MATIYE 13 - Boy Lonana

Yesu tin ndal boyna u waɗ njafna

¹ Hu buu namma Yesu hin zira ha ki tani, tuɗ fun lumma a haɗ suuna.

² Suuna mol kamma ndiŋ ndiŋ, nam ful kak hu lumba ha ki duk mbona. Suuna moli kaŋga fun lumma.

³ Nam dasi tlena u ndal boyna coco ana, «Sana dew kal ay a waɗ njafna.

⁴ Nam a waɗa wanni, ii njaf ma ɦiw yak ki keŋ voɗta. Laygina mba koɓom namma kiyo.

⁵ Hiŋŋa ndi kay gogoyra, ndaŋgara ka hu li namma ŋgolɗi. Nam day ki kolo zak, kay ndaŋga mamba uɗ ka zulɗi.

⁶ Faɗta ndi kaŋga nduh nduh ɗaŋi, nam hin ŋgal kiyo, kay sariyam ka kaŋga dayɗira.

⁷ Ma hiŋŋa ndi duk wayara. Wayara cili kam cil ni, cam ki gaw.

⁸ Ma hiŋŋa ndi kay ndaŋgara jivira. Namma cuk yam ŋgolo. Ma ɦiw irim ne kis, ma hiŋŋa dok karkiya, ma hiŋŋa dok hindi may.»

⁹ Yesu dasi ana, «Agi li huma ni, humugi haa.»

Yesu tin ndal boyna ni kay mege?

¹⁰ Suu haɗina mbay eg Yesu, joɓom ana, «Aŋ ɓak suuna u ndal boyna ni kay mege?»

¹¹ Nam hoŋ dasi ana, «Agi ni suu Lona gagi u boy mamma ŋgay kay Mulla huulonara ki na, gam ka ki maŋ suu hiŋŋa koɗi.

¹² Sa ma vaamma ka komma, hin ɦam ha kayam olo, nam hin zul kom ŋgolo. Sa ma va ka kombina, ma kom ewna, hin tlam ma ki lay.

¹³ Kay ndaɗta an dasi u ndal boyna ni na. Kay asi gola, ka wiɗi, asi jeɓee may, ka humbi, ka wi u boy nammaɗi lay.

¹⁴ Dla ndaɗta li ki kasi ni u boy ma sa jok vun Lona Ezayi damma, Lona di ana, Agi hin jeɓee may, hin ka hum u boy nammaɗi. Agi gola, hin ka wi u boy nammaɗi.

¹⁵ Suu asina mbuɗ ki giniŋi. Asi ŋgel humusi kiyo, dug irisi ki lay, ana irisi wiɗi, humusi humbi lay, saa masira ka wi va a pereɗ irisi egen a an suɗusi kiyo naɗi lay.

¹⁶ «Furira kagiya kay irigi wiya, humugi hum lay.

¹⁷ Gasagi an dagi ni u voɗoɗu. Suu jok vun Lona u suu ɗegeena ŋgolo, min a wi tlesuu agi wasina, hin wasi kaɗi, hal a hum tle asina lay, asi humusi kaɗi.»

Yesu vasi u ndal boy ma nam tinim u waɗ njafna kiyo

¹⁸ «Humugi u ndal boy ma kay waɗ njafna ha ɗaŋ.

¹⁹ Suu hum dla Mul Lonara, ka waɗ uɗɗi na, tli tasi ko njaf ma yak ki keŋ voɗta na. Sa Cona mba wa ni, yowosi ma waɗi gin hurusina ki gaw.

²⁰ Ma waɗ kay li gogoyra, ni suu hum boy ma vi Lonna, vam u ayrana.

²¹ Asi ka hinim a kal sariyam hurusiɗi. Nam kak hurusi ew daŋ. Dlara loɓma mba wa ni, suuna li lasasi kay Boy ma vi Lonna ni, asi hinim voɗom gaw.

