MATIYE 16 - Boy Lonana

Suu Farisenna u suu Sadusenna joɓ Yesu ana lasi dlara mbuɗta

¹ Suu Farisenna u suu Sadusenna ɦuɗ tasi eg Yesu. A duum delemba asi joɓom ana nam lasi dlara mbuɗta a takasi saɓakam ma col ay kolo huulona.

² Yesu hoŋosi dira ana, «Fiɗigi faɗta a ndi kaŋgara lini huulona tlawi ni, agi di ana lina karam jiviya.

³ Nda vinda ni, faɗta mun ki wa ni, agi ana, Ndaɗ ti loloo. Agi wi yal ma ŋga tlesuu kolona. Agi ndak ka wi takka li kolo hu lina vi Lonaraɗi.

⁴ Agi njaf ma cona, hurugi ka tini kay Lonaɗi, joɓ dlara mbuɗta ni amege? Dlara mbuɗta daŋ ta sa takagi sura vi Jonassa kaɗi.» Nam hinisi tani, tuɗ gaw.

Kuffa vi suu Farisenna ura vi suu Sadusennara

⁵ Suu haɗina ɗuŋ lumma ki bay yow mappa ay kosiya.

⁶ Yesu dasi ana, «Gol tagi jivi ko kuffa vi suu Farisenna ura vi suu Sadusenna.»

⁷ Suu haɗina hosok tasi ana, «Nam ɓak na ni kay mappa ka koygiɗira.»

⁸ Yesu wasi asi hosok tasi na ni, nam dasi ana, «Agi ɓak duk tagi ana nam di ni kay mappa ka komiɗira ni nanage? Agi suu hurugi ka tini ŋgolɗi na.

⁹ Agi bay hum tu su? Humugi ka gagi kay fu ma vadl ma an ɦam maŋ suu bup bup vadlnaɗi su? Umba hin ay kosira oy kaalamina gage?

¹⁰ Humugi ka gagi kay fu ma kiɗisiya ma an ɦam maŋ suu bup bup fiɗinɗi su? Umba ay kosira oy kaalamina ni gage?

¹¹ Agi ka wi ana an ɓakagi ni ka kay fuɗi, naɗi su? Gol tagi jivi ko kuffa vi suu Farisenna ura vi suu Sadusennara.»

¹² Asi hum ki ana Yesu ɓakasi kay kuffa na ni, ni kay haɗta vi suu Farisenna ura vi suu Sadusenna.

Piyer di ki kay Yesu ana nam ni Sa Lona Fuurumma

¹³ Yesu tuɗ hu mbassa tok eg ɦoŋzina yam ana Sesare vi Filip. Nam joɓ suu haɗi mamsina ana, «Suuna ɓak kay Goŋ Sanna ana mege?»

¹⁴ Asi hoŋom dira ana, «Suu ɦiw ana aŋŋi Jaŋ ma mbus batemma, suu daŋŋa ana aŋŋi Eli, suu hiŋŋa ana aŋŋi Jeremi, li ka naɗi ni sa dew duk suu jok vun Lonna.»

¹⁵ Yesu joɓosi ana, «Agi may ni? Agi di kan ana me may ge?»

¹⁶ Simon Piyer dam ana, «Aŋŋi Sa Lona Fuurumma, Goŋ Lo ma iirina.»

¹⁷ Yesu hoŋ dam ana, «Heɓpa ka kaŋu, Simon goŋ Jaŋŋa, boy ma aŋ damma fam ay ka vi sa warnaɗi, fam ay ni ko Bun ma kolo huulona.

¹⁸ An daŋ ana aŋŋi Ҥinira, ɦini ndaɗta an min zinda kaɗu. Saɓak Maɗna lay ni ka ndak a laɗ va egeɗɗi.

¹⁹ An hin ɦaŋ vun zira vi Mulla huulonara koŋu. Va ma aŋ njunum kaŋga kay ndaŋgara, ha njuni kolo huulona may. Va ma aŋ buɗum ki kay ndaŋgara, ha buɗi kolo huulona may.»

²⁰ Yesu gaɗ suu haɗi mamsina ana asi di ki kam ana nammi Sa Lona Fuurumma naɗi.

Yesu di kay miɗ mamma u paɗ mamba kolora

²¹ Hu li namma Yesu gijaŋ njaɗ maŋ suu haɗi mamsina ana, «Lini nanagelay ni ko an tuɗ Yerusalem. Hu li namma suu ŋgolona u muli suu li ɓivunna u suu wi magaara gaɗta hin lasan cocoo. Asi hin can ki lay. Hu buu ma hindina an hin paɗ ki kolo iiriya.»

²² Piyer vi bik Yesu, tayam ay ki keŋe, yalam ana, «Ka naɗi, Bu Suuna dla ndaɗta ka mba kaŋ na ndeɗi.»

²³ Yesu ɦal ŋgorom maŋ Piyer, dam ana, «Ҥuɗ taŋ ha ki egen day, Satan. Aŋ hal a zuɗun ni hu cora ɦawaa. Saaraŋ ka kora vi Lonara naɗi. Nira vi suu warnara.»

²⁴ Nam hin di suu haɗi mamsina ana, «Lini sana min a tuɗ kay cerenu ni, maa dla tam kiyo, tli garak mamma, tuɗ ay unu.

²⁵ Sa min a suɗ iiri mambana, ndaɗ hin ba kiyo. Sa ba iiri mamba ki kanna, nam hin faɗu.

²⁶ Sana li ana tlesuu hu duliyarana halaŋ lini komu ni, nam ba iiri mamba ki wa ni, tlesuu asina hin mbuɗum mege? Va san fam a hin mbuɗ iiri mamba un ni mege?

²⁷ Na daŋŋi Goŋ Sanna hin mbay u bibiŋilla vi Bumba u suu mam suu sunda huulona may, hu li namma nam hin warak gegelay u dlara nam laɗta.

²⁸ An dagi ha ni gasira, suu dukugi ɦiw ka daɓ ki miɗna bay wi Goŋ Sanna mbay u mul mambaraɗi.»