MATIYE 17 - Boy Lonana

Mbalata Yesu jok ki zeɗ

¹ Ŋgoo dagan li buuna karkiya ni, Yesu tay gi Piyer u Jak u Jaŋ wayaŋ Jakŋa umu. Nam tinisi kay ɦinira fiyekka kay tasi doy hol.

² Mbalatam jok ki irisi zeɗ gaw, vokom mbuɗ weleɗ ko fatɗa na, baraw ma tamma mbuɗ weleɗ haɓma tel tel.

³ Gola ni suu haɗi suu hindina wi Moiz u Eli lakira njaɗ u Yesu.

⁴ Piyer di Yesu ana, «Bu Suuna, a jivira ni lakaygi tani. Lini aŋ mina ni, an vi mbutluɓ hindi, dew maŋ may, dew maŋ Moiz may, dew maŋ Elie may.»

⁵ Vunum bay ndi kaŋga tu may ni, ɗugulla weleɗta kuluɓ ŋgusna kasiya. Asi hum della ɓak ay dukuɗ ana, «Ni Goron ma an minim ɦayna. An furiyum u hurun halaŋ. Agi vam vunumu.»

⁶ Suu haɗina hum della na ni, tasi mbuɗ ndaana, kuluɓ irisi ki kaŋga gaw.

⁷ Yesu ɦuɗ tam egesiya, ŋgenesi na ni, dasi ana, «Yowogi koloo. Lagi ndaaɗi.»

⁸ Asi yow irisi kolo ni, wi ni Yesu dew, sa ka egembi.

⁹ Asi a ɗiŋ ay ki kaŋga kay ɦinira wanni, Yesu gaɗasi ana, «Bay Goŋ Sanna miɗ miɗ, paɗ ay ki kolo bani, dagi dlara agi waɗ wanda ki maŋ saɗi.»

¹⁰ Ŋgoo daganda suu haɗina joɓom ana, «Suu wi magaara gaɗta di ana Elie mba ki fok jewe ni nanage?»

¹¹ Nam hoŋosi dira ana, «Elie hin mba a gi ii tlena kiyo.

¹² An dagi ana, Elie mba ki wa da. Suuna wam kaɗi, lasam wanni ko hurusi minda na. Goŋ Sanna asi hin lasammi ko ndaɗta na may.»

¹³ Suu haɗina wi ki kasi ana nam ɓakasi ni kay Jaŋ ma mbus batemma.

Yesu dik ful ma cona ki kay goona

¹⁴ Yesu u suu mam suu ay um kay ɦinirana, mbay eg suu molina wanni, sana ɦuɗ tam ay egemu, goɓ kaŋga fokomu,

¹⁵ dam ana, «Bu Suuna, wan hahaw goronna na wi ge. Lilira lamu. Nam ndi duk kura u yona na tew tew.

¹⁶ An mbaaram maŋ suu haɗi maŋsina lay ni, asi tew ka a suɗum kiɗi.»

¹⁷ Yesu hoŋ dira ana, «Agi njaf suu co suu hurugi ka tini kanɗi na, an hin li basara dukugi ni ga olo ge? An siɓ u agi ni basa ga olo ge? Mbaaran goona ay tani.»

¹⁸ Yesu bay ful ma cona. Fulna kal ki hin goona ki ɦawaa. Goona garaɗ ki gaw.

¹⁹ Yesu hin ki vaydegem wanni, suu haɗi mamsina ɦuɗ tasi egem, joɓom ana, «Ami ndak a dik ful namma kaki mamiɗi ni nanage?»

²⁰ Yesu hoŋosi dira ana, «Ni kayme hurugi ka tini kan ŋgolɗira. An dagi ni gasi ana, Lini hurugi ma tini kanna ko ii sewena na ganak lay ni, agi di maŋ ɦinira wanda ana ndaɗ jok ha ki tana ni, ndaɗ jok ki gaw. Va dumugi kaɗi. [

²¹ Ful ma cona ko namma nana, dikim ki ni u laara u cenda u laara doy hol.»]

Yesu hoŋ di kay miɗ mamma u paɗ mamba kolora

²² Hu buu maa dew Yesu u suu haɗi mamsina tok Galile wanni, nam dasi ana, «Goŋ Sanna, sa hin di kolokŋa kamu suuna hin vamu,

²³ cam kiyo, hu buu ma hindina, nam hin paɗ ki kolo iiriya.» Suu haɗina hum na ni, mbuɗ ki hahawra.

Yesu warak taara hu Ziŋ Lonara

²⁴ Yesu tew Kapernaum u suu mamsina wanni, suu vi taara hu Ziŋ Lonara mbay eg Piyer, joɓom ana, «Saagi ma ŋgolna ka warak taara hu Ziŋ Lonara mambi su?»

²⁵ Piyer hoŋosi dira ana. «Nam warakka.» Piyer tew ki voo may ni, Yesu gaɗam dira ha jew ana, «Aŋ saa ni ana mege, Simon? Suu warak taara maŋ muli suu kay ndaŋgara ni gege? Goryosi ɗowba suu keŋŋa su?»

²⁶ Piyer hoŋom dira ana, «Ni suu keŋŋa.» Yesu ana, «Gasi kay ndaɗta ni goryosi ka taaɗi.

²⁷ Kay a ɓeŋ huu suu asina ki ɗir ni, aŋ yow jambat maŋga koŋu, tuɗ hu lumma. Kuluf ma aŋ vam fok jewna, aŋ vamu, ŋgoom vunum kiyo. Aŋ hin fi gursu ma warak kay taa mayra ay funumu. Tli gursu namma, warakasi taa mayra ha kiyo.»