KALKIRA 34 - Boy Lonana

Ceɗ ɦinira daŋga gaɗta ɓiiri kaɗta

¹ Yawe di Moiz ana, «Aŋ ceɗ ɦinira daŋga na mba' ko mayra jewra na, an hin ɓii boyna kaɗ ko ma an ɓiirim jewna na olo, kay mayra hiŋga aŋ tooɗ kira.

² Aŋ ceɗeɗ ki ni vin maɗii gaw. Maɗii feɗet ni aŋ ɗiŋ kolo kay Ҥinira Sinayra aŋ col fokonu, ni kolo kay yam ɦinira.

³ Sa daŋ ka ɗiŋ ha kolo u aŋgi, ka wi sa kolo kay ɦiniɗi lay. Yoori suu ŋgolona u suu gorina lay, asi jak eg ɦiniraɗi lay.»

⁴ Moiz ceɗ ɦinira mba' ndaɗta ko mayra jewra na may, col kolo maɗii feɗet ɗiŋ kolo kay Ҥinira Sinayra, yow ɦinira nam ceɗeɗ mbara ha kom may.

⁵ Yawe cuk sem ay ga hu ɗugulla mba col egemu, Moiz yi sem Yawe.

⁶ Yawe jak fokom na ni nam yiya, «Yawe, Yawe, Lo ma oora, ma hurum oy u jivirana, ma ka mbuɗ ya zakgina, ma hurum oy u ɗegeerana.

⁷ Ma kaki ɗegee ha kay njaf suuna fok na buɓ buɓma ma ka siɓ cora vi suuna u honi masira bulumusira ki may na, kaɓakŋa kay suu cona ha kay njafasi fokosi na buɓ buɓ lay na.»

⁸ Na gawni, Moiz goɓ ga u vun givim cena.

⁹ Nam di ana, «Lini an fi gasi jivira iriŋ wa ni ɦii, Bu Suuna, tuɗ ay dukumiya, kay suuna ca ni yasi eŋ cocoo. Na may aŋ bulumumi dla coomira kiyo. Aŋ mbuɗumi ki a suu maŋsina.»

Galamba mbuɗ wiliya

¹⁰ Yawe di ana, «An min tak galam manda ki fok suu maŋsina halaŋ. An min li dlara mbuɗ mbuɗ ta li ka ɦoyɗira, duk njaf suu daŋ lay li ka tuɗira, suu daŋ suu ŋguyuŋŋa hin wi ki ana dla ndaɗta mbuɗ mbuɗ cocoo. Ni sunda vi Yawe ta an hin a laɗta.

¹¹ Dlara an hin daŋga karam wanda aŋ goloɗ jiviya. An tuɗ dikiŋ suu Amoreena, suu Kanaanna, suu Hetna, suu Perizina, suu Hiva, u suu Jebusna ha ki fokoŋu.

¹² Gol taŋ jiviya, vi galam u suu aŋ tuɗ ha dukusi wannaɗi, kay ni suu hin a daɓaŋ seŋŋa.

¹³ Givin ma togolla masisi ma li ɓivunna aŋ hin hawaɗam kiyo, tlesuu asi goɓosina aŋ toosi kiyo. Gu ma vi Aseraŋ kaam kiyo.

¹⁴ «Ko ndaɗta na aŋ goɓ ga fok lo ma daŋgi, kay sem Yawe ya cocoo. Nammi Lo ma hurum ya cocona.

¹⁵ Gol taŋ jiviya, vi galam u suu hu mbas ndaɗtanaɗi, hu li ma asi goɓ loogi suu ɦawana, li ɓivunna maŋ loogi masisina asi yaŋ ha aŋ tasi ɓivun masi namma ay wa.

¹⁶ Ɗowba lini aŋ ɗumusi goryosi ay maŋ goryoŋu, goryosi li ɓivunna ni maŋ loogi suu ɦawana, mbuɗugi goryogi ki usi a goɓ loogi suu ɦawana may.

¹⁷ «Aŋ mba li lo ma yoorom yooriɗi.

¹⁸ «Humuŋ mba gaŋ kay luu ma fu ma bay kuffa dukumma tew tew. Hu buuna kiɗisiya aŋ ti fu ma bay kuffa dukumma. Ni va ma an daŋŋa kina. Ni hu til ma wana neeyna, kay agi cuk ay ki hu Egipte ni hu til ma wana nena.

