MATIYE 24 - Boy Lonana

Yesu ana Ziŋ Lonara hin to kiyo

¹ Yesu kal ay ki hu Ziŋ Lonara, gi tam tuɗta. Suu haɗi mamsina ɦuɗ tasi egemu a njaɗam kay Ziŋ Lonara.

² Yesu dasi ɗaŋi ana, «Agi gologi zira wanda gige! An dagi ni gasi, ndaɗ hin to ki ni ɦawaa, ɦini taa dew hin ka a li jaki kolo kay ndaraɗɗi.»

Duliyara a daɓ kira ni, hahawra hin mbay kay suuna ki fok jewe

³ Yesu kaki kay ɦinira Conora. Suu haɗi mamsina ɦuɗ tasi ay egem asi doy hol, joɓom ana, «Dami ay gi dla ndaɗta hin mba ni saɓage? Va ma hin takami ki kay mbaaŋga, u duliyara a daɓ kira ni mege?»

⁴ Yesu hoŋosi dira ana, «Li tagi jiviya. Hin sa a ganagi yagiɗi.

⁵ Suuna hin mba u sen bolow cocoo di ana an ni Sa Lona Fuurumma, asi hin ganyam suuna ki cocoo.

⁶ Falira agi li ka hum dla duuna zeɗ zeɗ ni, lagi ndaaɗi. Dla ndaɗta hin mbaa. Ni ka daɓ nduŋgaɗi tuwa.

⁷ Njaf suu dewna hin tuɗ duu u suu hiŋŋa may, mulna tuɗ duu u mul hiŋŋa may. Bakdarra ŋgolla ndiya, ndaŋgara hin gijaŋ geŋeɗta may.

⁸ Dla ndaɗta li ni ko cara wihawra a gijaŋ vuɗtara na.

⁹ «Suuna hin vagi lasagiya, cagi maɗna may. Suuna halaŋ hin noyogi ki kay senu.

¹⁰ Hu li namma suuna bolowo hin hoŋ ki dagani, ka tin hurusi kanɗi. Suuna hin kal kay tasi cocoo, tin gonokka duk tasi lay.

¹¹ Suu kaboyna ana asi ni suu jok vun Lonna, hin zul ki cocoo, viɗ suuna ki coco may.

¹² Cora hin zul ki cocoo, minda hin ka li hu suuna ŋgol oloɗi.

¹³ Sa ma tin hurum kanna din din na, hin suɗ kiyo.

¹⁴ Boy ma Ayra kay Mulla hin njaɗ ki kay ndaŋgara halaŋ. Suuna njay ki duk njaf suuna wa halaŋ a di boy namma kira, ni daɓ nduŋga.»

Hahawra ŋgolla bay sa waɗ tura

¹⁵ «Hahawra ŋgolla ka gin a mba kay sa ɗira, agi hin waɗu. Ni ko sa jok vun Lonna Danyel di ki fok jewra na. Sa ma ndum boy namma humum ki jiviya.

¹⁶ Hu buu namma suu Yudena hin njay liŋŋa kay ɦinira.

¹⁷ Sa ma fam kaki fun ziimma, ka kal kalafi a yow va kombi.

¹⁸ Sa ma fam ha ki hu senena, ka hoŋ voo a yow baraw mamma kombi lay.

¹⁹ Boyogi suu wiina u suu goora kosi fun ponana, hu buu namma asi mbuɗ ki hahawra na holiyok.

²⁰ Joɓogi maŋ Lona a buu namma ndi hu li semeɗnaɗi, hu buu ma vi Lonnaɗi lay.

²¹ Hu buu namma suuna hin wi hawra, hahaw ndaɗta bay li hu duliyara dew tuwa. Hin ha fok lay ni, hahaw ndaɗta ka li na oloɗi lay.

²² Lini buu namma ŋga tam ay gedeŋ ginɗi ni, sa ndak hin iiriɗi. Nam hoŋ buu namma ki daganni, kay suu nam ŋgaɓasi ki mamma.

²³ «Lini sa dagi ana, Sa Lona Fuurumma ka tani. Kiɗow ni. Caa yagi kay boy nammaɗi.

²⁴ Suu ɦiw hin mba di ana, Anni Sa Lona Fuurumma. Anni sa jok vun Lonna. Ni kaboyna. Asi li dlara mbuɗta u takka ni ana lini asi fi voɗta ni, asi viɗ ii suu Lona manasi kina usiya.

²⁵ Humugi jiviya. An neegi ki fok jewe.