²² Ii njaf ma ndi duk wayara ni, suu hum Boy ma vi Lonna hummi, hurusi ki tinni kay tlesuu hu duliyarana, begera mbaɗasi hurusiya. Tlesuu asina muruɗusi Boy ma vi Lonna ki hurusiya. Boy namma zul ka hurusiɗi.

²³ Ii njaf ma waɗ kay ndaŋgara jivira, ni suu hum boy namma, vam hurusina, maa ɦiw irim ndum kis, ma hiŋŋa ndum dok karkiya, ma hiŋŋa ndum dok hindi may.»

Ndal boyna kay ciŋrira duk wana

²⁴ Yesu ɓakasi u ndal boyna ana, «Mulla huulonara tli taɗ ni ko ndal sana tuɗ a zaa waamma hu senena na.

²⁵ Duk ŋgikka wanni babali mamma tuɗ zaaram ciŋrirana ha duk wa ble mamma hu senena, zaa ni hin tuɗ gaw.

²⁶ Wa blena day ki koloo, cuk yam ki may ni, ciŋrirana cuk yaɗ ki duk may.

²⁷ Suu li sunda fok malaŋ senena tuɗ dam ana, Sa ŋgolna, aŋ zaa hu senena ni wa ma jivina may ni, ciŋrira hin mbuɗ ay ni arage?

²⁸ Nam dasi ana, Li ka ni sa babali manna li dla ndaɗta ni namu. Suu li sunda fokomma joɓom ana, Aŋ min ami tuɗ paɗaɗ ki su?

²⁹ Nam dasi ana, Ҥawaa! Paɗaɗ kiɗi. Agi li paɗaɗ kiyo ni, wa ble ma jivina hin paɗ ki duku.

³⁰ Hinisi asi wul jak, juɓ buu ma feɗ wana. Hu li namma an hin di suu feɗ wana ana, Kaagi ciŋrira ki jew tuwa. Moloɗ ki kay taɗu, hin ŋgalaɗ kiyo. Ŋgoo daganda feɗ wana, cukun hu veena.»

Yesu tin ndal boyna u ii sewena

³¹ Yesu njaɗasi ndal boy ma daŋŋa ana, «Mulla huulonara tli taɗ u ii sewe ma sana zaaram gaa hu senena na.

³² Ii sewena gooro su ii tlena halaŋ. Nam day ki kolo wani, mbuɗ ŋgol su ŋgusugi suu hiŋŋa halaŋ may. Laygi suu pii kolona mbay min ziisi hu komu.»

Yesu tin ndal boyna u kuffa

³³ Yesu tinisi ndal boy ma daŋŋa olo ana, «Mulla huulonara tli taɗ ko kuffa cara gaɗ duk fuɗta ŋgolla, yereset u ndaɗu, ndaɗ bu fuɗta ki halaŋga naa.»

Yesu tin ndal boyna zeɗ zeɗ

³⁴ Yesu ɓak suuna halaŋŋi u ndal boyna. Nam ka di boy bay tinim ndalambi.

³⁵ Nam li na ni, faɗ ki ni vun sa jok vun Lona ma di ana, «An hin ɓakasi ni u ndal boyna. Tlesuu ay day u ura tin ayra dayna, an hin ɓakasina kiyo.»

Yesu gasi u ndal boy ma kay ciŋrirana kiyo

³⁶ Yesu hin suu tokina tani, kal ki voo. Suu haɗi mamsina ɦuɗ tasi egemu, joɓom ana, «Vami u ndal boy ma aŋ tinim kay ciŋrirana kiyo.»

³⁷ Yesu hoŋosi dira ana, «Sa ma zaa wa ma jivina ni Goŋ Sanna.

³⁸ Senena ni hu duliyara halaŋ. Njaf ma jivina ni suu tin hurusi kay Mulla huulonara. Ciŋrira ni suuna vi Sa Cona.

