MATIYE 18 - Boy Lonana

Ma ŋgolna ni gege?

¹ Hu li namma, suu haɗina ɦuɗ tasi eg Yesu, joɓom ana, «Sa a ŋgolla hu Mulla huulonara ni gege?»

² Yesu yi gogoona ay yi ni, colom fokosiya,

³ dasi ana, «An dagi ni gasira, lini agi ka mbuɗ tagi ki ko gorkemba naɗi ni, agi ka kal hu Mulla huulonaraɗi.

⁴ Sa ma hoŋ tam ki ko gogoona nana ni, a ŋgolla hu Mulla huulonara ni namu.

⁵ Sa ma vi gogoona varam u sen ko ma wanna nana, nam van ni anu.»

Dla cora

⁶ «Sa ma ganyam gogoo ma tin hurum kanna, tinim hu corana, mariyaɗ ni njunum ɦinira kelem njun ni, gam ha ki duk lumma.

⁷ Hahawra kay suu cuk ndarayasina hu cora. Gasi, dla cora hin mbaa, hahawra kay sa mbaaraɗ ayna.

⁸ «Lini koŋ kala, seŋ kala, kalaŋ hu cora ni namu ni, kaam kiyo, gikim ha ki egeŋ day. Mariyaɗ ni aŋ kal hu iirira ka daɓ kiɗira u koŋ ma dewna kala u seŋ ma dewna kala, ni su mayra aŋ tuɗ duk kura ka daɓ kiɗira u asi jakka.

⁹ Iriŋ li tiniŋ hu cora ni ndaɗu ni, mariyaɗ ni aŋ holoɗoɗ ki holoɗ ni, gikiɗ kiyo. Mariyaɗ ni aŋ kal hu iirira ka daɓ kiɗira u iriŋ kaŋ dew, su mayra aŋ tuɗ duk kura ka daɓ kiɗira u ndaɗ kaŋ jakka.»

Ndal boyna kay timiira viɗ ki, hin faɗta

¹⁰ «Lagi tagi jiviya, kay kemba ca ni, gologiya maa lalasiya. An dagi ha ni gasira suu masi suu sunda huulona eg Bun ma kolona golom irim kasi tew tew. [

¹¹ Kayme Goŋ Sanna mba ni a suɗ suu ki viɗina.]

¹² «Agi saa kagi ni ana mege? Lini sana timigiina kom kis, taa dew viɗ ki wa ni, nam hin suu dok dleeŋe yam dleeŋena ka tani, tuɗ hal ta dewra ay tuɗi su?

¹³ Lini nam faɗ ay wa ni, hurum li furira kaɗ su suu dok dleeŋe yam dleeŋe suu viɗ ka kiɗina ɗi su?

¹⁴ Bugi ma kolo huulona min ana duk kemba ca ni ma dew viɗ kiɗi na may.»

Gaɗta kay wayaŋ ma li corana

¹⁵ «Wayaŋŋa li cora egeŋ wa ni, aŋ tuɗ egem, takam coomba, agi fun tagi mba'. Nam humuŋ vunuŋ wa ni, aŋ suɗ ki ni wayaŋŋa.

¹⁶ Nam humuŋ vunuŋ kaɗi ni, tay sa uŋ dew kala, mba' kala, tuɗ egemu. Kay a gi ii boyna wanni, suu mba' kala, hindi kala, li duk boy namma, ko gaɗta dira na.

¹⁷ Nam humusi vunusi kaɗi olo ni, dam ki fok suu vina halaŋ. Suu vina nam humusi vunusi kaɗi ni, golom ko sa hawana na.»

Njunda u buɗta

¹⁸ «An dagi ni gasira, dlara agi njunuɗ kay ndaŋgara, ha kolo huulona, ni njuni may. Dlara agi buɗuɗ ki kay ndaŋgara, ha kolo huulona ki buɗi may.

¹⁹ «An ka dagi olo. Lini suu dukugi mba' kala, hindi kala kay ndaŋgara taɓ vunusi a joɓ va ni, Bun ma kolo huulona hin ɦasina.

²⁰ Lini suu mba' kala, hindi kala, tok tasi u sen wani, an ka dukusi may.»

Ndal boyna kay sa ma ka wi hahaw ndarambina

²¹ Piyer ɦuɗ tam eg Yesu, joɓom ana, «Bu Suuna, wayanna li lasan coco ni, an daɓam coomba ki yan gage? Yan na kiɗisiya day su?»

²² Yesu hoŋom dira ana, «Ҥawaa. Ka yaŋ kiɗisiya daŋgi. An daŋŋi ana, dok kiɗisiya dok kiɗisiyara sem kiɗisiya.»

²³ «Ni kay ndaɗta Mulla huulonara tli taɗ ni ko mulna a gi ii dlara duk ɦoŋ tam u suu mamsinara na.

²⁴ Nam gijaŋ ndumba. Asi mbaaram sana ay fokomu. Bal mamma kam bup bup bolowo.

²⁵ Sa namma va ka kom a warakambi. Mul mamma ana tuɗ gusum ay ki u suu mamsina, caamba u goryomu, u tlegeyem halaŋ. Warak bal ma kamma u bege ndaɗta.

²⁶ Sa namma goɓ kaŋga fok mul mamma ana, Aŋ wan hawan na wi ge. An hin warakaŋ ki halaŋ.

²⁷ Mul mamma wam hawam wi ni, hinim bal ma kamma, nam tuɗa.

²⁸ «Sa namma kal ay kiyo ni, ŋgaf ndaram ma li sunda, bal mamma kam kis may. Nam vam delemu, pam mootlokŋa ko cam ki cira na ana, Warakan bal manna ay kiyo.

²⁹ Ndaram namma goɓ kaŋga fokom, dam ana, Aŋ wan hawan na wi ge. An hin warakaŋŋaɗi su?

³⁰ Nam min kaɗi, gam daŋgayna, gak gak nam warakam ki warak gi.

³¹ Suu li sunda u namma wi dla ndaɗta li na ni, hurusi haɗ ɦay. Asi tuɗ cuɗ boy namma maŋ mul masina.

³² Mulna hum na ni, yi sa namma ay gaw, dam ana, Aŋŋi sa cona. An hiniŋ bal ma kaŋŋa ki ni ana aŋ tii taŋ fokonu naɗi su?

³³ Aŋ a wi hahaw ndaraŋŋa gin ni ko an waŋ hahawaŋga na may.

³⁴ Mulna hurum ɓalak ki egem cocoo, nam gam daŋgayna, lasam gak gak, nam daɓ bal ma kamma ki tuwa.»

³⁵ Yesu gi mamma fun ana, «Agi may ni, li ka daɓ cora vi ndarayaginara ki u hurugi halaŋgi ni, Bun ma kolo huulona hin lagi ni na may.»