²⁶ «Asi li dagi ana, Nam ka bagiya, ni, tuɗugiɗi. Ka ŋgay tani, ni, vagi boy nammaɗi lay.

²⁷ Weleɗta col ay u maɗiina wa, ndi ki u fiɗigina wa ni, ni Goŋ Sanna mba ni na may.

²⁸ Li ma ɦaana gi huna, kokolora lakŋi hu may.»

Goŋ Sanna hin hoŋ aya

²⁹ «Ŋgoo wihaw ndaɗta dagan ni, faɗta hin mbuɗ ki ndufunu, tilna ka wi haɓ oloɗi, ciciwra hin yak ki kaŋgaa, saɓakŋa vi tlesuu huulonna hin geŋeɗa.

³⁰ Hu li namma va tak ki kay Goŋ Sanna hin wi ki kolo huulona. Suu kay ndaŋgarana halaŋ hin yoo tasiya. Na ɗaŋi, asi hin wi Goŋ Sanna mbay duk ɗugulla u saɓakŋa kom halaŋ, u bibiŋil mamba may.

³¹ Nam hin sun suu mam suu sunda huulona ay u tokolomma kosiya. Asi hin mba tok suu Lona manasina ki eg tasiya, kay yam mbassa halaŋ ay fun ndaŋgara dodora, u maɗiina, u fiɗigina, mbayaw lay, dali lay.»

Haɗta kay tulumma

³² «Gologi u ɗuf tlena gege! Tulumma gijaŋ ɗuffa wa ni, agi wi ana ndolla hin tok.

³³ Agi wi wa ana tle asina ka li na ni, agi wi kagi ana dla ndaɗta hin tok, ka doŋ kaana.

³⁴ Gasi, an dagi ni u voɗoɗu, njaf namma ka daɓ ki miɗna bay wi dla ndaɗta u irigiɗi.

³⁵ Huulona u ndaŋgara hin daɓ kiyo, boy manna ka daɓ kiɗi.»

Lona wi buu ma namma ni nam dew daŋ

³⁶ «Buu ma dla ndaɗta li huna, sa ka wambi. Suu sunda huulona ka wambi lay. Goŋ Lonna ka wambi lay. Lona Buna wammi nam dew daŋ.

³⁷ Dla mayra li u Nowara hin li hu buu ma vi Goŋ Sanna ni na may.

³⁸ Ay fok jew mbona bay tli tu ni, suuna ti funa, ci yona may, ɗum boyogina usi may, ɦal goryosi a ɗumba may. Gak gak, tew buu ma Nowa ɗuŋ hu lumbana.

³⁹ Asi ka wi dla ndaɗtaɗi lay ni, mbona kafasi ay kasi, yowosi ni na gaw. Goŋ Sanna a mbayra ni, li ni na may.

⁴⁰ Goŋ Sanna a mbara ni, suuna li hu senena mba' ni, maa dew suɗ ki may, ma hiŋŋa hin ki may.

⁴¹ Boyogina li a luɗna mba' ni, taa dew suɗ ki may, hiŋga hin ki may.

⁴² Lakagi jek jekee, agi ka wi buu ma Bu Suuna mba hunaɗi.

⁴³ Humugi boy namma ki jiviya. Lini sana wi ana sa a mba kulum njeŋgee ni, nam ka buu senɗi. Nam ka hinim a coom ɦolotta kambi.

⁴⁴ Minigi tagi jiviya, Goŋ Sanna hin mba ni hu faɗta agi ka saa kambira.»

Sa li sun mamba jivina u ma ka li sun mamba jiviɗina

⁴⁵ «Sa ma neey ma li sunda jivina ni gege? Ni sa malamma ɦam sunda kom halaŋŋa, nam ɓorow tlena maŋ ndarayamma ni nam lay.

⁴⁶ Furira kay sa namma, ma malamma tuɗ lina, hoŋ ay voo, fam u sun mamba komma.

⁴⁷ An dagi ni gasi, sa namma malamma tinim a gol tlesuu vona halaŋ.

⁴⁸ Lini sa li sunda cona ni, nam saa hurum kurufu ana, Malanna ka a mba vo zakgi.

⁴⁹ Nam gijaŋ poŋ ndarayam suu hu sundana, nam tuɗ u suu ci summa cocona, ti funa u asi lay.

⁵⁰ Na daŋŋi malamma mba kafammi hu buu ma nam ka a wambina, hu lerra nam saa kaɗɗira.

⁵¹ Nam vamu, gam daŋgayna, dikim ha ki duk suu mbambana. Hu li namma nam tiira, muɗ siim may.»