KALKIRA 37 - Boy Lonana

Tlesuu kalafi hu mbutluɓmana, Zandukka tabulla, pindilla, li ma ŋgal mbul ma hisna.

¹ Ŋgoo dagan Betsaleel ceɗ Zandukka ni u gu akasiyana, fiyekeɗ meter dew u nus ew, hayaɗ nus meterra may, wuluɗ ma kolona nus meter dew may.

² Nam hooroɗ taɗ ki u lorra, kurufu lay, ii ŋgoo lay. Nam gaɗ vunuɗ ki ŋgoŋ ŋgoŋŋa u lorra may.

³ Nam cooɗ ŋgil walakka keŋeɗ fiɗi halaŋ, keŋ hiŋŋa mba' may, mba' may.

⁴ Nam ka tokolo gu akasiyana, hooroɗ taɗ ki u lorra.

⁵ Kal tokolo ndaɗta hu ŋgil walakka nam cooɗ keŋ Zandukkara, keŋ hiŋŋa dew may dew may a tli Zandukka kolora.

⁶ Ŋgoo dagan nam min vun Zandukka u lorra sasak, fiyekeɗ ni meter dew u nus, hayaɗ ni nus meterra may.

⁷ Nam min Serubimma mba' u lorra kakasi ay kay vun Zandukka, ay keŋ hiŋŋa dew may, dew may ŋgafasi vogosi ko tasiya.

⁸ Serubim ha kaki hu keŋ hiŋŋa dew may, ma mbana ay kaki keŋ ma hiŋŋa may. Nam li Serubimgina ni u ɓalaŋ ma dewna fun tasi dew.

⁹ Serubimgina yow garaŋasi ki kolo a baa yam vun Zandukka kira, vogosi ŋgafi ko tasiya, gol irisi ni ga kay vun Zandukka.

Tabulla cuk funa kaɗ maŋ Lonara

¹⁰ Ŋgoo dagan nam ceɗ tabulla u gu akasiyana, fiyekeɗ ni meter dew, hayaɗ ni nus meterra may, wuluɗ ma kolona ni nus meter dew may.

¹¹ Nam hooroɗ taɗ ki u lorra halaŋ, gaɗ vunuɗ ki ŋgoŋ ŋgoŋŋa u lorra may.

¹² Nam ndalaɗ vunuɗ ki u vana ko hum manawra na ŋguyum ki fun tabulla halaŋ, gi ŋgoŋ ŋgoŋ lorra ay ki ŋgoo va namma may.

¹³ Nam co zul walakka payaɗ fiɗi halaŋ, u seɗ ma tini gana halaŋ, nam li zul ndaɗta kini u lorra ki ni u sem tabulla fiɗi halaŋ.

¹⁴ Eg keŋ vun tabulla na tokŋi, nam kal walakka kal tokolora hu a tli tabulla kolora huwa.

¹⁵ Nam ka a tokolora ni gu akasiyana hooroɗ taɗ ki u lorra kay a tli tabulla u ndaɗta.

¹⁶ Tlesuu li sunda kay tabulla halaŋ nam lasi ni u lorra, asetna, koɓma u tlesuu daŋŋa halaŋ u tlesuu vo ɓivun u va ma cira u asina halaŋ.

Va ma tin pindilla kamma kom kiɗisiya

¹⁷ Nam yoo gu pindilla ni u lorra taɗta, uɗ ay ga dew gogor koɗ zeɗ zeɗ, liiɗ ma vo mbulna ii li ma tin kura ay ko tasi dew.

¹⁸ Gogor koɗ ma keŋŋa ni karkiya, keŋ hiŋŋa hindi may, keŋ hiŋŋa ni hindi may.

¹⁹ Koɗ ma dewna ni gor tassagina ka hu hindi hindi u vunusi ma duga huwa, kay ko ma hiŋŋa ni hindi na olo. Gogor koɗ ma karkiyana halaŋ ki ni na bel bel.

²⁰ Koɗ ma duk gayrana tassana hu ni fiɗi u vunusi ma duga hu lay.

²¹ Koɗ ma ay jew mbana vunuɗ ma malla ni dew, suu hiŋŋa mba' olo ni vunusi ma malla ay ni dew olo, gogor koɗ ma dagan mbana vunusi ni na lay. Gogor koɗ ma karkiyana halaŋ zulusi ni na.

²² Zuluɗ u vunuɗ ma malla halaŋ ay taɓi ni ko tasi dew, yoorosi halaŋŋi u ɓalaŋ ma dewna, ni u lorra halaŋ.

²³ Pindilla taɓ halaŋŋi kiɗisiya, tassa ma vo mbulna u li ma tin kura halaŋ yoori ni u lorra.

²⁴ Lor mayra nam li sunda hu mbutluɓma u ndaɗta halaŋŋi ii kelew 34 ko ŋga mayra di kaɗ hu mbutluɓmara na.

Min li ma ŋgal mbul ma hisna

²⁵ Ŋgoo dagan nam ceɗ givin ma togolla ma ŋgal mbul ma his jivina ni u gu akasiyana. Keŋem halaŋŋi fun tam dew, keŋ ma dewna ŋga nus meter dew, wulumba kolora ni meter dew may, keŋem halaŋ ay tli kolo fun tam dew. Mekem taɓi ko tam may.

²⁶ Nam hoorom tam ki u lorra keŋemu, kam kolo u mekem halaŋ, nam ŋguyum yam ki u ŋgoŋ ŋgoŋ lorra na cutl.

²⁷ U ŋgoŋ ŋgoŋŋa ga ni nam kal walak lorra huwa, hu keŋem jak halaŋ, ni kay a kal tokolora tlam kolora hura.

²⁸ Nam ka tokolo gu akasiyana, hooroɗ taɗ ki u lorra may.

²⁹ Nam yoo mbul ma teteɗ ma fuura u mbul ma ŋgalam hu givin ma togolla, ni sunda vi sa ma yoo mbul ma hisna.