KALKIRA 29 - Boy Lonana

Haɗta kay a ɦal sunda li ɓivunna maŋ Aaron u goryomba

¹ Gola aŋ li a ɦasi sunda li ɓivunna ni aŋ li ko wanda na, vi bolo mbutlna may, yow gamlagina mba' suu dak ka egesiɗina may,

² Hin tli wa blena bay kuffa dukumma may, li komnjoɗi ma bay kuffa zuɓulum u mbulna u komnjoɗi ma gorina yamam mbulna kamu. Aŋ lasi ni u fuɗ waleerana.

³ Aŋ cukusi hu goo kaalamba, aŋ tuɗ tak kaalam ndaɗta u mbutlna lay u gamlagi suu mbana may.

⁴ Aŋ ɦuɗ Aaron u goryom ha fun mbutluɓma na tok, aŋ mbususi ki u mbona.

⁵ Aŋ yow barawna cukum ta Aaron. Ni baraw jibirna u baraw ma kayam kolona u efodna u mbumbu ma gaɓam gudikimma. Aŋ njunum u gandina eg baraw ma egemma.

⁶ Aŋ tinim gaɗamulla kamu, aŋ njun tampoŋ ma teteɗna kolo kay gaɗamulla may.

⁷ Ŋgoo dagan aŋ tli mbul ma fuura voomma kamu, fuurumu.

⁸ Hu li ma aŋ takam goryom ki wa ni, cukusi baraw ma njibirna tasi may.

⁹ Aŋ njunusi gandina hurusi may. Aaron u goryom aŋ tinisi jumina kasiya. Ɓivunna hin ki ni masi a fafaɗta ka mbuɗɗi. Aŋ ɦal sun ndaɗta ni maŋ gi Aaron u goryomu.

Ɓivunna

¹⁰ Aŋ tuɗ mbutlna ha fun zira tokka. Aaron u goryom tin kosi kay yam mbutlna.

¹¹ Aŋ ŋgaɗ mbutl namma fok Yawe, hu vun zira tokka ta kal ha kalafira na gaw.

¹² Aŋ vo busu mbutlna koŋ voni yamam kay keŋ givin ma togolla ki hu keŋem fiɗi halaŋ. Ŋgoo dagan u busu ma hinna aŋ voom hu givin ma togolla.

¹³ Aŋ yowom mbul ma hurumma halaŋ, tli dudukka may, yow gilissa jak u mbul ma kaɗna may, aŋ ŋgalasi hu givin ma togolla,

¹⁴ na may tliw mbutlna u bakam u soɗom halaŋ aŋ ŋgalasi ha ki doŋ kaana. Ni ɓivun ma bulum cora kina.

¹⁵ Ŋgoo dagan aŋ vi gamla ma jewna gi Aaron u goryom tin kosi kay yamu.

¹⁶ Aŋ ŋgaɗ gamla namma vo busuna, yamam ki ŋguy yam givin ma togolla ki na cutl.

¹⁷ Aŋ caw ii tliw timiina ki duku mbus gi yorotna ay ki may cawasi ki kay tliw ma aŋ cawam irim kina u yamba may.

¹⁸ Aŋ ŋgal timii namma ki halaŋ hu givin ma togolla. Ni ɓivun ma ŋgalam ki maŋ Yawena. Ni fu ma ŋgalam kina ma his ma jivina maŋ Yawena.

¹⁹ Ŋgoo dagan aŋ vi gamla timii ma mbana, gi Aaron u goryom tin kosi kay yamu.

²⁰ Aŋ ŋgaɗ gamla namma, vo busuna voni tinim eg vun hum Aaron ta njuffa eg vun hum goryom halaŋ may. Tinim kay do kosi ta njuffa may, tin kay do sesi ta njuffa may. Ŋgoo dagan aŋ yorok busuna ŋguyum ki kay givin ma togolla halaŋ.

²¹ Aŋ vo busu ma ay kay givin ma togolla may, tli mbul ma fuura may, aŋ yamam eg Aaron, eg barawi mamsina may, yam eg goryom lay, eg barawi masisina lay. Ni asi hin mbuɗ ki teteɗ, Aaron u barawi mamsina, goryom u barawi masisina lay.

²² Tliw timiina aŋ yow keŋ li ma mbulna, njawra u mbul ma hurumma, dudukka, gilissa u dlaɗta mbara u mbul ma kaɗna halaŋ, paɗ bikka njuffa may, kay ana ɓivun ma u gamla timii namma ni ma a ɦal sunda maŋ Aaronna.

²³ Ŋgoo dagan tli komnjoɗi dew, tli ma lii jivina dew may, ni ma lam u mbulnana, yowosi hu goo kaalamba u fu ma bay kuffa dukumma, ma ka tini fok Yawena.

