KALKIRA 28 - Boy Lonana

Muli suu li ɓivunna u baraw masina

¹ Tay wayaŋŋa Aaron ay egeŋ u goryom halaŋ duk suu Israelna kay a nam li sunda li ɓivunna. Aaron u goromma Nadab, Abihu, Eleazar u Itamar.

² Aŋ ɗee baraw ma teteɗna ta wayaŋŋa Aaron. Ni baraw ma tak ki kay bibiŋilla u ŋgollana.

³ Aŋ taŋga ɓak suu wi yalna suu an oyosi u ŋgussa yalna, aŋ dasi asi cil barawna maŋ Aaron, kay a nam li ki ni mul ma lan ɓivun manna.

⁴ Gola asi cil baraw namma ni ko wanda na, cil goo mbumbu ma gaɓ gudikŋa u efod, baraw ma kurufuna, baraw jibira u baraw ŋgol ma vunum damina gaɗamulla u gandina, asi cil baraw ma teteɗna kay wayaŋŋa Aaron u goryom may kay a asi lan sunda li ɓivunna.

⁵ Asi cilimmi u lorra, u baraw ma tam wili wilina u ma tlaw nde ndena u ma tlaw keŋ keŋŋa may u baraw dlemba may.

Baraw ma kurufuna

⁶ Asi cil baraw ma efodna ni u lorra u baraw ma tlaw wili wilina, u ma tam tlaw nde ndena u ma tlaw keŋ keŋŋa, cilimmi u baraw dlemba may, ni asi cilim ko ndaɗta na.

⁷ Asi cilim zewna hu vunum ma ŋgaf kolona jak a jakam fun tamba.

⁸ Zew ma njun baraw nammana cilimmi ko tam dew, cilimmi u lorra u baraw ma tam tlaw tlawna u ma tlaw keŋ keŋŋa u baraw dlemba may.

⁹ Aŋ yow ɦinira yaɗ ana oniks mba', ɓii sem suu Israelna kaɗu.

¹⁰ Ɓii sem suu karkiya kay ɦinira jewra, ɓii karkiya kayra mbara may. Ɓiirisi sesi ni u vuɗ masira.

¹¹ Aŋ ɓii sem suu Israelna hu ɦinira mba' ndaɗta ni u yal ma vi suu wi sun ɦinira ni ko ndal tampoŋŋa na. Aŋ ŋguyuɗ yaɗ ki u lorra na cutl, laɗ taɗ halaŋ ki u lorra lay.

¹² Aŋ kal ɦini ndaɗta hu baraw ma njun efodna, ɦini ndaɗta ni a gi humba kay suu Israelna. Aaron cuk baraw namma u sem suu Israelna, tuɗ fok Yawe u sesiya.

¹³ Aŋ laɗ vunuɗ ma njunda ni u lorra.

¹⁴ Aŋ yoo galina uɗ mba' yoorommi u lorra lay, aŋ njun gali ma mba' namma hu vunuɗ ma njunda.

Baraw ma gaɓam gudikŋa

¹⁵ Aŋ cil baraw ma gaɓam gudikŋa ma kaɓakŋa, di suu yalna asi cilimu, aŋ lammi ko ndal baraw ma efodna na may. Lammi u lorra u baraw ma wili wilina u ma tlaw nde ndena u ma tlaw keŋ keŋŋa, cilimmi u baraw dlemba dereŋga may.

¹⁶ Baraw namma homom kay tam wani hayammi fun tam dew, fiyekem fun tam lay.

¹⁷ Aŋ ndalam ki u ɦinira gus loɓ cocora zeɗ zeɗ fiɗi, ta jewra ni sarduwan, topaz, emerod, ni ŋguyra jewra.

¹⁸ Ŋguyra mbara ni u eskarbukle, lazulit u jaspe.

¹⁹ Ta hindira ni u agat, kornalin u ametist.

²⁰ Ta fiɗira ni u krisolit, beril u oniks cilisi zewna funusi halaŋ halaŋŋi zew lorra ndalasira.