¹⁹ «Tlesuu vuɗ fok jewna halaŋ ki ni varanu. Ko ndaɗta na duk yoori maŋsina halaŋ aŋ li ni dlara humuŋ gaŋ kanda, kay tlesuu vuɗ jewna, yoori suu ŋgolona u suu gorina halaŋ.

²⁰ Na may goo kor ma vuɗ jewna aŋ mbuɗum ki u timiina. Lini aŋ ka mbuɗum naɗi ni aŋ cam ki gaw may. Goryoŋ suu vuɗ jewna halaŋ aŋ mbuɗusiya, sa ka mba egen u kom ma vadlna ɗi.

²¹ «Aŋ li sunda buuna karkiya, hu buu ma kiɗisiyana ni aŋ koɗ taŋu. Lini hu til ma horokŋa lay, hu til ma feɗ waleerana vona lay ni aŋ koɗ taŋu.

²² «Aŋ li luu ma buuna kiɗisiyana, ni luu ma kay vun tlesuu ne ki fok jewna u luu ma feɗ tlena vona u vun basara.

²³ «Hu basara dew ni suu njufii magisina halaŋ mba fok Bu Suuna sesi hindi hindi, ni fok Yawe, Lona vi suu Israelna.

²⁴ Hu li ma an dikigi suuna ki fokogi wa, an kaagi ii haka magira ay ki ŋgol wa may ni, buu ma agi tuɗ eg Yawe Loogina yagi hindira ni sa ma duu ma ndak mba a tlagi mbas magira ki kaɗi.

²⁵ «Aŋ ŋgaɗan tlesuu li ɓivunna ni lasi u fu ma kuffa dukummaɗi, va ma aŋ ŋgaɗam a li luu ma Pakŋa ni hinim a buu koloɗi.

²⁶ «Aŋ mbaa vuɗ ŋgusugi maŋ suu ne ki jewna ay ki ni hu ziŋ Yawe Looŋŋara. Aŋ zal goo ɦuna duk mbii sumbi.»

²⁷ Yawe di Moiz ana, «Ɓii boy namma kaŋgaa, kay galam manda u aŋga hin tuɗ ni kay boy namma, hin li u suu Israelna ni ko ndaɗta na.»

²⁸ Moiz kak ay kolo kay ɦinira u Yawe ni faalira dok-fiɗi, njeŋgera dok-fiɗi may. Nam ka ti fuɗi lay, ka ci yoɗi lay, nam ka ɓii kay ɦinira ceɗira, boy Galamba ma nam damma, ni Boy ma Doogona.

Moiz hoŋ ay hu kaŋŋa

²⁹ Hu li ma Moiz ɗiŋ ay ki ga kay Ҥinira Sinayra u ɦini mayra ceɗi mba' Galamba ɓiiri kaɗta na ni. Doli nam ka wiɗi ni vogom mbuɗ ay ki zeɗ, hu li ma nam ɓak u Yawe na ni vogom mbuɗ weleɗa.

³⁰ Aaron u suu Israelna halaŋ wi vok Moiz weleɗa, asi halaŋ li ndaana a ɦuɗ tasi ay egemba.

³¹ Moiz yasi haa, Aaron u suu ŋgolo suu fok suunana hoŋ ay egemu. Moiz ɓakasi boyna.

³² Ŋgoo dagan suu Israelna halaŋ tok ay egemu. Nam cuɗusi dlara Yawe damba ay kolo kay Ҥinira Sinayra ki halaŋ.

³³ Moiz daɓ njaɗta u asi may ni, nam yow gaɗamulla njunuɗ ki vogomu.

³⁴ Hu li ma nam kal fok Yawe a ɓak u namba ni nam buɗ gaɗamulla ki ta ta hu li ma nam kal ay kina. Hu li ma nam kal ay ki wa ni nam di dlara Yawe damba ayra ki maŋ suu Israelna.

³⁵ Suu Israelna wi ana vok Moiz mbuɗ weleɗa ni, Moiz hoŋ ɗag gaɗamulla ki kam gaw. Hin buɗuɗ ki ni hu li ma nam tuɗ kalafi a ɓak u Yawera tuwa.