MATIYE 25 - Boy Lonana

Ndal boyna kay gorɓii suu doogona

¹ «Mulla huulonara tli taɗ ni ko gorɓii suu doogona tuɗ a ŋgaf njuf cara. Pindilla kosi halaŋ.

² Suu vadl ni giniŋ may, suu vadl neey may.

³ Suu giniŋŋa yow pindil masira ha ni vo mbul ka kosiɗi.

⁴ Suu neeyna oy masira ay ki u mbulna, vo kosi may.

⁵ Njuf Cara, ka mba zakgi ni, asi lak kaŋga gijaŋ buu senna gaw.

⁶ «Duk ŋgikka, asi sawalla kolo ana, Njuf Cara ka day aya, yowogi kolo, ŋgaf u namu.

⁷ Gorɓiina dliɗ kolo dliɗ ni, gijaŋ min pindilla kosiya.

⁸ Suu giniŋŋa cen ndarayasina ana, Ҥami ay mbul nde. Pindil mamira mbul ka huruɗɗi.

⁹ Suu neeyna ana, Ami ɦagina ki wa ni, nam ka ndakaygiɗi. Tuɗ gusugi ay u sukŋa kay tagiya.

¹⁰ Suu giniŋŋa tuɗ tuɗ ni, njuf cara varak ka balamasi gaw. Gorɓii suu neeyna cuk vo um ca ni, nam dug vunna gaw.

¹¹ Kak na njokŋi, suu giniŋŋa mba gaw, yam ana, Mulna, Mulna, malami haa.

¹² Nam hoŋosi dira ana, A gasira, an ka wagiɗi.»

¹³ Yesu gi mamma fun ɗaŋi ana, «Lakagi jek jekee. Buu ma an mba huna, u lerra lay agi ka wasiɗi.»

Ndal boyna kay suu li sunda fok mulna hindina

¹⁴ «Ni ko sana a tuɗ koyra na, nam yi suu mamsina egemu, ɦasi tlegeyem ka ana asi li sunda u asiya.

¹⁵ Nam yi ma jewna, ɦam bege vadl. Hin yi ma mbana, ɦam bege mba' may. Ma daganna ɦam dew. Gegelay ni, li ka u eŋ mamba. Nam tuɗ gaw.

¹⁶ Sa bege mamma vadlna li sunda u mamma, fi ka u vadl olo.

¹⁷ Ma bege mamma mbana, fi ka u mba' may.

¹⁸ Ma bege mamma dewna, vek zulla, tossom ki kaŋgaa.

¹⁹ «Mul masina li ay gak gak, hin mba voo, joɓosi kay bege mamma.

²⁰ Ma bege mamma vadlna ɦuɗ tam eg mulna, dam ana, Mulna, aŋ ɦan begena ka vadl. Ma vadl wanna, ni ma an fam ka ŋgoroŋ daganna.

²¹ Mulna dam ana, Ni jiviya, sa li sunda jivina. Aŋ li sunda jivi u tlesuu gorina ni, an tiniŋ a mulna kay tlesuu ŋgolona may. Mbay li furira u anu.

²² Ma bege mamma mbana ɦuɗ tam eg mulna, dam ana, Mulna, aŋ ɦan begena ka mba'. Ma mba' wanna, ni ma an fam ka ŋgoroŋ daganna.

²³ Mulna dam ana, Ni jiviya, sa li sunda jivina. Aŋ li sunda jivi u tlesuu gorina ni, an tiniŋ a mulna kay tlesuu ŋgolona may. Mbay li furira u anu.

²⁴ Ma bege mamma dewna ɦuɗ tam eg mulna, dam ana, Mulna, an wi ana aŋŋi sa irin eŋŋa. Aŋ feɗ wana hu li ma aŋ zaa wa ka huɗi na lay. Huruŋ godlomba kay tlesuu vi suunana lay ni,

²⁵ an li ndaana ka koŋu, an ŋgayaŋ bege maŋŋa ka kaŋgaa. Gola, ni bege maŋŋa.

²⁶ Mulna hoŋom dira ana, Sa zolomba, ma li sunda cona. Aŋ wi ana anni sa feɗ wana hu li ma an zaa wa ka huɗi na ni saɓage? Aŋ wi ana hurun godlomba kay tlesuu vi suunana lay ni arage?

