MATIYE 22 - Boy Lonana

Ndal boyna kay ti fu genewna

¹ Yesu tin ndal boyna maŋ suuna olo ana,

² «Mulla huulonara tli taɗ ni ko me na ge? Ni ko mul ma ŋgolna a ti fu genewna kay caŋ goromba na.

³ Nam sun suu mamsina ana asi tuɗ yi suu nam minisina ay kay funa. Asi ka min mbaɗi.

⁴ Nam cuk suu mam suu daŋŋa olo, dasi ana, tuɗ dasi ana, tlena min ki wa. Mbutlina ki gaɗiya, ɦugunina ki ci lay, funa yi ki wa. Mbay tagi funa.

⁵ Suu nam yasina caa yasi kaɗi, tin irisi hu sun masira, ma tuɗ hu sene mamma may, hiŋŋa li paara may.

⁶ Suu hiŋŋa yow suu vun sunda, lasasi cocoo, casi ki lay.

⁷ Mulna hurum ɓeŋ ki cocoo, nam cuk asgaa mamsina, ana tuɗ casi ki may, ŋgalasi ziisi ki lay.

⁸ Nam di suu vun sunda ana, Funa vam ki yi lay ni, suu an yasina ka ndak kam oloɗi.

⁹ Tuɗugi hu garak voɗta, suu agi fasina halaŋŋi, yasi ay kay funa.

¹⁰ Suu di vun sunda tuɗ tuɗ ni, yi suu asi fasi ayna halaŋ, suu cona duk may, suu jivina may. Ni huu taraŋ mamba oy ki u suuna halaŋ.

¹¹ «Mulna kal ay ki hu taraŋga a gol suu nam yasina wanni, kaf sa hiŋŋa ay duku ni, baraw ma luuna ka tambi.

¹² Nam dam ana, Banna, aŋ kal ay tani bay baraw ma luuna taŋŋi nanage? Nam sana dam va kaɗi.

¹³ Mulna di suu sun mamba ana, Ɗagam kom ki u semu, taɗam, gam ha ki hu li ndufunna. Hu li namma nam hin tiira, muɗ siim may.»

¹⁴ Yesu di kay boy namma ana, «Suuna ay yi ŋgolo, suu ŋgaɓi dukusina ew daŋ.»

Warak taara maŋ Mulna

¹⁵ Suu Farisenna ŋga vunusi a du del Yesu u boyna.

¹⁶ Asi cuk suu masina u suu vi Herodna ɦiw a di Yesu ana, «Mala Haɗta, ami wi ana aŋ di ni gasira, aŋ haɗ ni dlara ɗegeera a li jivira ko Lona minda na. Aŋ ka li ndaa ko boy ma vi saɗi. Lini sa ma megelay ni, aŋ dam lay.

¹⁷ Aŋ dami ay gege. U gaɗ maygira ni, ɦal taara maŋ Sesar ɗowba ɦalɗi su?»

¹⁸ Yesu wasi hurusi ma co namma na ni, dasi ana, «Suu hurugi mbambara agina, agi hal a duun delen u boyna ni nanage?

¹⁹ Takan ki gursu ma warak taara u namma ay gige?» Asi takamma.

²⁰ Yesu joɓosi ana, «Hu ni yam gege? Ɓiiri hu ni sem gege?»

²¹ Asi hoŋom dira ana, «Ni Sesar.» Yesu dasi ana, «Vaŋ Sesarna ɦam maŋ Sesar, vaŋ Lonna aŋ ɦam maŋ Lona may.»

²² Asi hum Yesu hoŋosi dira na ni, boy namma su ki kasiya. Asi hinim tani, cuk tasi gaw.

Joɓpa kay paɗta kolora vi suu miɗina

²³ Hu buu ma dew namma suu Sadusenna mbay eg Yesu. Asi ni suu di ana suu miɗina ka paɗ ki koloɗi na.

²⁴ Asi joɓom ana, «Mala Haɗta, Moiz hiniygi gaɗta ka ana, Lini sana wayamma miɗa, hin caamba ka bay goo koɗu, nam kakaɗ a vuɗ gorra maŋ wayamma.

²⁵ Varami ni goryoŋ carana kiɗisiya. Ma ŋgolna miɗ ki bay vuɗ goo u caamba, hiniɗ ka maŋ ma vi kamma.

²⁶ Ma namma miɗ ki bay vuɗuɗ goo ka koɗu. Ma hindina lay, asi kiɗisiya miɗi halaŋ bay vuɗuɗ goo koɗu.

²⁷ Ŋgorosi daganni cara hin miɗ may.

²⁸ Hu buu ma suu miɗina paɗ ki kolona, duk suu kiɗisiya asina maana hin li a njufuɗ ni ge? Asi kakaɗ ay ki usi halaŋ may ni ge?»

²⁹ Yesu hoŋosi dira ana, «Agi viɗ ii tagi ni kay agi wi boy ma hu magaara u saɓak ma vi Lonna kaɗira.

³⁰ Hu buu ma suu miɗina paɗ ki kolo iirira, sa njufna ka ɗum caɗi lay, ca ka kak njufɗi lay. Asi hin li ni ko suu sunda huulona na.

³¹ Kay suu miɗina a paɗ ki kolo iirira ni, agi ndum boy ma Lona dagina hu magaarana kaɗi su?

³² Nam di ana, An ni Loŋ Abrahamma, Loŋ Isaakŋa, Loŋ Yakobma. Nam ka Lo ma vi suu miɗinaɗi, Lo vi suu iirina ni namu.»

³³ Suu molina hum na ni, haɗ ndaɗta su ki kasi cocoo.

Gaɗta su ndarayaɗnara

³⁴ Suu Farisenna hum ana Yesu vi suu Sadusenna u boyna ni, asi tok tasiya.

³⁵ Sa ma dukusi dew, sa wi gaɗta, min a gun Yesu u boyna, joɓom ana,

³⁶ «Mala Haɗta, gaɗta ŋgolla su kay ndarayaɗnara ni taarage?»

³⁷ Yesu hoŋom dira ana, «Aŋ min Looŋŋa Bu Suuna u huruŋ halaŋ, u musukuŋ halaŋ, u saa maŋga halaŋ.

³⁸ Ni gaɗta ŋgolla su kay ndarayaɗnara.

³⁹ Ta ko ndaɗ na mayra ni ana, Aŋ min ndaraŋŋa ko min taŋga na.

⁴⁰ Gaɗta vi Moizza halaŋ u haɗta vi suu jok vun Lonna tokŋi hu gaɗ ndaɗta.»

Sa Lona Fuurumma u Goŋ Davidna ni nanage?

⁴¹ Suu Farisenna toki eg tasi wanni, Yesu joɓosi ɗaŋi ana,

⁴² «Agi saaragi kay Sa Lona Fuurumma ni ana mege? Nammi hu njaf ma vi ge na ge?» Asi hoŋom dira ana, «Hu njaf ma vi Davidna.»

⁴³ Yesu dasi ana, «Lini na ni, David u saɓakŋa vi Musuk Lonara yam ana, Bu Suuna ni nanage? David di ki ana,

⁴⁴ Bu Suuna di maŋ Bu Suu manna ana, Kak kay bikin ma njufna, gak gak an cukuŋ babali maŋsina ki kaŋga u seŋ tuwa.

⁴⁵ David li yam a Bu Suuna mamma na ni, Sa Lona Fuurumma hin li a goromma ni nanage?»

⁴⁶ Kay boy namma sa fi boy ka dukusi dew a di maŋ Yesuɗi. Ka ay hu buu namma na ni, sa ndak ka a joɓom boy ma daŋ oloɗi.