KALKIRA 30 - Boy Lonana

Li ma ŋgal mbul ma hisna

¹ Ŋgoo dagan aŋ min givin ma togolla. Aŋ minimmi u gu akasiyana.

² Aŋ lam fiyekemmi nus meterra, hayammi nus lay, wulum ma kolona meter dew may. Lam mekem taɓi ko tam may.

³ Aŋ hooroɗ taɗ ki u lorra, yaɗta kolora u dukka ŋgaffa lay, mekeɗ ma kolona lay aŋ hoorosi ki u lorra, aŋ ŋguyuɗ keŋeɗ ki u lorra halaŋ.

⁴ Aŋ co zulla keŋeɗ fiɗi laɗ ki u walak lorra, cooɗ ga u lorra aŋ ŋguyuɗ ki kayamba, keŋeɗ mba' halaŋ. Aŋ min zulla keŋ ndaɗta ki kay a kal tokolora a tlaɗta may.

⁵ Tokolora aŋ laɗni u gu akasiyana. Aŋ hooroɗ taɗ ki u lorra.

⁶ Aŋ tin givin ma togolla ni fok baraw ma cak duk ɦoŋ Zandukka Galamba kina na gay. Ni fok va ma dugi vun Zandukkana na. Ni hu li ma an ŋgaf u aŋ huna.

⁷ Aaron hin ŋgal mbul ma hisna huwa, ni hu maɗiira tew tew. Hu li ma nam a min pindilla ni nam ŋgal mbul ma hisna may.

⁸ Hu li ma Aaron a tin pindilla fiɗigina ni nam ɗus mbul ma hisna may. Ni mbul ma ɗusum fok Yawe tew tewna, basara u basara.

⁹ Agi ka kal mbul ma daŋ ay huɗi, kal ɓivun ma ŋgalam kina huɗi, li ɓivun ma njaf wana huɗi lay, ɦal va ma daŋ ay huɗi lay, li ɓivun u va ma ci huɗi lay.

¹⁰ Hu basa dew ni Aaron li ɓivun ma bulum cora kina yam dew, kay a mbuɗ li namma ki teteɗta. Ni ɓivun ŋgol ma bulum cora kina, nam li ɓivun namma yam dew hu basara tew tew, givin ma togolla namma li ki tew tew ni teteɗ fok Yawe.

Ndum suuna ki a ɦal taara kay a li sunda hu mbutluɓma

¹¹ Yawe di Moiz ana,

¹² «Hu li ma aŋ a ndum suu Israelna ni, gegelay dukusi ni ɦal va ma mbuɗ iiri mambana maŋ Yawe hu li ma aŋ ka ndumusina, ko ndaɗta na ni tuguɗi ka hin mba kasi hu li ma aŋ ka ndumusinaɗi.

¹³ Suu may suu ki ndaki a ndumbana halaŋ sana dew ni ɦal gursura ii nek gramma vadl. Ni u ndum gursu mayra asi ka warakaɗ hu mbutluɓmara, ni a va ma asi ɦam maŋ Yawena.

¹⁴ Suu ki ndaki a ndumbana col ha kay basara dok-mba' tuɗ ha fok na ni ɦal gursu namma maŋ Yawe halaŋ.

¹⁵ Agi a ɦal gursu namma a mbuɗ iiri magira ni, sa ma ɦizina ka ɦal suɗi lay, sa ma hawra ka hin vun gursu mamma ki sisi na dewɗi lay.

¹⁶ Aŋ vi gursu namma ko suu Israelna halaŋ, cukum hu zi mayra tokka hu mbutluɓma, ni kay a li sunda hu mbutluɓma u namba. Gursu namma hin fok Yawe ni a gi humba kay va ma agi ɦam a va ma mbuɗ iiri magirana.»

Tassa ŋgol ma mbus zozoɗta kina

¹⁷ Yawe di Moiz ana,

¹⁸ «Aŋ yoo tassa ŋgolna u kawi ma tlawna, va ma tinim kolo kamma ni u kawi ma tlawna lay. Ni kay a mbus zozoɗta kira. Aŋ tinim duk ɦoŋga hu mbutluɓma fok givin ma togolla, vo yona hu may.

¹⁹ Aaron u goryom mbus kosi u sesi ki ni huwa,

²⁰ Hu li ma asi a cuk hu zira tokkara ni asi mbus tasi ki halaŋ kay a asi miɗ kiɗi, ɗowba hu li ma asi ɦuɗ tasi tok eg givin ma togolla a li sunda, a ŋgal ɓivun ma his jivina maŋ Yawera.

²¹ Asi mbus kosi ki u sesi kay a asi miɗ kiɗira. Gaɗ ndaɗta hin ka dukusi ni a fafaɗta masi lay, maŋ njafasi ma hin ka ŋgorosina lay, ha na gak gak.»

Mbul ma fuura u mbul ma his jivi ma ŋgal hu li ma li ɓivunna

²² Yawe di Moiz ana,

²³ «Hal mbul ma his jivina, hal mbidla ii kelew vadl may, mbul ma yam ana sinimonna ii kelew mba' u nus may, usu ma his jivina kelew mba' u nus may.

²⁴ Mbul va ma yam ana kasina kelew vadl, mbul conona litir karkiya may.

²⁵ «Aŋ li mbul ma teteɗ ma fuura ni u tle asina, tlumusi ki u mbul ma hisna, mbul namma hinni a mbul ma teteɗ ma fuura.

²⁶ Aŋ hin fuu mbutluɓma u Zandukka Galamba ki u mbul namma,

²⁷ tabulla u tlegeyeɗ suu kakŋa halaŋ, pindilla u tlegeyeɗ halaŋ, givin ma togolla lay,

²⁸ givin ma togolla u tlesuu huna halaŋ, tassa ma ŋgolna u va ma nam tini kamma.

²⁹ Aŋ fuurusi kiyo, asi halaŋ mbuɗ ki teteɗ. Va ma ŋgenesina hin mbuɗ ki teteɗ may.

³⁰ Aaron u goryom aŋ fuurusi ki may. Aŋ tinisi a asi li sunda lan ɓivunna.

³¹ Aŋ njaɗ boy namma ki maŋ suu Israelna, ana ni mbul ma teteɗ ma fuura, ha na gak gak, nammi manu.

³² Sa ka li mbul namma egembi, agi li mbul ma daŋ vo varagi ko namma naɗi lay. Kay mbul namma ki teteɗ, agi hinimmi teteɗ kagi may.

³³ Sa ma tlum mbulna varam ko namma nana, lam ki eg sa ma ɦawana, sa namma hin bulum ki duk njaf suu mamsina.»

Yoo mbul ma fuura

³⁴ Yawe di Moiz ana, «Yow mbidla u tlesuu his jivina, sesi ana storaks, oniks, galbanum, u va ma ɗus ndoosna ŋgaasi fun tasi na dew.

³⁵ U tle asina aŋ li mbul ma his jivina, suu wi yal mbulna li mbul namma ni asiya, mbul namma u vuvuna duku ni mbul ma teteɗna.

³⁶ Aŋ li ma hiŋŋa ki fuɗ fuɗta kay a hoorom vok Zandukka hu zira suuna tok hura ni magiya, ndaɗ hin ki ni teteɗ may.

³⁷ Mbul ma aŋ yoorom namma agi li maa ko namma na kay tagi voɗi, aŋ lammi maŋ Yawe doy hol.

³⁸ Sa ma li mbul ma his jivi ko namma na vo varam kay tamma hin bulumum ki duk suu mamsina.»