Magaara JAK Ɓiiriɗta 3 - Boy Lonana

Sinda

¹ Gorsenna, zulugi tagi ki a suu haɗ suuna belɗi. Agi wi anaba ami suu haɗ suuna hin fi ɓakŋa ni co su suu daŋŋa.

² Aygi halaŋ laygi cora tew tew, u njafaɗ zeɗ zeɗ. Lini sana boy ma nam damma halaŋ ka fi co hurumbi ni nammi sa ma ɗegeena ndaki a doo tam kay dlara halaŋ.

³ Aygi cukuygi njamara fun kulumina ni ana asi hum uygiya naɗi su? Aygi ndak a pereɗesi tasi halaŋŋi u ndaɗu.

⁴ Agi saaragi u lum kawina gige. Nam mam ŋgol coco lay ni, semeɗna zuɗumu, sa ma jaŋamma li min a tuɗ aragelay ni pereɗem zew ma njewem goo ew daŋŋa.

⁵ Sinda duk mbalatara ni va goo ko ndaɗta na may na ndaɗ ndak di boy ma ŋgal tara u tlena ŋgolo. Saaragi gige lamba ŋgolla kura goo ew daŋga ŋgalaɗ ki halaŋ.

⁶ Sinda ni ko kura na. Ndaɗ ni duliyara cora ka duk mbalataygira. Ndaɗ ɓeŋeygi tliwiygi ki halaŋ u cora. Ndaɗ tum kura huruygiya. Ku ndaɗta col ay ni hu ku mayra ka daɓ kiɗira gaw.

⁷ Sana ndaki kay a ɦeɓ njaf tlena halaŋ ko tlesuu ŋgoo bagina layagina, tlesuu ɦaram kaŋgana, kulufna halaŋ nam ɦeɓesiya.

⁸ Sa warna ka ndak a ɦeɓ sindaɗi, co ndaɗta wanni sa ka ndak a doo tam kaɗɗi, ndaɗ oyra ni u tlesuu ci maɗna.

⁹ Aygi gi deɓ Bu Suuna Buygi ni u ndaɗu, gi vunna maŋ suu Lona minisi ko tamba nana ni u ndaɗ lay.

¹⁰ Boy ma gideɓpa u boy ma givunna halaŋ kal ay ki ni hu vun ma dewna. Gorsenna dla ndaɗta wanni ka a li naɗi.

¹¹ Yo ma jivina u yo ma galakŋa ndak law ay ki kolo hu goloŋga dewra su?

¹² Gorsenna, gu tulumma ka ndak a vuɗ vuɗ conoraɗi, gugutlura ka vuɗ vuɗ tulummaɗi may, goloŋga galakka ka law yo ma jivinaɗi lay.

Ne mayra col ay kolora

¹³ Na ni sa ma yalna u nera kom lay ka dukugi su? Nam takasi ki u poy mamba jivira, u sun mamba nam laɗta, u ɗigilla, u neemba gige.

¹⁴ Lini honira galaara u ciwayra ka hurugiya ni ŋga tagiɗi, kaboy eg gasiraɗi lay.

¹⁵ Nera ndaɗta wanni mbay ka kolo dayɗi, ndaɗta col ay ni duk duliyara u saara vi sana, mbay ni vi maɗna.

¹⁶ Li ma honira u saara ciwayra ka huna, ni dlara dadamba u njaf cora halaŋ ka hu may.

¹⁷ Ne mayra col ay kolo dayra va co ka egeɗɗi. Ndaɗ mba heɓpa, jivira, oora u jivira huruɗta, hin tak sunda jivira may. Ɓorow iira u mbambara kaɗi.

¹⁸ Suu min heɓpa egesina zaa ni heɓpa may. Va ma asi hin a famma ni iiri mayra ɗegeera.