MATIYE 21 - Boy Lonana

Yesu kal Yerusalem

¹ Asi mbay eg Yerusalem tok, tew hu zi ma Betfagena, kay ɦinira Conora ni, Yesu sun suu haɗi mamsina mba' ha foko,

² dasi ana, «Tuɗugi ha hu zi ma fokogi wanna. Agi hin fagi korra njuni kaŋga u goroɗu. Buɗuɗ aya, mbaaransina aya.

³ Sa li joɓogiya ni, agi dam ana, Bu Suuna a minisiya. Asi hin hinigi agi tuɗ aya.»

⁴ Dla ndaɗta li na ni, di ki ni vun sa jok vun Lonna ma di ana,

⁵ «Dagi maŋ suu Siyonna ana, Gologi Mul magina ka tuɗ aya, nammi sa ɗilina, fuli kay korra u goroɗ uɗu.»

⁶ Suu haɗi asina tuɗ li ko Yesu dasira na.

⁷ Asi vi korra ay u goroɗ uɗu, boɗoɗ baraw masina kaɗu. Yesu ful kaɗu.

⁸ Ŋgol suuna boɗ baraw masina ha kaŋga hu voɗta, suu ɦiw ka bubura, boɗoɗ ha kaŋga lay.

⁹ Suu fok Yesuna u suu ŋgorom daganna sawalla kolo ana, «Geleɗta maŋ Goŋ Davidna. Lona paɗ vunum ki kay sa mbay u sem Bu Suuna. Geleɗta maŋ Lo ma kolona.»

¹⁰ Yesu kal ha Yerusalem wanni, suu ɦoŋzina ki ɦayra kay boy namma. Joɓ tasi ana, «Sa namma ni ge ɗow ge?»

¹¹ Suu molina di ana, «Ni Yesu ma Nazaretna, ma jok vun Lonna, hu mbassa Galilerana.»

Yesu hu Ziŋ Lonara

¹² Yesu kal hu Ziŋ Lonara, dik suu gus tlegeyesi kina, u suu gus kosina kiyo. Nam zuɗ tabulla vi suu mbuɗ gursura ki kaŋgaa, dlamba vi suu gus gugukka nam zuɗuɗ ki kaŋga lay.

¹³ Nam hin dasi ana, «Ki ɓiiri ana, Ziinda hin li ni zira cen Lona, agi mbuɗuɗ ki zira kulna ni a mege?»

¹⁴ Suu dugina u suu dalira ɦuɗ tasi eg Yesu hu zira wanni, nam mbuɗusi ki jiviya.

¹⁵ Muli suu li ɓivunna u suu wi magaara gaɗta wi dlara mbuɗta nam laɗta u dlara kemba sawalla hu zira ana, «Geleɗta maŋ Goŋ Davidna» may ni, asi hurusi ɓeŋ ki cocoo.

¹⁶ Asi di Yesu ana, «Aŋ hum dlara asi daɗta ɗaŋ su?» Yesu hoŋosi dira ana, «Haa. An huma. Agi ndum boy ma ki ɓiirina kaɗi su? Ana, Kemba u suu ndumdurina, geleɗ maŋga sel ay ki vunusiya.»

¹⁷ Nam hinisi ka tani, kal ki ɦoŋzina, tuɗ buu Betani.

Yesu gi vunna maŋ tulumma

¹⁸ Yesu ndi ay maɗii, a hoŋ ay hu zi ŋgolna wanni, mayra mbuɗ camu.

¹⁹ Nam wi tulumma coli keŋ voɗta na ni, nam tuɗ umu ana nam hin fam vuɗum hu kalage. Gola ni humum ɦawaa. Nam gi vun maŋ tulum namma ana, «Aŋ wanni vuɗ oloɗi.» Tulum namma so ki gaw.

²⁰ Suu haɗina wi na ni, boy namma su ki kasiya. Asi joɓ Yesu ana, «Tulum ma li na wan daŋ, so ki na zakŋi nanage?»

²¹ Yesu hoŋosi dira ana, «An dagi ha ni gasira, hurugi li tini kanu, ka mbambaɗi ni, agi ka li dlara an laɗ eg tulumma wandara ganakgi, agi ndak a di maŋ ɦinira wandara ana, Hin li ma wanna kiyo, gi tak ha ki duk mbo ŋgolna ni dla ndaɗta li lay.

²² Hurugi li vii kanu ni, tlesuu agi joɓosina u cenda ni, agi hin fasi halaŋ.»

Yesu li dlaamba ni u vun gege?

²³ Yesu kal hu Ziŋ Lonara, gijaŋ haɗ suuna. Muli suu li ɓivunna u suu ŋgolo suu Juifna, ɦuɗ tasi egem, joɓom ana, «Aŋ li tlegeyeŋ ni u saɓak gege? Sa ɦaŋ voɗta a li tlege suu asina ni gege?»

