MATIYE 23 - Boy Lonana

Yesu ne suuna ki eg suu wi magaara u suu Farisenna

¹ Na ɗaŋi Yesu ɓak maŋ suu haɗi mamsina u suu moli egemma

² ana, «Suu wi magaara gaɗta u suu Farisenna varak balam Moizza dam u boy mamma ki ni asiya.

³ Agi vasi vunusiya, hum u boy ma asi damma. Lagi ko asi lira naɗi, kayme asi ka li dlara asi daɗtaɗi.

⁴ Asi tli tlesuu nekka kay suuna, ka ŋgen kosi a tli nek ndaɗta kasiɗi.

⁵ Tlesuu asi lasi halaŋŋa ni ana suuna wasiya. Ni kay ndaɗta asi ɓii magaara gaɗta ɓii ni, njunuɗ kosiya. Asi ɗee tlesuu magaara gaɗta ɓiiri huna vun barawi masisina ŋgol lay.

⁶ Suuna mol wa ni, asi kak ki hu lii jivina foko. Hu Zira Tokka, asi kakŋi kay gu ma fokŋa.

⁷ Suuna mol wa ni, asi min ana gasi deɓpa ko mulina na, yasi ana, Malayaŋ haɗta na lay.

⁸ Agi may ni, sa yagi ana malayaŋ haɗtana na koɗi. Mala Haɗta ni dew daŋ. Agi halaŋŋi gorse tagiya.

⁹ Kay ndaŋgara ni, agi yi sa ana, Bugiya, naɗi. Lona ni Bugi dew.

¹⁰ Yagi sa ana sa ŋgolna naɗi, Sa Lona Fuurumma a sa ŋgolna ni nam dew daŋ.

¹¹ Sa a ŋgolla dukugina ni sa sunugina.

¹² Sa col tam kolona hin hoŋ ki kaŋgaa, ma kaŋgana hin mbuɗ ki koloo.

Yesu kaɓakŋa kay suu wi magaara gaɗta u suu Farisenna

¹³ «Hahawra ka kagiya agi suu wi magaara gaɗta u suu Farisenna, agi ni suu mbambana, agi dug vun ziŋ Mulla Huulonara ki ii suuna. Agi tagira ka kal huɗi lay. Suu cuk huna agi ka hinisiɗi lay. [

¹⁴ Hahawra ka kagiya agi suu wi magaara gaɗta u suu Farisenna, agi ni suu mbambana. Agi yow tlesuu ko boyogi suu donona ki lay, cenegi cenda fiyekka ana agi ni suu jivina, agi hin fi daŋgay ma ŋgolna ni kay ndaɗta.]

¹⁵ Hahawra ka kagiya agi suu wi magaara gaɗta u suu Farisenna, agi ni suu mbambana. Agi tuɗ lina ɗuŋ lumma a hal suuna asi vi ki ugiya, asi mbay ugi wa ɗaŋŋi agi ɓeŋesi ki su mayra fok jewra, a baasi ki duk kura su tagira.

¹⁶ Hahawra ka kagiya agi suu dugina, suu hal a taɗ suuna hu voɗta. Gola agi di ana sa ma suu tam u Ziŋ Lonara, boy namma ki ni ɦawaa. Sa ma suu tam u lorra hu Ziŋ Lonara hin boy nammaɗi.

¹⁷ Agi suu giniŋŋa, suu dugina, va ma ŋgolna ni mege? Ziŋ Lonara ɗowba lorra su? Ziŋ Lonara mbuɗ lorra ki teteɗ ni ndaɗ ɗow.

¹⁸ Agi di olo ana, Sana suu tam u givin ma togolla wani, ki ni ɦawaa. Nam suu tam u tlesuu ɓivunna wani, ni suura gasira.

¹⁹ Suu dugi agina, va a ŋgolna ni mege? Givin ma togolla ɗowba tlesuu ɓivunna su? Givin ma togolla mbuɗ tlesuu ɓivunna ki teteɗ ni nam ɗow.

²⁰ Sa suu u givin ma togolla na, suu ni u tlesuu huna halaŋ gawɗi su?

