Magaara JAK Ɓiiriɗta 1 - Boy Lonana

Gi deɓpa

¹ Ni an, Jak, sa ma sun Lona u Bu Suuna Yesu Kristuna. An gi deɓpa maŋ njaf suu doogo yam mba suu vi Lona suu njay ki kay ndaŋgara bel belna.

Tin huuna u nera

² Gorsenna, njaf ndemba fagi zeɗ zeɗta agi ŋgaɓaɗ ni ko furira na ɗow.

³ Lini agi wi ana viigira ka mbuɗ maŋi ko ndembaɗi ni, ndaɗ hin zul fokŋi u lalamba.

⁴ Gologi jiviya kay lalam magi ndaɗta mba tak dlara jivira ki cocoo, kay agi mba kaɗak ki hu vaɗi.

⁵ Lini sa maa dukugi neemba kaɗi ni nam joɓ Lona kaɗu, nam hin ɦamba. Lona ɦal tlena maŋ suuna halaŋŋi u min mamba jivira.

⁶ Nam joɓmi u hurum tini kayami ciway huɗi, kay sa ma ciwayra ni ko bil mbo lum ma ŋgolna kara na, ko semeɗna tlam kolo jokom um zeɗ zeɗta na.

⁷ Sa ma ko ndaɗta nana saa ana nam hin fi va ko Bu Suuna naɗi.

⁸ Nammi sa ma hurum ɓorowi ki mbamba hu poy mambana.

Hawra u ɦizza

⁹ Wayagi ma hawra geleɗ Lona kay wulla Lona wulumba.

¹⁰ Wayagi ma ɦizina Lona hoŋom yam kaŋga may, kay mege ɦizza hin jak ki ni ko ɓo tlena ɦawa na.

¹¹ Fatɗa col kolo u tiiɗta nduh nduhra so gu namma kiyo, ɓoom yak ki kaŋga wani jivi mamba ka oloɗi. Sa ma ɦizina hin viɗ ki duk dlaamba ni na may.

Tukka u ndemba

¹² Furira ka kay sa ma kak ɗili hu tuk mambana, kay ŋgoo tukka dagani nam hin fi jumba mulla vi iirira, ni va ma Lona vi vunum kam a ɦam maŋ suu minimma.

¹³ Sa ma ndemba ndememma di ana, «Lona ndemenni namu,» naɗi, kay mege Lona ka ndem saɗi, dla cora ka ndemembi may.

¹⁴ Ndemba ndem sana ni saa mamba cora tuɗum hu ni ndaɗu.

¹⁵ Ŋgoo dagani saara cora vi wiina vuɗ sulukŋa, sulukŋa wul wa ni hin vuɗni miɗna may.

¹⁶ Gorsen suu an minigina ganagi yam tagiɗi.

¹⁷ Ҥala ɦawara jivira halaŋ u ɦala pasiyakka col ay ni koloo, ɦaɗ ay ni Lona, nam sa ma li kiɗikka kolora. Lona ka mbuɗɗi. Nam ka jok ndufunda ha fok na ɗowɗi.

¹⁸ U min mamba nam ɦaygi iirira u boy ma gasina, kay tlesuu nam lasi halaŋŋa aygi mba li suusiya.

Hum hummi li uwa

¹⁹ Gorsen suu an minigina saaragi kay boy ma wanna, gegelay ni hum zak, di zakgi, li ya zakgi lay.

²⁰ Kay mege sa ma yara ka li va ma ɗegee ii Lonaɗi.

²¹ Ni kay ndaɗta cukugi tlesuu njenjena u sunda cora kiyo, vi boy ma ɗilina vi Lona ma nam pagina hurugina eŋe, kay nam ndak a suɗugi kini namu.

²² Ganyam tagi u humba hum Boy Lonana u furira ɦawaɗi, li ummi lii na ɗow.

²³ Kay sa hum boyna ka li umbina, nammi ko sa ma gol tam hu kotoromma wi tam ana nammi nana.

²⁴ Nam gol tam wa commi, ŋgoo dagan humum maa ki kay tammi na zak gaw.

²⁵ Sa ma saa kay gaɗta ɗegee ta buɗuygi kira vi boy namma hurum gasi, ka humum u furira kay a hin maaram ki ɦawaɗi. Li umu, sa namma Lona hin paɗ vunum ki kay sun mamba.

²⁶ Lini sana vi u va wa ka doo sinimba di boynaɗi ni nam ganyam tammi ganiya. Va nam vi umma ki ni ɦawaa.

²⁷ Vira gasi u voɗoɗta, ta Lona Buna goloɗ ko bay cora egeɗta na, ni gol gor suu kuyuna u boyogi suu donona hu wihaw masira jiviya, gol tam jivi ko dlara hu duliyara ka mbuɗ tam njenjeɗi may.