²⁴ Yesu hoŋosi dira ana, «An ka joɓogi va ha dew. Agi gan u va namma ay ki wa ni, an hin dagi ana an li dla ndaɗta ni vun sa hiŋŋa nara ki may.

²⁵ Sa sun Jaŋ a mbus batemma ni gege? Ni Lona ɗowba suu warna su?» Asi gijaŋ joɓ tasi ana, «Lini aygi di karamwa ana, Lona sunum ay ni namu ni, nam hin ana, Aygi tin huruygi kambi ni amege?

²⁶ Lini aygi di wa ana, Suuna sunum ay ni asiya ni, aygi li ndaa ko suu molina, kay asi wi halaŋ ana, Jaŋ li ay ni sa jok vun Lonna.»

²⁷ Asi wi na ni, hoŋom dira ana, «Ka irimiɗi.» Yesu olos dira ana, «An may ni ka dagi sa an li dlaanda vunummaɗi may.»

Ndal boyna kay goryoŋ sanna mba'

²⁸ Yesu di ana, «Boy ma wanna irigi ni ana mege? Sana goryom kom mba'. Nam di maŋ ma jewna ana, Goonna, tuɗ li sunda karam hu senena.

²⁹ Nam hoŋom dira ana, An minɗi. Ŋgoo daganda nam saa hurum na ni, hin tuɗ hu senena.

³⁰ Nam di maŋ gorom ma hiŋŋa na olo. Namma hoŋom dira ana, Bunu, an tuɗa. Hin tuɗ kaɗi.

³¹ Gor suu mba' asina, sa hum vun bumma ni gege?» Asi hoŋom dira ana, «Ma jewna.» Yesu dasi ana, «An dagi ni gasira, suu vi taara u gawlaŋina hin cuk hu Mulla vi Lonara jewegiya.

³² Jaŋ mbay dukugi takagi voɗta ɗegeera, agi vam vunum kaɗi. Suu vi taara u gawlaŋina vam vunummi asiya. Agi wi dla ndaɗta may, mbuɗ hurugi ka a vam vunumbi.»

Ndal boyna kay suu li sunda hu senena suu cona

³³ «Humugi ndal boy ma daŋŋa. Sana li senena li ni, dlaɓam yamu, vek zulla a em gugutlura, nam vi mbutluɓma duku. Nam cuk suuna ka hu sene mamma ca ni, tuɗ hu li daŋŋa.

³⁴ Tlesuu hu senena ndak a feɗta ndakŋi, nam sun suuna ana ŋgaam ii mamsina haa.

³⁵ Suu li sunda hu senena yow suu asina, waɗ ma hiŋŋa, ci maa ki maɗ dew may, duu ma hiŋŋa gikka u gogoyra may.

³⁶ Malaŋ senena cuk suu daŋŋa ay ŋgol su suu jewna olo. Suu li sunda hu senena lasasi na olo.

³⁷ Ŋgoo dagan nam sunusi goromma aya, ana asi hin lam zolombi su.

³⁸ Suu li sunda wam goromma ay na ni, ɓak duk tasi ana, Cow ni sa yow daa jo bumma. Caygina ki ci ni jo bum hin ki maygi silik silik.

³⁹ Asi vam, taɗam ha ki keŋ senena, cam kiyo.

⁴⁰ «Yesu joɓ suu egemma ana, Malaŋ senena hoŋ ay wa ni, hin li suu asina ni nanage?»

⁴¹ Asi hoŋom dira ana, «Suu co asina nam hin casi kiyo, ka wasi hahawasiɗi. Sene namma nam hin ɦam ki maŋ suu daŋŋa. Suu asina ni suu lam tlegeyem jivina nam fi usi mayna.»

⁴² Yesu dasi ɗaŋ ana, «Agi bay ndumugi va ma ɓiirina tu su? Ma di ana, Ҥinira suu min goŋga noyoɗ ki kaŋgara, hin mbuɗ a jiv goŋga ki ni ndaɗu. Gola ni dlara Bu Suuna laɗta, aygi goloɗ na ni, ndaɗ su ki kaygi cocoo.»

⁴³ Yesu hoŋ dira ana, «Kay ndaɗta an dagi ni na, Mul Lonara hin tlaɗ ki kogiya, jokoɗ ki ko suu laɗ dlaaɗta jivina. [

⁴⁴ Sa ma ndi kaŋga kay ɦini ndaɗtana hin dak kiyo. Sa ma ɦini ndaɗta ndi kamma, hin luɗum ki kuɗuf.]»

⁴⁵ Muli suu li ɓivunna u suu Farisenna hum na ni, ana nam tinisi ndal boy namma, ni kasiya.

⁴⁶ Asi gijaŋ hal mbeleŋŋa a vamba. Hurusi hin yow ndaana kay suu molina wi Yesu ni ko sa jok vun Lonna na.