MATIYE 27 - Boy Lonana

Asi tuɗ Yesu fok Pilat

¹ Maɗii feɗet ni, muli suu li ɓivunna u suu ŋgolo suu Juifna, tok tasi a gi gagara a ci Yesu kiyo.

² Asi ɗag Yesu ɗagŋi, ɦam maŋ mul ma ŋgolna Pilat.

Miɗna vi Yudas

³ Yudas ma gus Yesu ki na, wi ana asi vi Yesu a cam kira ni, nam ana nam li doy ni dla cora. Nam hoŋ gursura dok hindira eg muli suu li ɓivunna u suu ŋgolona ɦamba kay Yesura, ana,

⁴ «An li coo. Sa li va kaɗi na, an gusum ki ni kay mege?» Asi hoŋom dira ana, «Li dla ndaɗta ni aŋu. Ndolomi ka dukgi.»

⁵ Yudas njay gursura ha hu Ziŋ Lonara njay ni, tuɗ vi delem ki zewna gaw.

⁶ Muli suu li ɓivunna yow gursu ndaɗta yow ni, ɓak duk tasi ana, «Hu gaɗ mayra ni, ay ndak ka a cukuɗ duk mayra hu Ziŋ Lonaraɗi. Ni begera busuna.»

⁷ Asi vi vunusi dew, gus senena ko sa ma min doygina, a pi ŋgayagina.

⁸ Ni kay ndaɗta asi yi sene namma ana «sene ma busuna.»

⁹ Faɗ ki ni vun boy ma sa jok vun Lonna, Jeremi, damma ana, «Asi yow bege gursura dok hindi ndaɗta gaw. Ni gursura asi taɓ vunusi kam a gusumba.

¹⁰ Asi tuɗ gus senena vi sa ma min doygina u ndaɗu. Ni ko Bu Suuna di ki jewra na.»

Pilat joɓ Yesu

¹¹ Yesu fok Pilat wanni, Pilat joɓom ana, «Aŋŋi mulna vi suu Juifna su?» Yesu ana, «Aŋ di ni aŋu.»

¹² Ŋgoo dagan wanni muli suu li ɓivunna u suu ŋgolona kaam boyna kam lay ni, nam di va ka dukgi.

¹³ Pilat dam olo ana, «Dlara asi ɓakaŋga kaŋ cora wanda, aŋ humuɗ ni ana mege?»

¹⁴ Yesu dam va ka dukgi. Mulna, boy namma su ki kamu.

Asi kaɓakŋa ana ci Yesu kiyo

¹⁵ Hu buu ma Pakŋa tew tew ni, sa daŋgay ma hurusi minimma, Pilat gasina ay ki voo.

¹⁶ Hu li namma sa maa dew yam ana Barabbas hu daŋgayna. Suuna wam cocoo.

¹⁷ Pilat joɓ maŋ suu molina ana, «Gagi ki ni Barabbas ɗowba Yesu ma yam Kristuna su?»

¹⁸ Pilat ɓak na ni, kay nam wi ana asi ɦam Yesu ay ni ii gonokka ɦawaa.

¹⁹ Pilat kaki hu li ɓakŋa na ni, caamba sun sa maa ay dew, dam ana, «Lagi va eg sa nammaɗi. Doyra dan ka njeŋge u nam cowaɗi.»

²⁰ Muli suu li ɓivunna u suu ŋgolona cak vun suu molina ana, Gi Barabbas ki sini, ci Yesu kiyo.

²¹ Mul ŋgolna hoŋosi joɓpa olo ana, «Suu mba' wanna, an gagi ki ni gege?» Asi ana, «Gi Barabbas kiyo.»

²² Pilat hoŋosi dira ana, «Agi min ana Yesu ma yam ana Kristuna, an lammi na ge?» Asi tum soora halaŋ ana, «Ɓalam ki hu gu ma garakŋa. Cam kiyo.»

²³ Pilat dasi ana, «Nam li co mege?» Asi tum soora su olo ana, «Ɓalam ki eg garakŋa. Cam ki ciya.»

²⁴ Pilat wi ana nam ka ndak egesiɗi, asi tum soora tumi na ɗow ɗow ni, nam ana ɦam yona aya. Nam mbus kom ki fok suuna halaŋ, di ana, «Ndolon ka dukgi. Busu sa namma ka kanɗi.»

²⁵ Asi suu moli halaŋŋa dam ana, «Busuummi kami u goryomiya.»

²⁶ Pilat gasi Barabbas kiyo, Yesu nam poŋom poŋŋi, ɦasina a ɓalam kay gu ma garakŋa.

Suu asgaana pan Yesu

²⁷ Suu asgaana mbaa Yesu ay hu taraŋga vi mulna mbaa ni, tok ndarayasi asgaana ay egesi halaŋ.

²⁸ Asi fokom baraw mamma ki fokŋi, cukum baraw ma tlawna tamu,

²⁹ tin usi cil jumba mulla wayara, tinimba kamu, hin ɦam tokolora kom ma njufna. Asi goɓ kaŋga fokomu panam ana, «Gaŋ deɓpa, mulna vi suu Juifna.»

³⁰ Asi tofoɗom yoyona kamu, vi tokolora kay ni, waɗam yam sem bolowo u ndaɗu.

³¹ Asi panam pan pan ni, fokom baraw ma tamma kiyo, cukum mamsina egemu, tuɗum a ɓalam hu gu ma garakŋa.

Yesu ɓali kolo hu gu ma garakŋa

³² Asi cuk ay kiyo ni, fi sa ma Sirenna, yam ana Simon. Asi ɦeɓem ana nam zii garakŋa u Yesu.

³³ Asi tew hu lina yam ana Golgota, ni ana «Lii ŋgot yamba.»