²⁷ Aŋ wi na ni, ɦan bege manna maŋ sa daŋ, li sun u mambi a mege? An hoŋ ay gin na ni, mba fam u mboom umbi su?

²⁸ Vagi bege ma kom dew namma kiyo, ɦam ha ki maŋ sa mamma li kom vadlna.

²⁹ Ni kay ndaɗta sa vaamma kom ŋgolna, hin ɦam ha kayam olo. Sa va ka kombi na, li kom ew lay ni, hin vamma ki kom lay.

³⁰ Sa sunda ma ka li vaɗi namma, vagina, gam ha ki bunsu duk ndufunda. Hu li namma nam hin tiira, muɗ siim may.»

Ka ii ɓak ma daɓ daganna

³¹ «Mayra Goŋ Sanna hin mbay kay mul mambara wanni, suu sunda huulona umu, nam kak kaŋga kay dlam mamba mulla ta bibiŋilla.

³² Njaf suu kay ndaŋgarana halaŋ hin tok fokomu. Nam hin ɓorow ii suuna ki ko sa taa yoona ɓorow ii timigiina ki u ɦuguninara na.

³³ Nam hin cuk timigiina kay bikim ma njufna, ɦugunina kay bikim na gulna may.

³⁴ Hu li namma mulna mba di suu kay bikim ma njufna ana, Mbaagi ay tani, agi suu Bun minigina, paɗ vunum ay ki kagina. Kalagi hu Mulla Bun minigira ay fok jew duliyara bay tin tuwa.

³⁵ An mayra canu, agi ɦan fu tira. Laara can lay ni, agi ɦan yo cira lay. An ay koyra ni, agi van varagi jiviya.

³⁶ An ay gandala ni, agi ɦan baraw ma cukka lay. Tan tanu ni, agi golon un jivi lay. An ay daŋgayna, agi heelen ay lay.»

³⁷ Suu ɗegee asina hoŋom dira ana, «Bu Suuna, ami waŋ ana mayra caŋu, ɦaŋ fu tira ni saɓage? Ami waŋ ana laara caŋu, ɦaŋ yo cira ni arage?

³⁸ Aŋ ay varami koyra, ami vaŋ jivi ni saɓage? Aŋ ay gandala, ami ɦaŋ baraw ma cukka ni arage?

³⁹ Taŋ taŋu, ami goloŋ ay ni saɓage? Aŋ ay daŋgayna, ami heeleŋ ay ni saɓage?»

⁴⁰ Mulna hoŋosi dira ana, «An dagi ni u voɗoɗu, jivira agi laɗ eg sa maa dew duk gorsen suu hahawra, ni agi landa ay ni man anu.»

⁴¹ «Dagan ni Mulna pereɗ irim eg suu bikim ŋgulna, dasi ana, Ҥuɗugi ha ki egen day. Lona gagi vunna wa. Tuɗugi duk kura ka miɗ kiɗira, ta miniɗ maŋ Satanna u suu mamsinara.

⁴² An mayra canu ni, agi ɦan fu tira kaɗi. Laara can lay ni, agi ɦan yo cira kaɗi lay.

⁴³ An ay koyra ni, agi van ka varagiɗi. An ay gandala ni, agi ɦan baraw ma cukka kaɗi lay. Tan tanu ni, agi golon kaɗi. An ay daŋgayna, agi heelen kaɗi lay.

⁴⁴ Asi hoŋom dira ana, Bu Suuna, ami waŋ ana mayra caŋu, laara caŋu, aŋ ay koyra varamiya, aŋ ki gandala, taŋ taŋu, aŋ ay daŋgayna. Ami waŋ na ni, njunuŋ kaɗi ni saɓage?

⁴⁵ Nam hin hoŋosi dira ana, An dagi ni u voɗoɗu, jivira agi laɗ ka maŋ sa maa dew duk suu hahawraɗira, agi landa kaɗi ni man an na may.

⁴⁶ Suu asina hin tuɗ duk kura ka daɓ kiɗira. Suu ɗegeena hin fi iirira ka daɓ kiɗira may.»