Magaara JAK Ɓiiriɗta 5 - Boy Lonana

Boyna kay suu ɦizina

¹ Humugi boy manna haa agi suu ɦizina, tiirigiya, yoorogi tagiya, kay hahaw mayra hin a mbay kagira.

² Bege magira cim ki wa, baraw magina toɓora tam ki wa.

³ Lor magira u gursu magira ti ki tumusna wa, tumus ma namma dagi kini yagiya, nam hin ŋgalagi tliwigi kini ko kura na, agi tokogi begera kogi hu buu ma daɓ dagan cecemina wa.

⁴ Suu li sunda hu sene magina agi min ka warakasi sunusi kiɗi. Agi humugi sek masira haa, suu feɗegi waagina vona tii masina kal hum Lona, Bu Suuna ma Saɓakŋa Kom Belna wa.

⁵ Hu ndaŋgara tani agi kaki hu li ma jivina u furira. Agi vagi tagi mbulna ni kay juɓ buu ma ŋgaɗta.

⁶ Agi vagi suu ɗegeena casi kiyo, asi ŋgafagi ka u yaɗi.

Lalamba u cenda

⁷ Gorsenna ɗiligi irigi u lalamba na ɗil gak gak falira Bu Suuna hin mbara. Gologiya sa ma horokŋa ka ɗigil irim kay juɓ tlesuu ndaŋgara neesina. Nam irim na ɗil gak gak juɓ lo ma si jewna u ma si daganna lay.

⁸ Ɗiligi irigi ɗil, soogi hurugiya, Bu Suuna hin tok a mbayra.

⁹ Gorsenna haɗagi hurugi eg tagiɗi, kay a Lona mba kaagi ɓakŋa kagiɗi, sa ma kaɓakŋa hin tok a kal ayra.

¹⁰ Gorsenna saaragi suu jok vun Lona suu di kay sem Bu Suunana. Lagi ko asi na may u lalamba ɗegeera kay a lak hu wihawra.

¹¹ Ami di kasi ana furira ka kasi ŋgolo kay asi col ay saɓaki. Agi humugi kay lalamba vi Job ana mege, agi wi dlara Bu Suuna hin ɦamba ŋgoo daganda ni nanage? Bu Suuna ni sa ma hurum jivina wi hahaw suu mamsina lay.

¹² Gorsenna suurugi tagiɗi, suu tagi u huulonaɗi lay, u ndaŋgaraɗi lay, suu u va ma daŋgi lay. Di ɦawa ana ni na. Ni na daŋ may. Li kaɗi ni, kaɗi may. Kay a ɓakŋa vi Lona vagiɗi.

¹³ Sa maa dukugi ka wihaw su? Nam joɓ Lona. Sa maa dukugi ma furi ka su? Nam gi soolla geleɗ Lona.

¹⁴ Dukugi ni sa ma tuguɗi ka su? Nam yi suu ŋgolo suu gol suu vina egemu, asi lam mbulna kam li ni cen kam u sem Bu Suuna.

¹⁵ Cen mayra vi huruŋ gasira suɗ sa ma tuguɗira kiyo, Bu Suuna hin garaɗam kiyo, cora nam laɗta lay ni hin daɓamba kiyo.

¹⁶ Dagi coogira ki duk tagiya, cenegi kay tagiya tagiya kay agi mba garaɗ kiyo. Cenda vi sa ma ɗegeena hurum toki kaɗ dewna, saɓakaɗ ka cocoo.

¹⁷ Eli ni sana ko aygi na may. Nam cen Lona u hurum toki na dew ana lona siɗi li basara hindi u tilna kayam karkiya, lo si kay ndaŋgaraɗi.

¹⁸ Ŋgoo dagani nam cen Lona olo hu li namma lona siya, tlena li kay ndaŋgara coco lay.

¹⁹ Gorsenna lini sa maa dukugi mbuɗ ki wa day eg gasira ni ndaramma tayam aya.

²⁰ Saaragi kay boy may ma di ana, sa ma tay sa cona ay ki hu voɗ mamba corana, ni nam suɗ iirira vi sa ma co namma ki hu miɗna wa. Ni coomba ŋgol cocora, hin bulum kiyo.