MARK 9 - Boy Lonana

¹ Yesu dasi olo ana, «An dagi ha ni gasira, duk suu moli wanna, suu ɦiw hin ka miɗɗi bay wi Mul Lonara mbay u saɓakaɗɗi.»

Mbalata yesu jok ki zeɗ

² Ŋgoo dagan li buuna karkiya ni Yesu tay gi Piyer u Jak u Jaŋ umu. Nam tuɗ u asi kay ɦinira fiyekka, ki vaydegesiya. Asi gol irisi na ni, mbalata Yesu jok ki irisi zeɗ gaw.

³ Baraw ma tamma mbuɗ ka weleɗta wilik wilik, haɓpa ki na kew kew. Sa ndak a mbus baraw ki haɓ kay ndaŋgara ko namma na ni kaɗi.

⁴ Suu haɗi suu hindina wi Eli u Moiz njaɗ u Yesu.

⁵ Piyer di Yesu ana, «Malaŋ Haɗta, a jivira ni lakaygi tani. Vaygi mbutluɓ tani hindi, dew maŋ may, dew maŋ Moiz may, dew maŋ Eli may.»

⁶ Piyer ka wi va ma nam dammaɗi, kay asi mbuɗ ki ndaana cocoo.

⁷ Ɗugulla kuluɓ ki kasiya. Asi hum della ɓak duk ana, «Ni gooron ma an minim ɦayna. Agi humum vunumu.»

⁸ Suu haɗina gol irisi na gaw ni, wi sa daŋ kaɗi, hin ni Yesu dew.

⁹ Asi a ɗiŋ ay ki kaŋga kay ɦinira wanni, Yesu gaɗasi ana, «Bay Goŋ Sanna paɗ ay ki kolo iiri duk suu miɗina ba ni, agi di dlara agi waɗta ki maŋ saɗi.»

¹⁰ Asi vam gaɗ mamba, hin ɓak duk tasi ana, «Paɗ ki kolo iiri duk suu miɗina ni ana mege?»

¹¹ Ŋgoo daganda asi joɓ Yesu ana, «Suu wi magaara di ana Eli hin mba ki jewe ni kay mege?»

¹² Nam dasi ana, «Eli hin a mba gi ii tlena ki halaŋŋi nam tuwa. Ni nana Boy Lonana ki ɓiiri lay ana Goŋ Sanna hin fi lassa, asi panam coco lay ni kay mege?

¹³ An dagi ana Eli mba ki da. Asi lasam ko hurusi minda na, ko Boy ma Ɓiirina di ki jew kamba na.»

Yesu dik ful ma cona ki kay goona

¹⁴ Asi gi Yesu tew eg suu haɗi suu hiŋŋa wanni, asi wi suuna ŋguy kasi cocoo. Suu wi magaara ciwayra u asiya.

¹⁵ Suu ŋguy asina wi Yesu ay na ni, vundikisi paɗ ki na fak, asi cuk tasi ɓaɗta zak zak a gam deɓpa.

¹⁶ Yesu joɓ suu haɗi mamsina ana, «Agi ciwayra u asi ni kay mege?»

¹⁷ Sa dew duk suu molina hoŋom dira ana, «Malaŋ Haɗta, an mbaa goonna ay ni egeŋu, ful ma cona kamu, ka hinim a ɓakgi.

¹⁸ Ful namma mba kam wanni, li ni aragelay ni, gam kaŋgaa. Vunum gi kuffa na girip girip, muɗ siim na ŋgirit ŋgirit, tam so ki na ko' ko'. An joɓ suu haɗi maŋsina ana asi dikimma ki kamu ni, asi ndak kaɗi.»

¹⁹ Yesu dasi ana, «Agi njaf suu hurugi ka tini kanɗi na, an hin li basara u agi ni ga olo ge? An siɓigi ni basa ga olo ge? Mbaaran goona ay tani.»

²⁰ Asi mbaaramma ay egemu. Fulna wi Yesu na ni, gijaŋ dlak goona gaw. Nam ndi kaŋga ndi ni, tli bulumba gaw, vunum ndi ki funum kuffa na girip girip.

²¹ Yesu joɓom bum ana, «Dla ndaɗta egemmi basara ki ni gage?» Nam hoŋom dira ana, «Ay ni u goo tam day.

²² Ful namma gam duk kura u mbona na tew tew, hal a cam kiyo. Aŋ li ndak a lam va egemu ni, njunumiya, wami hahawami na wi ge.»

²³ Yesu di ana, «Aŋ li di anaba, aŋ ndak su ni, sa tin hurum kay Lona tlena ka li kom loɓbi.»

²⁴ Bu goona sawalla ha ana, «An tin hurunu. Aŋ njununu, hurun bay vi ŋgol tuwa.»

