MATIYE 11 - Boy Lonana

Jaŋ ma mbus batemma sun suuna eg Yesu

¹ Yesu ɓak na ni maŋ suu doogo yam mbana, nam gi tam tuɗta gaw a tuɗ haɗ suuna hu zina halaŋ.

² Jaŋ ma mbus batemma, hu daŋgayna wanni, hum dlara Yesu laɗta haa. Nam sun suu mamsina ay egemu,

³ joɓom ana, «Aŋŋi sa ami juɓ ana nam hin mbana ɗowba ami juɓ mi sa daŋ su?»

⁴ Yesu dasi ana, «Tuɗ njaɗagi maŋ Jaŋ tlesuu agi humusina may, wasina may.

⁵ Suu dugina mbuɗ wiya, suu dalira mbuɗ tuɗa, suu liɓina mbuɗ ki jiviya, suu ŋgelina mbuɗ huma, suu miɗina paɗ ki kolo iiriya, Boy ma Ayra jok ki maŋ suu hawra halaŋ.

⁶ Furira ka kay sa an ka mbuɗ irim bisɗi na.»

⁷ Suu vi Jaŋŋa cuk tasi ca ni, Yesu gijaŋ ɓak kay Jaŋ maŋ suuna ana, «Agi ay gologi ni me ŋgoo bagi ge? Usu ma viriw u semeɗna su?

⁸ Naɗaŋi agi ay gologi ni mege? Ni sa ma cuk baraw ma jivi ɦayna su? Suu cuk baraw ma jivi ɦayna ha ni hu zina vi mulina.

⁹ Agi ay gologi ni me ɗow ge? Sa jok vun Lona su? An dagi wanni sa namma ŋgol su sa jok vun Lona.

¹⁰ Jaŋŋi sa ɓiira di kam jew day ana, Gola Lona di ana, An gi sa vun sunda ha fokoŋu a miniŋ voɗta ki fokoŋu.

¹¹ An dagi ni gasira, duk suu kay ndaŋgara halaŋŋi, sa ma su Jaŋ ma mbus batemma ay kaɗi. Doli ni ma goo hu Mulla huulonara ni ma ŋgol suumma.

¹² Ay hu li ma Jaŋ ma mbus batemma haɗ ay gak gak tew karamma ni, suuna kal ay hu Mulla huulonara u eŋga, suu daŋŋa hal a doorosi u eŋga lay.

¹³ Suu jok vun Lona halaŋ, u gaɗta vi Moiz lay, ɓakŋi kay Mulla huulonara. Sa ma do ay ŋgorosi daganna ni Jaŋ.

¹⁴ Lini agi min a vi boy namma kagiya ni, nammi Eli ma ɓiira di ki kam jew a mbayna.

¹⁵ Agi suu humugi a humma, humugiya.

¹⁶ «Suu cukunina tli tasi ni u mege? Asi tli tasi ko kemba hu buɗufna, sawalla maŋ tasira na

¹⁷ ana, Ami ŋguruɗ diffa, agi luu njoŋŋa kaɗi. Ami tiira, agi yooromi kaɗi lay.

¹⁸ Jaŋ mba wanni, nam ka ti vaɗi, ka ci sumbi lay. Agi ɓak kam ana, Nam ki guruɗiya.

¹⁹ Goŋ Sanna mba wanni ti funa may, ci may, agi ɓak kam ana, Ni sa kurufukka. Gola ni sa ma saa tina u ci summa layna banayamma ni suu vi taara u suu cona. Doli ɗini nera vi Lonara tak ki ni u dlara nam laɗta.»

Zi ma min vi boy ma vi Yesuɗina

²⁰ Yesu ɓak u delemba yara kay ɦoŋzi ma nam li dlara mbuɗta hu cocona, kayme suu huna jok hurusi ka kiɗi. Nam di ana,

²¹ «Hahawra kagiya suu Korazinna, hahawra kagiya suu Betsaidana. Dlara mbuɗta ŋgolla an laɗ varagira, an li laɗ ni hu zina Tir u ma Sidonna ni, suu huna njun doona hurusiya, cuk buɗna kasi may ni, li jok hurusi ki wa.

²² An dagiya, hu buu ma kaɓakŋa ni, hahaw magira hin li ŋgol su zi ma Tirna u ma Sidonna.

²³ Aŋ Kapernaum, aŋ saa ana aŋ tew kolo huulona su? Ҥawaa! Aŋ hin tuɗ ni duk kura, kayme dlara mbuɗta an laɗ ay huruŋ wanda, li ni li ay gin Sodom ni, zi namma li ka gin kolo tuwa.

²⁴ An dagiya hu buu ma kaɓakŋa ni, hahaw maŋga hin li ŋgol su zi ma Sodomma.»

Mbay fagi koɗ tara egenu

²⁵ Fali ndaɗta Yesu di ana, «Bunu, mul ma kolo huulona, kaŋga kay ndaŋgara lay na, an gaŋ deɓpa kay aŋ ŋgay tlegeyeŋ ki ii suu wira u suu neeyna, hin takasi ki ii suu kaɗakina.

²⁶ Na daŋ may, Bunu aŋ min ni na.

²⁷ «Tlena halaŋ Bun ɦansina ni konu. Sa ka wi Lonɗi, wammi Bum doy hol. Sa wi Lona kaɗi, wammi Goromma u suu nam hin takasina ki na.

²⁸ «Mbaagi ay egenu agi suu nekka cagina, an koɗogi tagiya.

²⁹ Yowogi tik ma zii nek manda kagiya, humugi u haɗ manda ɗow. An ni sa ma hurum lalamma. Agi hin fagi koɗ tara.

³⁰ Tik manna zii nekka ka loɓbi. Nek manda feɗe.»