KALKIRA 36 - Boy Lonana

¹ «Betsaleel, Oholiyab u yal ma Yawe ɦammana, gegelay u mbeleŋ mamma wi yal sunda nam laɗta suu asina halaŋ li sunda Yawe dasi kaɗ ana laɗura.»

Moiz di suuna ana asi ɦal va ay oloɗi

² Moiz yi gi Betsaleel, Oholiyab u suu Yawe oyosi u yal mammana ay halaŋ, suu hurusi vi a li sundana halaŋ.

³ Moiz ɦasi tle may suu suu Israelna taarasi ay a min mbutluɓmana halaŋ a asi li sundara. Hu li ma suuna ka ɦam ay na olo olo na,

⁴ suu yalna suu ka yoo tlesuu sunda zeɗ zeɗna hin sun masira halaŋ,

⁵ tuɗ di Moiz ana, «Suuna ɦal tlena ay saɓaki, su ki kay di mayra Yawe daɗ a min mbutluɓmara.»

⁶ Moiz ɦal gaɗta ha ki hu kaŋŋa halaŋ ana, «Njufiina u boyogina sa ɦal va ay kay sunda min mbutluɓma oloɗi.» Suuna hin kak ɦalla may.

⁷ Tlesuu taarasina ndak ki kay a li sunda halaŋ su ki lay.

Li ma teteɗ ma Lona kak huna.

⁸ Suu li sunda suu yal cocona, cil baraw dlemba doɓorok cocora iriɗ zeɗ zeɗ doogo u baraw mayra dereŋ cocora, ma tam tlawna u ma wili wilina u ma tlaw keŋ keŋŋa, asi cil Serubim egem hu may.

⁹ Fiyek baraw ma dewna ni meter doogo yam fiɗi, hayammi meter mba' may, fam fiyekem halaŋŋi fun tam dew dew.

¹⁰ Asi taɓ baraw maa vadl ko tam may taɓ ma vadl hiŋŋa ko tam may.

¹¹ Asi cil baraw ma wili wilina ki fun baraw ma fok jewna, cilim ki kay vunumba ŋgaffa halaŋ. Asi li vun ma daɓ ha ki daganna ni na may hu vun ma mbana may.

¹² Baraw ma dewna asi cilim zew ma daŋŋa egem na dok-vadl. Cil fun ma daganna a mbara ni dok-vadl may. Barawna vunum jaki ni fun tam na dew.

¹³ Asi yoo va ma ɓalam gana u lorra na dok-vadl. Asi taɓ baraw ma doɓorok namma fun tam u lorra asi yooroɗ ndaɗta ni na li ma Lona kal huna mbuɗ ni zi ma dewna.

¹⁴ Ŋgoo dagan asi cil baraw ma doɓorokŋa u tlimiɗ ɦugunina, a boɗom ay kolo kay mbutluɓma, asi cilim zeɗ zeɗ doogo yam dew.

¹⁵ Fiyek baraw namma ni meter doogo yam vadl, hayammi meter mba' may. Baraw namma doogo yam dew ni fiyekemmi fun tam halaŋ.

¹⁶ Nam jak baraw maa vadl fun tam may, jak maa karkiya fun tam may.

¹⁷ Nam cil baraw ma wili wilina na dok-vadl ki fun baraw ma ay daganna, cil na dok-vadl olo, fun ma mbana may.

¹⁸ Nam yoo kawi ma tlawna na dok-vadl a gaɓ barawna kolora.

¹⁹ Nam cil baraw ma boɗom kay mbutluɓma ni u bak gamlagi suu coorina. Hin baa ma bak vabak ma lus duk mbona ha kolo kayam hu olo.

²⁰ Ŋgoo dagan nam ka gu ma pi mbutluɓma ki kolona ni u gu akasiyana.

²¹ Fiyek gu namma ni meter vadl, hayammi nus meterra may.

²² Gu ma dewna pi ma vam ha kolona egem mba'. Gu ma pii kolo namma halaŋ lammi na.

²³ Gu ma pii kay mbutluɓma namma nam njaa ma ay ii dalina dok-mba'.

²⁴ Nam yoo doonora njaa guna kolo kaɗta na dok-fiɗi ga u gu ma dok-mbana, guna dew ni doonora yoori um mba' mba', u gu ma vam ay kolona ha u ma hiŋŋa ni na may.

²⁵ Kay keŋ mbutluɓ ma ii mbayaw nana ni, guna ay pii hu ni dok-mba' may,

²⁶ u doonora yoori usi ni dok-fiɗi may. Gu ma dewna doonora yoori ummi mba' mba' may.

²⁷ Kay keŋ ma ay u fiɗigina nana nam pi guna hu ni karkiya.

²⁸ Nam pi gu ma daŋŋa kurufu hu mbutluɓma mba' a vam kolo eŋga.

²⁹ U guna ay pii ga ni ki eg tam day day yam tuɗ taɓ ha ki kolo dew. Gu ma vam kolona lini na, mba' u hiŋŋa may, mba' u ma hiŋŋa may.

³⁰ Nam ka gu ma daŋŋa kalavandi u doonora yoori umma doogo yam karkiya may. Gu ma dewna doonora um yoori mba' mba'.

³¹ Ŋgoo dagan nam co zulla eg gu ma pii gana ka tokolo akasiyana vadl kay ii ma fokŋa.

³² Vadl kay ii ma mbana may, vadl kay ii ma u fiɗiginana may.

³³ Nam co zulla duk gayra ta ta laɗ ha ki ii hiŋŋa.

³⁴ Zul gu ma cooyna nam hooroɗ ki u lorra a kal tokolora tlamba hura, tokolora nam laɗ taɗ ki ni u lorra lay.

³⁵ Ŋgoo dagan nam cil baraw ma cak ii lina ma tam tlaw wili wilina, ma tlaw keŋ keŋŋa, ma tlawam war warna u baraw dlemba, nam cil Serubim egem may.

³⁶ Nam ka gu ma fiyekina fiɗi gu akasiyana lam tam ki u lorra, va ma njun barawna gana ni lorra lay, sem ma pii gana nam yoo ummi doonora may.

³⁷ Olo ni nam cil gojoli ma daŋŋa ay vunna u baraw ma wili wilina, ma tlaw keŋ keŋŋa, ma tlawam war warna u baraw dlemba, damam vunum ki may.

³⁸ Nam ka gu ma fiyekina vadl olo a gan gojolina u kawi ma njunum gana, nam lasi tasi ki u lorra may, kawi ma colosi sesi kamma vadl ni yoori u kawi ma tlawna.