²¹ Sa suu u Ziŋ Lonara, suu ni u Lona, kay nam kaki huwa.

²² Sa suu u huulona, suu ni u Lona gaw, kayme nam kaki huwa.

²³ «Hahawra kagiya, agi suu wi magaara gaɗta u suu Farisenna, agi ni suu mbambana. Tlesuu ko derekka nana agi ɦasi yasi maŋ Lona. Doy ni agi hinigi gaɗta ŋgolora vi Lonara ki kaŋgaa. Gaɗ ndaɗta ni ana tuɗ u ɗegeera may, wi hahaw suuna may, tin huruŋ kay Lona may. Kay ndaɗta wanni, aŋ li hum u gaɗta gorira ni, hin ta ŋgolora ki bay liɗi.

²⁴ Agi suu dugi suu taɗ suuna hu voɗta, agi soorogi sum magina ki ana furut kal dukgi ni, hin ligigi jamballa ni nanage?

²⁵ «Hahawra ka kagiya, agi suu wi magaara gaɗta u suu Farisenna, agi ni suu mbambana. Agi mbus ŋgoo ŋgotta kiyo, oyoɗ huruɗ u tlesuu kulna u tlesuu mornonda may.

²⁶ Aŋ Farisen ma dugina, mbus hu ŋgotta ki tuwa, ŋgoroɗ hin mbuɗ ki jiviya.

²⁷ «Hahawra kagiya, agi suu wi magaara gaɗta u suu Farisenna, agi ni suu mbambana. Agi tli tagi ni ko ussa yaɗ mini jivira, huruɗ kurufu cimira u sok suu miɗinara na.

²⁸ Agi ni na may, ii suuna agi jiviya, hurugi oyra u mbambara u dla cora lay.»

Yesu ɓak kay ka ii ɓak ma cona

²⁹ «Hahawra kagiya, agi suu wi magaara gaɗta u suu Farisenna, agi ni suu mbambana. Suu jok vun Lona, agi minisi ususi jiviya. Suu ɗegeena agi ndolosi ususi jivi lay.

³⁰ Agi ana, Agi li ay gin u somoyogi suu jewna ni, ka ci suu jok vun Lonna kiɗi.

³¹ Agi tagira wi ki ana agi ni goryoŋ suu ci suu jok vun Lonna kina.

³² Li na ɗaŋi, faɗagi vun ko somoyogi suu jewna kiyo.

³³ Agi njaf ma co ko guy magira na na, agi hin puruɗ tagi ki ko ɓak ma hin cukugi duk kura na ni nanage?

³⁴ Agi hum haa! An hin sunugi suu jok vun Lonna u suu wi yal boyna u suu wi magaara aya. Agi hin ci suu ki ɦiw, hin ɓal suu taa ki ɦiw hu gu ma garakgina may, suu daŋŋa agi hin poŋosi hu Zira Tokka may, agi hin cuɗusi usi ɦoŋzina halaŋ may.

³⁵ Ni kay ndaɗta suu ɗegee suu asi casi ki na, busuusi hin hin ni kagiya. Busu Abel ma ɗegeena u busu suu hiŋŋa halaŋ, gak gak, tew busu Zakari, goŋ Barasina, ma agi cam ki hu Ziŋ Lonara bay nam tew givin ma togolla tuna, busuusi namma halaŋŋi hin ni kagiya.

³⁶ An dagi ni u voɗoɗu, busu namma halaŋ hin ni kay njaf namma.»

Yesu di boyna kay Yerusalem

³⁷ «Yerusalem, Yerusalem, agi ci suu jok vun Lonna kiyo, suu Lona sunusi ayna, agi casi ki u gogoyra lay. An min a tokoŋ suu huruŋŋa egenu ko tlekka tok goryoɗ u garaŋaɗ nara yan gage? Aŋu, aŋ min kaɗi lay.

³⁸ Li na ni, ziigi hin hin ki ni ɦawaa.

³⁹ Gasagi an dagiya, agi hin ka wan ŋgoo dagan oloɗi, gak gak agi mbuɗ di ana, Ko Lona paɗ vunum ki kay sa ma col ay u sem Bu Suunana.»