Magaara JAK Ɓiiriɗta 4 - Boy Lonana

Galamba u Duliyara

¹ Ciwayra u honira mbay dukugi ni arage? Asi mbay ni u minda cora, asi duu tasi tew tew huruygira.

² Agi ŋgiziɗ tlena ka fasiɗi, kay agi halni a ci maɗna, hurugi haɗ kay va agi ka ndak a fambina, kay agi ka li honira, ciwayra duk tagi lay. Agi ka fi va ma agi minimmaɗi kay agi ka joɓ Lona kambi.

³ Lini agi joɓa ka fi va ma agi joɓ kammaɗi ni kay saa magira cora, tlesuu agi joɓ kasina min a lasi ni u min magira kay tagira.

⁴ Agi suu ka ɗegeeɗina li galamba u duliyara ni sa ma gonokka u Lonnaɗi su? Sa ma li galamba u duliyara ni sa ma gonokka u Lonna.

⁵ Saaragi ana magaara dini ɦawaa naɗi, ŋgussa Lona ɦaɗ huu sanara, nam miniɗ cocoo.

⁶ Ni kay ndaɗta Lona ɦaygi jivira ŋgolla su hu olo, magara di ana suu ŋga tasina Lona minisiɗi, suu lalamma nam ɦasi oo mamba may.

⁷ Hoŋogi yagi kaŋga fok Lona, noyogi Satanna kiyo, nam hin pii hinigiya.

⁸ Ҥuɗugi tagi eg Lona tok nam hin ɦuɗ ay egegi tok may. Agi suu cona, mbusugi kogi kiyo, lagi hurugi ki jivi teteɗ agi suu hurugi mbambana.

⁹ Lagi hahawra, tiirigiya, yoorogi tagiya, mbuɗugi san magira ki tiina, furi magira jok ki yoora may.

¹⁰ Hoŋogi yagi kaŋga fok Bu Suuna nam hin yowogi koloo.

Kaɓakŋa kay wayaŋŋaɗi

¹¹ Gorsenna di boy ma co duk tagiɗi, sa ma di boy cona eg wayamma kaam ɓakŋa kam layna nam di boy cona u kaɓakŋa ni kay gaɗta. Lini aŋ kaɓakŋa kay gaɗta ni aŋŋi sa ma hum uɗna oloɗi ni sa ma kaaɗ ɓakŋa kaɗna.

¹² Lona dew ɦal gaɗta ni nam lay, kaɓakŋa ni nam lay. Nam dew ndak a suɗ sana ki ni nam lay baam ki ni nam lay. Aŋ sa ma kaɓakŋa kay ndaraŋŋa aŋŋi ge may ɗaŋge?

Ŋga taŋgi

¹³ Humugi boy namma haa, agi suu di ana, «Karam ɗowba vin maɗii ni ami tuɗumi hu ɦoŋzi ma ŋgolna, ami lami basara hu ɦoŋzi namma dew a lami paara kay a fi gursura.»

¹⁴ Vin maɗii ni iiri magira hin li ana mege agi ka wiɗi lay, agi ni ko kuɗ ma gi na ew kak njokŋi nam ka oloɗina na.

¹⁵ Gologiya dlara agi a daɗ gasira ni anaba, «Lini Bu Suuna min wa ana ami kak iiriya ni ami hin li va hiŋŋa may, li va wanna may.»

¹⁶ Cecemi agi ŋga tagi ni ŋgaaya tlagi yagi kolo lay, ŋga ta mayra ko ndaɗta nara ni coo.

¹⁷ Lini sana wi kay a li jivira hin ka laɗɗi ni nam mbuɗ tam ki sa ma cona wa.