MATIYE 20 - Boy Lonana

Ndal boyna kay suu li sunda hu senena

¹ «Agi gola Mulla huulonara tli taɗ ni ko me na ge? Ndaɗ ni ko malaŋ senena kal ki maɗii feɗet a yow suuna a li sunda hu sene mammara na.

² Nam vi vun tasi a warakasi gursu na ko suuna li sunda hu buu ma dew nara na. Nam tinisi hu senena.

³ Nam hoŋ ay ki faɗta baŋŋa ma yawna, fi suu daŋŋa ki laki ɦawaa.

⁴ Nam dasi ana, Tuɗugi li sunda hu sene manna, an hin warakagi kay sun magira u voɗoɗu.

⁵ Asi tuɗ gaw. Malaŋ senena hoŋ kal ki faaliya, yow suuna olo. Fiɗigi ni nam yow na olo.

⁶ Fiɗigi faɗta ɓaɗ kay gura ni, nam fi suuna ki laki ɦawa olo. Nam dasi ana, Agi lak tani na tew tew, ka li sunɗi ni a mege?

⁷ Asi ana, Ni kay sa yami kaɗira. Nam dasi ana, Li na ni, tuɗ lagi sunda hu sene manna.

⁸ «Fatɗa ɗik ɗikŋi, malaŋ senena di maŋ sa funumma ana, Yi suu sunda aya, warakasiya, gijaŋŋa ay kay suu mba daganna, daɓ ki kay suu mba jewna.

⁹ Suu mba fiɗigi faɗta ɓaɗ kay gurana, fi gursura ko suuna li sunda hu buu ma dewnarana.

¹⁰ Suu mba maɗii feɗet na, saa hurusi ana asi fi karam ŋgol suusiya. Doli ɗini asi fi ni vun tasi dew, gursu na ko suuna li sunda hu buu ma dewna na lay.

¹¹ Asi wi gursuna kosi na ni, gijaŋ gurni eg malaŋ senena ana,

¹² Ndarayami suu mba daganna li sunda ni ew daŋ. Aŋ warakasi ko ami suu li sunda, ɗik faɗta na gimma, na ni amege?

¹³ Malaŋ senena hoŋ dira maŋ sa maa dukusi dew ana, Banna, an ganaŋ yaŋ kaɗi. Ay vay vun tay ha maɗii ni, kay gursu ma namma daŋ mayɗi su?

¹⁴ Vi gursu maŋŋa, gi taŋu. An min a ɦal maŋ ndarayaŋ suu mba daganna, ni ko aŋ na may.

¹⁵ An ndak a li dlara hurun miniɗta u gursu manna. Huruŋ mbuɗ co kay jivira an laɗta su?»

¹⁶ Yesu faɗ vun boyna ki daŋŋi ana, «Suu ay daganna hin mbuɗ foko. Suu ay fokŋa hin mbuɗ dagan may.»

Yesu ɓak kay miɗ mamma u paɗ mamba kolora a yamba hindira

¹⁷ Yesu a tuɗ kolo Yerusalemba wanni, nam yow suu haɗi suu doogo yam mbana umu.

¹⁸ Nam dasi ha voɗ ana, «Humugi haa. Aygi tuɗuygi ha kolo Yerusalem wanni, sa hin di kolokŋa kay Goŋ Sanna, muli suu li ɓivunna u suu wi magaara gaɗta hin vamu. Asi hin kaam ɓak mamma ana cam kiyo.

¹⁹ Asi hin ɦam ki maŋ suu ɦawana. Suu asina hin panamu, cam waɗta, ɓalam ki kolo hu gu ma garakŋa lay. Hu buu ma hindina ni, nam hin paɗ ki kolo iiriya.»

Jak u Jaŋ susi joɓ Yesu

²⁰ Su goryoŋ Zebedena ɦuɗ taɗ eg Yesu u goryoɗu. Ndaɗ goɓ kaŋga fokom a joɓom vaa.

²¹ Yesu daɗ ana, «Nanage?» Ndaɗ hoŋom dira ana, «Goryon mba' ca ni, maa dew kak kay bikiŋ ma njufna may, hiŋŋa kay ma gulna may, hu Mul maŋga.»

²² Yesu hoŋ dira ana, «Agi ka wi va ma agi joɓommaɗi. Agi ndak ci va cira an hin camma su?» Asi dam ana, «Ami ndaka.»

²³ Yesu ana, «Na daŋ may. Agi hin wihawra ko an na. A kak kay bikin ma njufna u ma gulna ni, ŋgaɓ ndaɗta ka kon anɗi. Li namma ni maŋ suu Bun minisina masina.»

²⁴ Suu haɗi suu hin doogona hum na ni, hurusi ɓeŋ ki eg Jak u Jaŋ.

²⁵ Kay ndaɗta Yesu yasi ay egem halaŋ, dasi ana, «Agi wi kagi ana muli suu kay ndaŋgarana kaki eŋga kay suu masisina, suu ŋgolona tin dlara nekka kay suu masisina lay.

²⁶ Dukugi ni, dla ndaɗta ka liɗi. Lini sa dukugi min a mbuɗ tam ŋgolo ni, nam lagi sunda.

²⁷ Dukugi ni sa hal ana nam li foko na, mbuɗ tam ki mbaɓu magina.

²⁸ Gola. Goŋ Sanna mba ka ana suuna lam sunu naɗi. Nam mba ni a lasi sunda masi naɗow. Nam warak u iiri mamba a buɗ suuna ki bolow cocoo.»

Yesu mal ii suu dugina ki mba'

²⁹ Asi hin zi Yerikona ka ki tani, suuna tuɗ u Yesu bolowo.

³⁰ Suu dugina mba' laki keŋ voɗta, hum ana Yesu jak tuɗta ni namu ni, asi sawalla kolo ana, «Bu Suuna, Goŋ Davidna, wami hawami aya.»

³¹ Suu molina doorosi ana, asi seŋ tasiya, ni suu dugina jok usi ha fok joki na ɗow ɗow ana, «Bu Suuna, Goŋ Davidna, wami hawami aya.»

³² Yesu col col ni, yasi aya, joɓosi ana, «Agi min ana an lagi ni mege?»

³³ Asi hoŋom dira ana, «Bu Suuna, malami irimi kiyo.»

³⁴ Yesu wasi hawasiya, ŋgenesi irisi na ni, ndaɗ mal ki gaw. Irisi mbuɗ wiya, asi tuɗ u Yesu.