MATIYE 19 - Boy Lonana

Yesu haɗ kay dla boyogi suu busina

¹ Yesu daɓ haɗ ndaɗta ki daɓmi, hin Galile ki tani, tuɗ hu mbassa Yudera, ha ŋgoo lumma Yurdanna.

² Suuna mok um bolowo, nam suɗusi suu masi suu tuguɗira kiyo.

³ Suu Farisenna suu ɦiw mbay egemu a duum delemu, joɓom ana, «Hu gaɗ maygira di ana sana caamba li dla megelay ni, busuɗ ki gaw su?»

⁴ Yesu hoŋosi dira ana, «Agi ndum boy ma hu magaarana kaɗi su? Ura tin ayra ni Lona li sana may, li cara may.

⁵ Nam di ana, Sana hin bum ki may, hin sum ki may, kak u caamba. Asi mba' mbuɗ ni tliw ma dewna.

⁶ Na ni asi ka wali oloɗi, taɓ ki ni dew. Va ma Lona dlaɓam ki dewna, sana ka walam irim kiɗi.»

⁷ Suu Farisenna hoŋom joɓpa ana, «Moiz dami ana sana li a bus caamba kiyo ni, haɗ magaara bussa koɗu, ni kay mege?»

⁸ Yesu ana, «Moiz hinigi na ni, kay hurugi ma eŋŋa. Ura tin ayra ay ka naɗi.

⁹ An dagi ana, Lini sana dik caamba ki wa, bay ndaɗ li zoŋga, ɗumba daŋga um wani, nam li ni zoŋga.»

¹⁰ Suu haɗi mamsina dam ana, «Lini sana a li u caamba na ni, mariyaɗ ni suuna kak bay ɗum boyogina gawɗi su?»

¹¹ Yesu hoŋosi dira ana, «Suuna ndak ka a vi haɗ ndaɗta kasi halaŋgi, suu vaɗ kasina ni suu Bun ɦasi saɓakŋa egesi a li dla ndaɗtana doy hol.

¹² Dlara doo suuna ki bay ɗumba ka bolowo. Suu ɦiw ni dla ndaɗta col ay egesi ni u gorosi day. Suu ɦiw olo ni boy namma col ay egesi ko ndarayasina. Suu daŋŋa olo hin tasi, ka ɗumbi ni, kay Mulla huulonara. Sa min a vi haɗ ndaɗta kamma vaɗu.»

Yesu paɗ vunum ki kay kem gorira

¹³ Suuna mbaa gorkemba eg Yesu ana nam baa kom kasiya, joɓ Lona kasi may. Suu haɗina yal suu mbaarasi ayna.

¹⁴ Yesu ana, «Hin kemba mbay egenu, doorosi kiɗi, kayme Mulla huulonara ni maŋ suu ko asina na.»

¹⁵ Nam baa kom kasi baa ni, gi tam gaw.

Goozoŋ ma ɦizina

¹⁶ Sana ɦuɗ tam eg Yesu, joɓom ana, «Mala Haɗta, va ma an lam jivina a fi iirira ka daɓ kiɗira ni mege?»

¹⁷ Yesu dam ana, «Aŋ joɓon kay va jivina ni kay mege? Sa jivina dew daŋ. Aŋ li a fi iirira ni, vi vun gaɗta.»

¹⁸ Nam sana ana, «Taarage?» Yesu hoŋom dira ana, «Aŋ ci maɗɗi, li zoŋgi, kulɗi, kaboy eg saɗi.

¹⁹ Tli yam buŋ u suŋ koloo. Min ndaraŋŋa ko taŋga na.»

²⁰ Goozoŋ namma dam ana, «An vi gaɗ ndaɗta ay ki kan halaŋ. An li ni me olo ge?»

²¹ Yesu dam ana, «Aŋ li a li ki jivi teteɗ ni, tuɗ gus tlege suu koŋŋa ay ki halaŋ. Begera aŋ faɗta ɓorowoɗ ha ki maŋ suu hawra. Aŋ hin fi ɦizza ŋgolla ha kolo huulona. Aŋ li wa na ni, hin tuɗ ay unu.»

²² Goozoŋŋa hum boy namma na ni, gi tam u irimba ɗussa, kay nam u begera kom cocoo.

²³ Yesu di maŋ suu haɗi mamsina ana, «An dagi ni gasira, sa ɦizina a kal hu mulla huulonara, ni loɓo.

²⁴ An dagi ha hu olo, Jamballa a kal hu zul libirina ni loɓ ɦay, sa ɦizina a kal hu Mul Lonara loɓ su jamballa a kal hu zul libirinara olo.»

²⁵ Suu haɗina hum na ni, boy namma su ki kasiya, asi di ana, «Lini na ni, sa hin suɗ ki ni ge olo ge?»

²⁶ Yesu golosi na ni, dasi ana, «Dla ndaɗta ka li ko suu warnaɗi, ko Lonni va dumum kaɗi.»

²⁷ Piyer kaam vunum ana, «Aŋ gola, ami hin tlegeyemi ki halaŋ, tuɗ ay uŋu, hin li kami ni ana mege?»

²⁸ Yesu dasi ana, «An ka dagi gasira ha ɗaŋ. Falira Goŋ Sanna hin kak kay dlamba mulla hu bibiŋilla vi Bumba, kay tlesuu wilinara wanni, agi suu doogo yam mba' suu tuɗ unna, agi hin kak a ka ii ɓakŋa kay dee suu Israel suu doogo yam mbana may.

²⁹ Suu ana asi hin ziisi kiyo, ɗowba gorsesina, busiya, susiya, goryosiya, sene masina kan anu ni, asi fi ŋgol suwa sem kis olo, hin fi iirira ka daɓ kiɗira hu jona lay.

³⁰ Suu fokŋa bolowo hin mbuɗ ki dagani, suu daganna bolowo hin mbuɗ foko.»