³⁹ Sa ma zaa ciŋrira duk wana ni Satanna. Buu ma feɗ wana ni daɓpa vi duliyara. Suu feɗ wana ni suu sunda huulona.

⁴⁰ Ko asi ka ciŋrira, ŋgalaɗ ki kura may ni, falira duliyara daɓ kira ni, hin li ni na may.

⁴¹ Goŋ Sanna hin sun suu mam suu sunda huulona aya. Suu gi ii ndarayasina hu corana u suu li dla cora, asi hin dikisi ki hu Mul mamba.

⁴² Asi hin cukusi duk kura, hu li namma asi hin tiira, muɗ siisi may.

⁴³ Suu hum vun Lonna hin weleɗ ko faɗta na hu Mulla vi Busira. Agi li huma ni, humugi ki jiviya.»

Ndal boyna kay va ŋgayna

⁴⁴ «Mulla huulonara tli taɗ ki ko begera ŋgay duk senenara na. Sa ma dew faɗ fi ni, hoŋoɗ ha ŋgayra. Hurum furi cocoo. Nam tuɗ gus tlegeyem ki halaŋ, hoŋ ay gus sene namma gaw.»

Ndal boyna kay herewna

⁴⁵ «Mulla huulonara tli taɗ ni ko sa paara i hal herew ma jivina na.

⁴⁶ Nam fi ma gusum ŋgolna fi ni, tuɗ gus tlegeyem ki halaŋ, hoŋ ay mba gusumu.»

Ndal boyna kay bay dena

⁴⁷ «Mulla huulonara tli taɗ ni ko suuna cuk bayna a ciwna na. Asi terem wanni, nam yow njaf kulufna ay dam dam.

⁴⁸ Bayna mbuɗ nek wa ni, asi tanam ay ki doŋo. Asi kak kaŋga a vaa ii kulufna kiyo. Ma jivina asi cukum hu koolina, ma cona asi hinim ki kaŋga may.

⁴⁹ Falira duliyara hin daɓ kira ni hin li ni na may. Suu sunda huulona hin mba ɓorow ii suu jivina ki u suu cona.

⁵⁰ Suu cona asi hin cukusi duk kura, hu li namma asi hin tiira, muɗ siisi may.»

Begera wilira ura basira

⁵¹ Yesu joɓosi ana, «Agi hum u boy namma ki halaŋ su?» Asi ana, «Ami hum wa.»

⁵² Nam dasi ɗaŋ ana, «Agi gola, ni kay ndaɗta sa wi magaara gaɗta mbuɗ ki sa haɗina hu Mulla huulonara mbuɗ ni, ko malaŋ zina vaa ii tlegeyem suu wilina ki may, suu basina ki mayra na.»

Suu Nazaretna ka tin hurusi kay Yesuɗi

⁵³ Yesu daɓ ndal boyna daɓmi, gi tam

⁵⁴ tuɗ hu zi ma nam wul ay huna. Nam gijaŋ haɗ suuna hu Zira Tokka hu li namma. Suu moli egemma viɗ ki duk boy namma. Asi hin di ana, «Nam fi nera, li dlara mbuɗ ndaɗta ay ni arage?

⁵⁵ Nammi ka goŋ sa ceɗ gunaɗi su? Mari ka sumbi su? Jak, Yosef, Simon u Jud ni ka gorsemmaɗi su?

⁵⁶ Gorsem suu tamagina ka zina varaygi layɗi su? Nam fi saɓak mam namma ay ni arage?»

⁵⁷ Boy namma hisisi wa. Yesu dasi ana, «Sa jok vun Lonna suuna humum boy mamma halaŋ. Zi ma nam huna may, gorsemma may ka wam iiɗi ni asi doy hol.»

⁵⁸ Yesu li dlara mbuɗta ka hu ŋgolɗi ni, kay hurusi ka tini kambira.