²⁵ Yesu wi suuna yow ay liŋŋa egem na ni, nam bay ful ma cona ana, «Aŋ ful ma ndumu ma ŋgelina, an daŋu, kal ay ki hu goona, hoŋ hurum oloɗi.»

²⁶ Fulna bay na haŋgak, dlak goona na jik jik, kal ki gaw. Goona mbuɗ ko miɗira na, suuna mbuɗ di kam ana, «Nam ki ni miɗiya.»

²⁷ Yesu tlam komu, colom koloo, goona col ki u sem gaw.

²⁸ Yesu kal kalafi kal ni, suu haɗi mamma egem doy hol joɓom ana, «Ami ndak a dik ful namma ki mamiɗi ni nanage?»

²⁹ Yesu dasi ana, «Ful ma co ko namma na na, dikim ki u cenda doy hol.»

Yesu di ki kay miɗ mamma u paɗ mamba kolora olo

³⁰ Yesu u suu mamsina tuɗa, jak keŋ mbassa Galilera. Yesu ana sa wi li ma nam ay hunaɗi.

³¹ Nam haɗ suu haɗi mamsina, dasi ana, «Goŋ Sanna, sa hin di kolokŋa kamu, suuna hin vamu, cam kiyo, buuna hindi ŋgoo miɗ mamma, nam hin paɗ ki kolo iiriya.»

³² Suu haɗi mamma hum u boy namma kaɗi, asi li ndaana ay a joɓomba lay.

Ma ŋgolna ni gege?

³³ Asi mba Kapernaum. Yesu kal hu zira, joɓ suu haɗi mamsina ana, «Agi li cagi wayra ay voɗ ni kay boy maarnage?»

³⁴ Asi dam ka dukgi, seŋ tasi yerek yerek, asi ciwayra ay duk tasi ana sa ma ŋgol su ndarayammana ni gege.

³⁵ Yesu kak kaŋga nje ni, yi suu mam suu doogo yam mbana egemu, dasi ana, «Lini sana min a mbuɗ ma fokŋa ni, nam mbuɗ tam ki ŋgorogi a gogoo ma sunugina bel.»

³⁶ Nam di na di ni, tli gogoona, colom fokosiya. Nam vam hurumu dasi ana,

³⁷ «Sa vi gogoona varam ko wanna na u senna, nam van varammi anu. Sa ma van varamma, van ni ka an holɗi, vi ni sa ma sunun ayna lay.»

Sa ma hurum ka egey coɗi na, ni saaygina

³⁸ Jaŋ di Yesu ana, «Malaŋ Haɗta, ami wi sa dew dik ful ma cona ki u seŋu, ami hal a doorom gini, kay nam ka sa dukuygiɗi.»

³⁹ Yesu dasi ana, «Doorombi. Sa ma li dlara mbuɗta u senna, ka ndak a di va ma co kan zakgi.

⁴⁰ Sa ma hurum ka egeygi coɗi na, ni saaygina.

⁴¹ Gasagi an dagiya, sa ɦagi yo ma cira ana agi ni suu vi Kristunaɗi su na, warakka vi sa namma ka ba kiɗi.»

Dlara kal sana hu cora

⁴² «Sa ma ganyam gogoo ma vi hurum kanna, tinim hu corana, mariyaɗ ni a njunum ɦinira kelem namu, gam ki duk lumma.

⁴³ Koŋ li tiniŋ hu cora ni namu ni, aŋ kaam kiyo. Mariyaɗ ni aŋ kal hu iirira ka daɓ kiɗira u koŋ ma dewna, su mayra aŋ tuɗ duk kura ka miɗɗira u koŋ ma jakŋa. [

⁴⁴ Hu li namma njuful ma ti suuna ka miɗɗi, kura ka miɗɗi lay.]

⁴⁵ Seŋ li tiniŋ hu cora ni namu ni, kaam kiyo. Mariyaɗ ni aŋ kal hu iirira ka daɓ kiɗira u seŋ ma dalina, su mayra aŋ tuɗ duk kura u nam jakka. [

⁴⁶ Hu li namma njuful ma ti suuna ka miɗɗi, kura ka miɗɗi lay.]

⁴⁷ Iriŋ li tiniŋ hu cora ni ndaɗu ni, holoɗoɗ kiyo. Mariyaɗ ni aŋ kal hu Mul Lonara u iriŋ dew, su mayra aŋ kal duk kura u ndaɗ jakka.

⁴⁸ Hu li namma njuful ma ti suuna ka miɗɗi, kura ka miɗɗi lay.

⁴⁹ Kura mba ndak ki kay suuna halaŋ, ko vuvuna ndak duk mbalara na.

⁵⁰ «Vuvuna ni va ma jivina. Lini yulum mamba ɓeŋ ki wa ni, agi hin mbuɗum yulumba ni u me olo ge? Lagi ko vuvuna na, lakagi u heɓpa duk tagiya.»