafaɗta.

¹⁰ Cologi kolo, tuɗugiya, ka ni li ma koɗ tara tuɗi. U cookka, ndak hal dlara ɓeŋ lina, may ɓeŋga ŋgolla hin mba kaku.

¹¹ Na ni hin fi sa ma dol u semeɗna su, a hin kaboyna ana, «Kay veŋ u sum ma yara an hin kaboyna ni kagiya.» Na ɗaŋŋi nam hin li ni a sa ma di boyna maŋ suu asina na.

Lona hin tok suu Israel suu hinna

¹² An hin tokogi kay tagiya, suu vi Yakobma halaŋ halaŋ, an hin tok suu Israel suu hinna, an hin taɓasi dew ko ndal timigii suu vi Bosrana na, ko ndal yoorina ay hu li ma tira na. Del suuna hin kal ay ki dukusiya.

¹³ Nam ɗiŋ ha kolo fokosi wa, sa ma hin a malasi voɗtana, asi mal voɗta wa, asi sel ki hu vun goŋga, asi sel ki ni huruɗu. Mul masina kal ki fokosiya, Yawe tuɗ fokosi ni namu.