²⁴ Aŋ ɦal tlesuu ti asina halaŋ ko Aaron, ko goryom lay, asi viriwisiya fok Yawe, ni ɓivun ma viriwra.

²⁵ Ŋgoo dagan aŋ vasi tle asina kosiya, aŋ tuɗ ŋgalasi ki hu givin ma togolla a ɓivun ma his jivina fok Yawe, ni fu ma ŋgalam ki maŋ Yawena.

²⁶ Aŋ tli dik gamla ma a ɦal sunda maŋ Aaronna, nammi maŋ Aaron. Aŋ viriwimmi fok Yawe ana ni ɓorow maŋŋa.

²⁷ Aŋ yow gudikŋa u bikira suu aŋ hinisi kini mbaarasi fok Bu Suuna asina hin ki ni maŋ Aaron u goryomu.

²⁸ Tle asina hin ki ni maŋ Aaron u goryom kay tasi a fafaɗta kay suu Israelna, ni va ma asi a taarasinana ni va ma asi hin tlam ko suu Israelna hu li ma asi ka li ɓivun masi ma heɓpana, ɦal ndaɗta ni maŋ Yawe.

²⁹ Baraw ma teteɗ ma vi Aaronna hin hin ka ni maŋ goryomu, asi hin cukummi hu li ma aŋ fuurusi a ɦasi sunda kana.

³⁰ Goŋ Aaron ma varak ka balamam a mul ŋgol ma li ɓivunnana, cukum baraw mamma tam buuna kiɗisiya, ni sa ma hin kal hu mbutluɓma hu Li ma Teteɗna a li sundana.

³¹ Tli tliw gamla ma ŋgaɗam a ɦal sundana, zalam ay ni hu li ma teteɗna.

³² Aaron u goryom kom tliw namma u komnjoɗi ma ka hu goo kaalambana ni fun mbutluɓ ma kal ha kalafina.

³³ Asi kom tliw namma ni kay a bulumusi coosira kira, kay a ɦasi sundara may, kay a mbuɗ tasi ki teteɗta may, tliw namma sa ɦawa ka komombi, kay nam ki teteɗ.

³⁴ Lini u tliw namma u komnjoɗina buu kolo wa ni maɗii ni ŋgalam kiyo, sa tam oloɗi, kay nam ki ni teteɗ.

³⁵ Ni aŋ li Aaron u goryommi ko an daŋ wanda na. Lasi dlara a ɦasi sun masira ni ta ta buuna kiɗisiya.

³⁶ Hu buuna halaŋ ŋgaɗan mbutl ma bulum cora kina, aŋ li ɓivun ma bulum cora kina kay givin ma togolla hu li ma aŋ li ɓivunna ni fuurusi u mbulna may.

³⁷ Hu buuna kiɗisiya ni aŋ ŋgaɗ ɓivunna kay a li givin ma togolla ki teteɗta, ni otel hin li ki teteɗ may, tlesuu ŋgen givin ma togolla lasi ki teteɗ may.

Ɓivun ma lam hu buuna tew tewna

³⁸ Gola ni ɓivun ma aŋ hin lam hu buuna tew tewna, yow gor timigii suu basaɗasi dew dewna mba', ŋgaɗasi hu buuna tew tew.

³⁹ Timii ma jewna aŋ ŋgaɗam maɗiiya, ma mbana aŋ ŋgaɗammi fiɗigi goona gige.

⁴⁰ Olo u goo timii ma jewna ni aŋ yow fuɗta kelew dew, vo mbul conona duk litir dew u nus may, vo sum veŋŋa duk litir dew u nus may, ni ɓivun ma cira, zuɓulusiya, asina dlaɓi u ɓivun ma jewna.

⁴¹ Goo timii ma mbana aŋ ŋgaɗammi goona gige, aŋ li tlena hu ni ko aŋ li ma maɗiinara na may, li ɓivun ma fuɗta u ɓivunna u va ma cira, ni ɓivun ma ŋgal his jivina u fu ma ŋgalam ki maŋ Yawena.

⁴² Ni ɓivun ma ŋgalam kina hu buuna tew tew lammi na, ha hu basara basara gak gak, lammi fun mbutluɓma hu li ma kal ha kalafi fok Yawena. Ni hu li ma an ŋgaf u aŋ ɓak u aŋ huna.

⁴³ An hin ŋgaf u suu Israelna hu li namma, bibiŋil manda hin li hu li namma.

⁴⁴ An mbuɗ mbutluɓma u givin ma togolla ki teteɗ, Aaron u goryom an mbuɗusi ki teteɗ may, kay a asi li sunda lan ɓivunna.

⁴⁵ An hin kak duk suu Israelna, An hinni a Loosina.

⁴⁶ Asi hin wi ki ana, Anni Yawe, Loosina, Anni sa ma cukusi ay ki hu mbassa Egiptera a kak u asina, Anni Yawe, Anni Loosina.