MATIYE 14 - Boy Lonana

Miɗna vi Jaŋ ma mbus batemma maŋ suuna

¹ Hu li namma Herod, Mul ma Galilena, hum dla Yesu.

² Nam di suu mamma ana, «Jaŋ ma mbus batemma maŋ suuna paɗ ay ki kolo iiri ni namu. Nam li dlara mbuɗta ni kay ndaɗta.»

^3-4 Jaŋ di Herod ana, «Aŋ ndak ka tli caŋ wayaŋŋara ki uŋ bay nam miɗɗi.» Nam di na ni, kay Herod vi Herodiad caŋ wayamma, Filip, ki umba. Herod hum na ni, nam sun suuna, vam Jaŋ aya njunum u zewna, gam daŋgayna.

⁵ Herod hurum gin a cam kiyo, nam li ndaana, ko suuna halaŋ gol Jaŋ ko sa jok vun Lonna na.

⁶ Fali taa dew Herod tin luuna kay buu ma nam vuɗ huna. Goŋ Herodiadta ndi ay pii njoŋŋa fok suuna. Ndaɗ luu jivi ii Herod ɦay.

⁷ Nam suu tam ki ana tlege suu ndaɗ joɓomsina halaŋŋi, nam ɦaɗsina.

⁸ Goora suɗ cakaɗ vunuɗ ki jew cakŋi, ndaɗ joɓom ana, «Ҥan yam Jaŋ ay kon hu ŋgalna tani.»

⁹ Mulna hurum haɗ cocoo. Nam min ka a dooroɗɗi, ni kay vunum kal suu tam ki fok suu nam yasina halaŋga. Nam hurum vi a ɦaɗna yamu.

¹⁰ Nam sun sana a tuɗ ka yam Jaŋ ma mbus batemma ay hu daŋgayna.

¹¹ Nam tli yamba ay kom hu ŋgalna, mba haɗ maŋ goora. Ndaɗ goora tuɗ haɗ maŋ suɗ gaw.

¹² Suu haɗina vi Jaŋ ma mbus batemma tuɗ tlam maɗam ay hu daŋgayna, pam pi ni, tuɗ njaɗ boy namma maŋ Yesu.

Yesu ɦal funa maŋ suuna bup bup vadl

¹³ Yesu hum boy namma hummi, ful hu lumba, sii ha ki kay tasi u suu mamsina. Suu bolowna hum ana nam ha ki tana ni, asi cuɗum um ha fun lumma.

¹⁴ Yesu cuk ki kaŋga hu lumba ca ni, gol irimu ni, suuna molira na ndil ndil. Asi mbuɗ irim hahawi, nam garaɗasi suu masi suu tuguɗira kiyo.

¹⁵ Fiɗigira mba mba ni, suu haɗi mamsina ɦuɗ tasi egem, dam ana, «Aygi duk gura ni, faɗta su ni suya. Di suuna, asi mbee voo, hal tina funusiya.»

¹⁶ Yesu hoŋosi dira ana, «Asi mbee voo ni, ka jiviɗi. Agi ɦasi tina ni agiya.»

¹⁷ Asi dam ana, «Funa komi ni vadl, kulufna mba' daŋ may.»

¹⁸ Yesu dasi ana, «Ҥansina ay tani.»

¹⁹ Nam di suuna ana asi lak kaŋga kay usuna. Yesu yow fu ma vadlna u kuluf ma mbana kom yow ni, tli irim kolo huulona, gi deɓ Lona kamu. Nam ɓorow ii funa ki ɓorow ni, ɦam maŋ suu haɗi mamsina ana asi ɓorowom ha ki maŋ suuna.

²⁰ Asi suuna ti funa, ndak ki u mayasi halaŋ. Suu haɗina taa u fu ma hinna, oy kaalamina doogo yam mba'.

²¹ Asi suu ti funa tew va ma bup bup vadl, ndum boyogina u kemba ka dukgi.

Yesu tuɗ kay mbona

²² Ŋgoo daganda Yesu ɦeɓ suu mamsina ana asi ful hu lumba, tuɗ ha fokom keŋ hiŋŋa. Hu li namma nam di suu hin egemma ana, «Tuɗugi voo.»

²³ Dukusi wal ki wal ni, nam ɗiŋ kolo kay ɦinira a cen Lona. Njeŋgera mba mba ni, nam hin vaydegemu.

²⁴ Lumba ɦuɗ ha ki duk na day ni, gijaŋ kibitliŋ coco, kayme babaana paɗ ɦay.

²⁵ Ŋgarapii ŋgolla wanni, Yesu gi tam tuɗ kay mbona, ɓaɗ suu haɗi mamsina.

²⁶ Asi wam tuɗ kay mbona na ni, mbuɗ ki ndaana gaw, ana va mbuɗ irisi ni mbuɗiya, gijaŋ ci lulura kolo ii ndaana.

²⁷ Yesu ɓakasi zak gaw ana, «Cukugi musukugi kaŋgaa. Ni anu. Lagi ndaaɗi.»

²⁸ Piyer gijaŋ ɓakŋa ana, «Bu Suuna, lini aŋu ni, dan aya, an tuɗ ha egeŋ kay mbona may.»

²⁹ Yesu dam ana, «Piyer mbaya.» Nam hin lumba ki tani, gi tam kay mbona a ŋgaf u Yesu gaw.

³⁰ Piyer wi bilna ka na ni, mbuɗ ndaana. Nam gijaŋ tluɓ kaŋga gaw, hin yi kolo ana, «Bu Suuna, suɗun kiyo.»

³¹ Yesu maɗ kom maɗ ni, vam na zak, dam ana, «Aŋ li huruŋ na mbambaa, tin huruŋ kanɗi ni amege?»

³² Asi ful u dlaasira jak hu lumba ful ni babaana coɓ ndiŋ gaw.

³³ Suu haɗina hu lumba wanni, goɓ kaŋga fok Yesu halaŋ, dam ana, «Gasi, aŋŋi Goŋ Lonna.»

Yesu garaɗ suu tuguɗira hu mbassa Genesaret kiyo

³⁴ Asi taɓa ay ki doŋ lumma taɓa ni, tew ki hu mbassa Genesaretta.

³⁵ Suu hu zi nammana wi Yesu wi ni, jokom dlam ha ki ɦoŋzina halaŋ, mbaaram suu tuguɗira ay egem bel bel.

³⁶ Asi joɓom ana nam hin suu tuguɗira ŋgenem vun baraw mamma. Suu ŋgenemma mbuɗ ki jivi halaŋ.