Magaara JUD Ɓiiriɗta 1 - Boy Lonana

Gi deɓpa

¹ Ni an Jud, sa ma sun Yesu Kristuna, ma wayaŋ Jakŋa, An ɓiirigi magaara ha ni magi agi suu Lona yagina, minigi may, nam cukugi kini maŋ Yesu Kristu.

² Ko Lona ɦagi vaɗ huuna, heɓpa, u minda cocoo.

Suu co suu haɗ haɗta cora

³ Banayanna an hurun haɗ ana bay ɓiirigi magaara ha kay boy ma Lona suɗuygi ki halaŋŋa baɗi, Lona ɦeɓen a ɓiirigi magaa ndaɗta kay a njunugi a duu kay vira Lona ɦaɗ maŋ suu mamsina yam dew ni a fafatɗara.

⁴ Suu li dla cora ka dlaɓ tasi dukuygi ŋgaya, asi ka gun boy dla oora vi Looygina ki kay a jiv dlaasira cora kiyo. Asi noy Yesu Kristu Bu Suuna, Malay ma Suɗta dewna kiyo. Magaara vi Lona di ki kay ɓakŋa vi Lona ki kaay kasini jew day.

⁵ Agi wagi u dla ndaɗta ki vagi jivi lay ni, an gagi humugi ha ni kay dlara Lona suɗ suu Israelna ay ki hu mbassa Egiptera, suu tin hurusi ay ka kambina nam hin baasi ki may.

⁶ Saaragi kay suu sunda huulona suu hurusi li ayra ka kay ŋgol masira ɦasirara ɗina. Asi noy liisi ma asi ay huna kiyo. Nam ɓalasi kaŋga u kinjiŋŋa, hu li ma ndufun girmindiŋŋa gak gak asi juɓ buu ma ŋgol ma kaɓakŋa.

⁷ Saaragi kay Sodom u Gomor u mbassa ŋguy kasira halaŋ, suu huna li dlara yowna, njufina mbuɗ buu u ndarayasi njufina ko suu sunda huulona asina naa. Lona hin ŋgalasi ki halaŋ u kura ka daɓ kiɗira, ɓak ma kaasina kasina ndak ne yam suuna halaŋ.

⁸ Ko ndaɗta na lay ni, suu asina hurusi ma cona mbaɗasi vunusiya, dira doyra dasira taɗasi a li dlara yowna eg tasiya, asi noy garaŋga vi Lona ki lay, pan suu ŋgolo suu huulonna lay.

⁹ Ni Misel ma ŋgol suu sunda huulona li ka naɗi lay. Hu li ma nam ciwayra ko tam u Satanna kay maɗ Moizza ni nam di va ma co ka eg Satannaɗi, hin dam ɦawa ana, «Ko Bu Suuna hin gaɗaŋu.»

¹⁰ Suu asina ŋgul tlesuu asi ka wasi usi ɗina, ni li giniŋga ko mburina na. Giniŋ masi ndaɗta baasi ki ni baay na ɗow ɗow.

¹¹ Hahawra kasiya, kay asi tli voɗta vi Kainda. Asi viɗ tasi ki u lem gursura, ko Balaam lira na may. Olo ni asi ba kini kayra asi yow kolo duuna ko Kore nara.

¹² Asi mba dukugi a ti ti ma wayara u agi ni ganagi yagi ni ganiya. Asi luu luu masina bay zolona, saa ni kay tasira doy hol, asi ni ko ɗugulla semeɗna valawaɗ ki bay si yonara na. Asi ni ko guguni suu ka vuɗɗina na, lini hu tilisi ma vuɗta lay ni asi ki ni ɦawaa, ko guguni suu paɗ ki kolo u sariyasi bel bel ki miɗina na.

¹³ Asi tli tasi ni u bil yona ka hu lum ŋgolna na, asi li dlara zolona ko kuffa na, asi ni ko ciciwra li ma ndaɗ col huna kaɗira na, Lona cukusi hu li ma ndufun girmindiŋŋa a fafatɗa.

¹⁴ Henok ma hu njafna vi Adam a kiɗisiyana di ki kasi hu boy ma jok vun Lona mamma jew day anaba, «Humugiya Bu Suuna ka mbay u suu mam suu sunda huulona suu teteɗna va ma bup bup ŋgolo.

¹⁵ Kay a kaɓakŋa kay suuna halaŋ, ɓakŋa hin mba vi suu may suu li dla cora kay dlaasira asi laɗta halaŋ, duu tasi u Lonara, ŋgulla asi ŋgulumba u boy co ma asi damma kamma halaŋ.»

¹⁶ Suu asina tew tewni ka tii tasiya furi masira kaɗi, asi lini dlara u min masira, halni ŋga tara mbaɗ ii suuna kay a fi tlena kosiya.

Neegi tagi kay dlara ha fokka

¹⁷ Banayanna agi saaragi kay boy ma suu vovoɗta vi Bu Suuna mayna Yesu Kristu dam ay fok jewna.

¹⁸ Ana, «Buu ma daganna wanni suuna hin mba ŋgulugiya, asi hin lini dla cora u min masira.»

¹⁹ Asi ni suu li dlara ɓorow duk ɦoŋ suuna kira. Asi li dlaasira ni u min masira kay tasiya ka ura vi Musuk Lonaraɗi.

²⁰ Agi banayanna tuɗugi fok u viigi ta teteɗta, cenegi u saɓakŋa vi Musuk Lonara.

²¹ Lakagi hu minda Lona minigira, juɓ Bu Suuna mayna Yesu Kristu u jivi mamba mba ɦagi iiri mayra ka daɓ kiɗira.

²² Njun u suu hurusi ciwayra hurusina

²³ suɗusi ay ki duk kura. Wihahaw suu hiŋŋa lay, wasi hahawasi ni dlaɓi u ndaana, baraw masi ma zoɗi u corana ni agi ŋgenembi lay.

Ŋgolla maŋ Lona

²⁴ Nam sa ma ka gologi hu dlara fagira halaŋŋa, agi hin mba lak fokom bay cora hu ŋgol mamba u furira din din.

²⁵ Ni maŋ Lona hol Saay ma Suɗta, Bu Suuna Yesu Kristu, ŋgolla u ŋgolla, bibiŋilla u saɓakŋa u eŋga, gijaŋŋa ay jewra day cecemmi lay, ha fokka lay gak gak a fafatɗa, Amin.