KALKIRA 40 - Boy Lonana

Voɗta kay a pi mbutluɓma ki koloo, lam ki teteɗ may

¹ Yawe di Moiz ana:

² «Hu til ma jewna, hu buu ma dewna ni aŋ pi mbutluɓma ki koloo, ni li ma agi ŋgaf tagi huna.

³ Aŋ tin Zandukka Galamba huwa, aŋ tiniɗ ha ki ŋgoo baraw ma caki dukŋa daganna.

⁴ Aŋ tli tabulla tiniɗ hu liiɗ u tlegeyeɗ suu kaɗna halaŋ. Aŋ tli pindilla ha kalafiya, tin kura hu may.

⁵ Aŋ tin givin ma togolla ma ŋgal mbul ma his jivina fok Zandukka Galamba na tok. Aŋ njun gojolina ki fun vun mbutluɓ ma kal ha kalafina.

⁶ Aŋ tin givin ma togolla eg vun ma kal ha kalafi hu mbutluɓmana na tok.

⁷ Aŋ tin tassa ŋgol ma mbussa duk ɦoŋ givin ma togolla u mbutluɓma na gay. Aŋ voom mbona hurum may.

⁸ Aŋ pi nduŋga ay ŋguy kay mbutluɓmara, cak gojolina ay vun grekŋa may.

⁹ Aŋ tli mbul ma fuura fuu mbutluɓma u tlesuu kurufu hurumma halaŋ, aŋ lasi ki teteɗ u tlesuu li sunda huna halaŋ halaŋ. Asi hin ki ni teteɗ.

¹⁰ Aŋ fuu givin ma togolla u tlesuu li sunda huna halaŋ. Aŋ lasi ki teteɗ, asi hin ki ni teteɗ may.

¹¹ Aŋ fuu tassa ŋgolna u va ma nam tini kamma lay, aŋ lasi ki teteɗ.

¹² Aŋ tak Aaron u goryom ki fun mbutluɓ ma suuna tok huna. Aŋ mbususi ki u yona.

¹³ Aŋ cuk baraw ma teteɗna ta Aaron, fuurumu, aŋ mbuɗum ki teteɗ a nam li sunda lan ɓivunna.

¹⁴ Ŋgoo dagan aŋ takam goryomu, cukusi baraw ma njibirna ma li sunda hu mbutluɓmana tasiya,

¹⁵ aŋ fuurusi ki ko ndal busi na may, kay a asi li sunda lan ɓivunna. Fuura aŋ fuurusira ɦasi ni sunda a fafaɗta ha ni hu basara basara na gak gak.»

Moiz pi mbutluɓma ki koloo

¹⁶ Moiz gijaŋ sunda ni na gaw, nam li ni ko ndal Yawe damba na may.

¹⁷ Ni hu til ma jewna hu basara mbara, hu buu ma dewna may. Mbutluɓma min ki ni na gaw.

¹⁸ Moiz pi mbutluɓma, nam njaa kawi ma col guna kamma pi nduŋga huwa, min zulla kal tokolora hura col mbutluɓma ki koloo.

¹⁹ Ŋgoo dagan nam baa baraw ma ŋgolna ay kamu, hin kuluɓ baraw ma baaram yamma ay kayam hu olo ko ndal Yawe di Moizza na.

²⁰ Nam yow ɦini mayra gaɗta ɓiiri kaɗta cukuɗ hu Zandukka kalaɗ tokolora keŋeɗu, dug vun Zandukka hu may.

²¹ Nam kal Zandukka ha kalafi hu mbutluɓma, cak ii Zandukka ha ki u baraw ma ŋgolna ko ndal Yawe di Moizza na.

²² Nam tin tabulla kalafi hu mbutluɓma keŋ ma ii mbayawna na, ki ni ii bunsu ŋgoo baraw ma caki kurufuna.

²³ Nam njaa funa kayam fok Yawe, ko Yawe di Moizza na.

²⁴ Nam tin pindilla kalafi hu mbutluɓma vok taɗ u tabulla na keŋ ma hiŋŋa ii dali na.

²⁵ Nam tin ku pindilla fok Yawe, ko Yawe di Moizza na.

²⁶ Nam tin givin ma togolla ta yoori u lorra hu mbutluɓma vok baraw ma caki dukŋa na gay.

²⁷ Nam ɗus mbul ma his jivina huwa ko Yawe di Moizza na.

²⁸ Nam cak gojolina fun vun ma kal kalafi hu mbutluɓmana.

²⁹ Nam tin givin ma togolla fun vun mbutluɓma na ni ŋgaɗ ɓivun ma ŋgal kina u ɓivun ma njaf wana huwa ko Yawe di Moizza na.

³⁰ Nam tin tassa ma mbussa duk ɦoŋ givin ma togolla u mbutluɓma na, vo yona hu a mbussa may.

³¹ Moiz may, Aaron u goryom may, mbus kosi huwa, mbus sesi ki may.

³² Hu li ma asi a cuk kalafi hu mbutluɓma, ɗowba a tuɗ fun givin ma togolla ni, asi mbus kiyo, ko Yawe di Moizza na.

³³ Nam gi kaana ay ki kay mbutluɓma, cak gojolina ay ki vun grekŋa may. Moiz daɓ sunda ki halaŋ ko ndaɗta na.

Bibiŋil Yawera oy ki hu mbutluɓma

³⁴ Ɗugulla kuluɓ ki kay mbutluɓma, bibiŋil Yawe oy ki kalafi hu mbutluɓma.

³⁵ Moiz ka ndak a kal kalafi hu mbutluɓmaɗi, kay ana ɗugulla ka kayami, bibiŋil Yawe ki oy kalafi huwa.

³⁶ Suu Israelna a jok usira ni hu li ma asi wi ɗugulla ka ki kolona tuwa.

³⁷ May lini ɗugulla ka kay mbutluɓma tuwa ni asi ka jok usiɗi, ta ta hu buu ma ndaɗ ka kina tuwa.

³⁸ Kay faali halaŋŋi ɗugulla vi Yawera ka kolo kasiya, njeŋge ni ɗugul ndaɗta mbuɗ kasi a kura wi lina. Ku ndaɗta ha kini kay suu Israelna halaŋ, ha hu li ma asi jok huna halaŋ lay.