MATIYE 28 - Boy Lonana

Yesu paɗ ki kolo iiriya

¹ Buu ma vi Lonna daɓ daɓmi, faɗta damassa, maɗii feɗet, Mari ta Magdalara u Mari ta hiŋga tuɗ gol us Yesu.

² Na wanni ndaŋgara gijaŋ dlak cocoo. Sa sunda huulona col ay kolo, mba lagaɗ ɦinira fun zullara kiyo, kak kaɗu.

³ Irim ko lona weleɗta na, baraw ma tamma haɓpa tel tel ko tilna na.

⁴ Suu asgaa suu juɓ ussa wi na ni, mbuɗ ndaana, tasi dlak cocoo. Asi mbuɗ kaŋga ko suu miɗina na.

⁵ Sa sunda huulona ɓak boyogina ana, «Lagi ndaaɗi. An wi ana agi hal ni Yesu ma asi ɓalam ki kolo hu gu ma garakŋana.

⁶ Nam ka tanɗi. Nam paɗ ki kolo wa, ko nam dagi jewra na. Mbaagi aya, gologi lii nam li ha gi huna.

⁷ Tuɗ di maŋ suu haɗi mamsina zak ana, Nam paɗ ay ki kolo iiri duk suu miɗina. Nam tuɗ ha fokogi hu mbassa Galilera. Agi hin tuɗ wam huwa. Ni boy ma an dagina na.»

⁸ Boyogina yow gaw, vundikisi ɓigisi ndaana, hurusi furi coco lay. Asi yow liŋŋa a tuɗ di boy namma ki maŋ suu haɗi suu vi Yesuna.

⁹ Asi cuk tasi ca ni, Yesu ŋgafasi hu voɗta gaw, dasi ana, «An gagi deɓpa.» Asi ɦuɗ tasi egemu, kawam semu, goɓ kaŋga fokom may.

¹⁰ Yesu dasi ana, «Lagi ndaaɗi. Tuɗ dagi maŋ gorsenna asi tuɗ ha Galile. Ni li ma asi hin wan huna.»

Warak suu asgaana ana asi di kiɗi

¹¹ Boyogina tuɗ tuɗ ni, suu asgaa suu gol ussa suu ɦiw hoŋ hu zi ma ŋgolna, njaɗ dlara asi waɗta maŋ muli suu li ɓivunna.

¹² Muli suu li ɓivunna tok u suu ŋgolona, vi vunusi dew ana asi warak gursura maŋ suu asgaana ŋgolo.

¹³ Hin dasi ana, «Agi ɓak ana, Ami buuri senna wanni, suu haɗi mamsina mba kulum maɗam ha ki njeŋgee.

¹⁴ Boy namma tew mulna wa ni, ami hin njaɗam kayami. Dla co ka mba kagiɗi.»

¹⁵ Suu asgaana vi gursu namma, col sesi eŋga kay dla ndaɗta gaw may. Ni kay ndaɗta boy namma njay ki duk suu Juifna, asi ka njaɗam karam tu lay.

Yesu tak tam ki ii suu haɗi mamsina

¹⁶ Suu haɗi suu doogo yam dewna tuɗ Galile kay ɦinira Yesu takasirara.

¹⁷ Asi wam na ni, goɓ kaŋga fokomu. Suu ɦiw ciwayra hurusi ana ka nambira lay.

¹⁸ Yesu ɦuɗ tam egesi, dasi ana, «Saɓakŋa huulona may, kay ndaŋgarana may, an fam ki kon halaŋ.

¹⁹ Tuɗugi ha duk njaf suu kay ndaŋgarana halaŋ, mbuɗusi ki suu mansina. Mbususi batemma u sem Buna, Goromma, Musuk Lonara may.

²⁰ Haɗasi a asi vi vun gaɗta an gaɗagirara halaŋ may. Wi kagi ana, an ka u agi gak gak ndaŋgara tuɗ daɓ ki u ndaɗta.»