³⁴ Asi ɦam sum veŋŋa tlumira u mayawna. Nam jukum jukŋi, ka min a cambi.

³⁵ Asi ɓalam ki hu gu ma garakŋa, ɓorowom baraw mamma ki kosi a ci ɓelera.

³⁶ Asi lak ca a juɓum umba.

³⁷ Asi ɓalam ɓiira ki kolo kam ana, «Ni Yesu mulna vi suu Juifna.» Ni dlara cam ki kaɗta.

³⁸ Asi ɓalam suu kulna ki kolo egem mba, maa dew kay bikim ma njufna may, hiŋŋa kay bikim ma gulna may.

³⁹ Suu jak keŋ voɗ ndaɗtana panam, kisik yasi um

⁴⁰ ana, «Aŋ sa ma ana to Ziŋ Lonara ki to ni, min ta daŋŋa hu buu ma hindina, suɗ taŋ ki may ɗaŋgi su! Aŋ li ni Goŋ Lonna ni, ɗiŋ ay ki kaŋga hu gu garakŋa.»

⁴¹ Na lay ni, muli suu li ɓivunna, u suu wi magaara gaɗta u suu ŋgolona, panam ana,

⁴² «Nam suɗ suu daŋŋa may ni, ka suɗ tam ki mambi su? Nammi Mul ma vi suu Israelna, ɗiŋ ay ki kaŋga hu gu ma garakŋa wanni, aygi hin tin huruygi kamu.

⁴³ Nam ɦal hurum maŋ Lona nam di ana, Nammi Goŋ Lonna lay ni, aygi goloygiya, Lona hin mbay suɗum ki kalage.»

⁴⁴ Suu kulna suu ɓali kolo eg Yesuna ŋgulum lay.

Miɗna vi Yesu

⁴⁵ Faali faɗta col duk wanni, lina mbuɗ ki ndufunda na gim, gak gak, faɗta leŋ ki u ndaɗta.

⁴⁶ Faɗta leŋ ki a boyogina duu barra leŋi, Yesu ɓak u delemba eŋga ana, «Eli! Eli! Lama sabaktani?» U vun masina ni ana, «Loonna, Loonna, aŋ hinin ki ni kay mege?»

⁴⁷ Suu moli gaa suu ɦiw di ana, «Gologiya, nam ka yi Elie.»

⁴⁸ Sa maa dew ndi liŋŋa, tluɓ va mbus ŋgottina ay duk sum dlayna, kalam fun ŋgayra, ɦamma ana nam soɓomu.

⁴⁹ Suu hiŋŋa ana, «Hin na ta tuwa, Elie hin mba suɗum ki kalage!»

⁵⁰ Yesu bay eŋga na haŋgak olo ni, nam seeɗ gaw.

⁵¹ Baraw ma ŋgol ma jaki hu Ziŋ Lonara haa ki duk mba', col ay kay yam day, ndi ki kaŋga mbot mbot. Ndaŋgara dlak cocoo, ɦinira wak ki duk ŋguk ŋguk.

⁵² Vun zulla mal kiyo, suu miɗ ki jew suu vi Lonna sel ki kolo iiriya.

⁵³ Asi ay hu zulla, sel ay ki kolo sel ni, ŋgoo dagan Yesu paɗ ay ki kolora wan ni, asi tuɗ Yerusalem, suuna bolowo wasiya.

⁵⁴ Mul asgaana u suu mamsina gol u Yesu, asi gola ni ndaŋgara gijaŋ dlaka, asi wi dlara lira halaŋ, asi mbuɗ ndaana, di ana, «Sa namma gasi ni Goŋ Lonna.»

⁵⁵ Boyogina bolowo lak ha ki keŋ na day, gol aya. Boyogi asina ay li sunda u Yesu hu Galile day day.

⁵⁶ Dukusi wanni, Mari ta Magdalara, u Mari su Jak u Yosef may, u su goryoŋ Zebedena may.

Asi pi maɗ Yesu

⁵⁷ Fiɗigi wanni, sa ma ɦizi ma Arimatena, yam ana Yosef, mbaya. Nam lay ni sa vi Yesuna lay.

⁵⁸ Nam tuɗ eg Pilat a joɓ kay maɗ Yesu. Pilat ana hinim nam tuɗ tlamu.

⁵⁹ Yosef tlam tani, ganam u bakta ma wilina,

⁶⁰ tuɗ gam hu zulla, nam vekeɗ duk ɦinira wili tuwa. Nam lagaɗ ɦinira ŋgolla fun zulla lagaɗ ni, gi tam gaw.

⁶¹ Mari ta Magdalara u Mari ta hiŋga, laki egem fun zulla ca.

Suu asgaana juɓ u ussa

⁶² Vin maɗii ni buu ma kosi daɓ ki a min tasi kay buu ma vi Lonna, muli suu li ɓivunna u suu Farisenna tuɗ eg Pilat,

⁶³ dam ana, «Mulna, humumi gami kay boy ma sa ma kaboyna wanna dam ay, bay nam miɗ tuna, ana, An hin paɗ ki kolo iiri hu buu ma hindina.

⁶⁴ Li na ni, di maŋ suu asgaana, asi juɓ u ussa na gak gak, buuna hindi. Li ka naɗi ni, suu haɗi mamsina hin tlam maɗam tani, hin di maŋ suuna ana, Nam paɗ ki kolo wa. Kaboy ma dagan namma hin li ni ŋgol su ma jewna.»

⁶⁵ Pilat dasi ana, «Suu asgaana wanna, tuɗugi u asiya, asi juɓ u ussa ko agi minda na.»

⁶⁶ Asi tuɗ ha, tuɗ nereɗ keŋ ɦinira kay ussa, tin suu asgaana a juɓ ussa.