KALKIRA 31 - Boy Lonana

Suu li sunda hu mbutluɓmana

¹ Yawe di Moiz ana,

² «Gola an yi Betsaleel ma goŋ Urina, goŋ Hurna, hu njaf Yuda.

³ An oyom u Musuk Lonara kay a nam mbuɗ yali, neeya, fi wira, wi yal ma li dlara halaŋ.

⁴ Haɗ yal sunda zeɗ zeɗ, li sunda u lorra u doonora u kawi ma tlawna,

⁵ wi yal ceɗ ɦinira, ndal tlena, ceɗ guna, li sunda daŋga zeɗ zeɗ halaŋ.

⁶ An tlam Oholiyab ma goŋ Ahisamakŋa egem a njunumba, nammi hu njaf ma vi Danna, an ɦal yalna huu suu wi yalna halaŋ kay a asi li dlara an daŋgara.

⁷ Mbutluɓ ma suuna tok tasi huna, Zandukka Galamba, va ma dugi fun Zandukkana, tlesuu li sunda hu mbutluɓmana halaŋ

⁸ tabulla u tlesuu li sunda huna halaŋ, pindilla u tlesuu li sunda, givin ma togolla

⁹ u givin ma togolla ma ŋgal ɓivun ma ŋgalam kina u tlesuu li sunda huna halaŋ, tassa ŋgol ma mbus kona u va ma tinim kamma,

¹⁰ barawi muli suu li sunda ɓivunna, baraw ma ki teteɗ ma vi mul ma li ɓivunna Aaronna, barawi suu goryom cukusi a li ɓivunnana,

¹¹ mbul ma fuura, mbul ma his ma ŋgal mbidla hu Li ma Teteɗna. Asi lasi ni ko ndal an daŋga na may.»

Buu ma vi Lonna

¹² Yawe di Moiz ana,

¹³ «Aŋ di suu Israelna ana, agi golongi buu manna jiviya. Kay ni va ma hin a tak ki duk tagina ha ni na gak gak, kay a asi wi ki ana An, Yawe, mbuɗugi ki teteɗ ni anu.

¹⁴ Agi saa kay buu ma vi Lonna, kay nam kagi ni a buu ma teteɗna. Sa ma ka li u buu namma ɗina cam ki ciiya. Na daŋ may sa ma li sunda hu buu namma lina ka duk suu mamsina oloɗi.

¹⁵ Agi li sunda hu buuna karkiya, buu ma kiɗisiyana ni buu ma koɗ tara, ki ni a buu ma vi Yawena. Sa ma li sunda hu buu namma lina, cam kiyo.

¹⁶ Suu Israelna gol buu namma ha ni na gak gak, ni Galamba nam vaɗ u asi a fafaɗtara.

¹⁷ Ndaɗ hin ha ni na gak gak duk ɦoŋ suu Israelna u anu. Ni tak ki ana hu buuna karkiya Yawe li huulona u ndaŋgara, hu buu ma kiɗisiyana nam koɗ tamu.»

¹⁸ Hu li ma Bu Suuna daɓ boy mamma njaɗta maŋ Moiz ay kolo kay Ҥinira Sinayra daɓmi, nam ɦam ɦinira ceɗira mba' ta gaɗta ɓiiri kaɗta, ta Lona u tamba ɓiiriɗ ayra.