²¹ Ҥinira li ni kay ndum suu Israelna, ndaɗ li ni doogo yam mba' ko sesi na may. Ndaɗ hin ɓiiri ni ko tampoŋŋa na, taaragelay ni u seɗu kay ana njaf suuna ni doogo yam mba'.

²² Aŋ li galina fun mbumbu ma gaɓ gudikŋa ni u lorra taɗta cili ko ndal zewna na.

²³ Aŋ co zulla fun mbumbu ma gaɓ gudikŋa kal walak lorra huwa. Walak ndaɗta aŋ kalaɗ hu vun baraw ma daɓ ki funna u dlam jak.

²⁴ Aŋ cuk gali lor ma aŋ cilimma ay hu walak ndaɗta fun mbumbu ma gaɓ gudikŋa may.

²⁵ Gali ma daŋŋa aŋ cukum fun efodna na ay kolo pel bikim na a gaɓam ay fokom nara may.

²⁶ Aŋ yoo walak lorra daŋga mba' olo kalaɗ hu keŋ ma kurufuna eg baraw ma efodna na may.

²⁷ Aŋ yoo walak lorra daŋga mba' olo gaɓaɗ hu vun ma u kaŋga kay yam gandi ma kay baraw ma vo kurufuna na.

²⁸ Aŋ njun mbumbu ma gaɓ gudikŋa ga ni u walak ndaɗta u zew ma tam wili wilina, kay ana baraw ma gaɓi gudikŋana vi ga jivi kay baraw ma efodna, ka nam jok ki kay baraw ma ŋgolnaɗi.

²⁹ Hu li ma Aaron a kal kalafi hu Li ma Teteɗna ni nam gaɓ goo mbumbu ma kaɓak namma gudikimu sem njaf suu Israelna hu halaŋ. Ni kay ana an, Yawe maa ki kagiɗira.

³⁰ Aŋ kal va ma yam ana Urim u Tumimma ha hu mbumbu baraw ma kaɓakŋa vun dik Aaron. Nam hin tuɗ ɓak ma vi suu Israelna tew tew fok Yawe.

Baraw ma teteɗna

³¹ Baraw ma kurufuna ma Aaron cukum tamma cili ni u baraw dlemba dereŋga tam wili wiliya.

³² Aŋ coom delem ta cuk ay kay yamba, damam vunum ki jiviya, kay a nam haa kiɗi. Vunum li ki damira ko ndal jum ŋgalla na.

³³ Aŋ ndolom vunum ma kaŋgana ki u baraw ma wili wilina, ma tlaw nde ndena ma tlaw keŋ keŋŋa may ki hu vunum halaŋ aŋ ɦos geeleŋga duku, geeleŋ ndaɗta yooroɗ ni u lorra, tlumira u baraw ma ɦosi fun luy luyna.

³⁴ Aŋ gi geeleŋ lorra dew may, gi baraw ma cili ko vuɗ guna nana dew may gak gak ŋguf vun baraw ma ŋgol namma ki u ndaɗta.

³⁵ Aaron cuk baraw namma ni hu li ma nam ka li sunda kalafina. Hu li ma nam kal hu Li ma Teteɗna suu ki buruna hum tii geeleŋga ki may, hu li ma nam a kal ay ki kiɗikŋa may ni nam ka miɗɗi.

³⁶ Aŋ yoo lorra ko ɓo tlena na, aŋ ɓii kaɗ ko ndal tampoŋŋa na, «TETE ƊTA MAŊ YAWE».

³⁷ Aŋ njunuɗ u zew baraw ma tam wili wilina, aŋ njunuɗ vok gaɗamulla vi mul ma li ɓivunna.

³⁸ Ndaɗ hin li ni vok Aaron kay a nam mba dla mayra li ay cora eg tlesuu teteɗna, tlesuu suu Israelna ɦasi a li ɓivunnana, lor ndaɗta mba li njunni vogom tew tew kay ana ɓivun masina li jivi ii Yawe.

³⁹ Baraw njibirna ma Aaron cukumma ni aŋ cilim baraw ma ŋgolna ni u baraw dlemba dereŋga. Cilim gandina kayam a njun hurumba may.

⁴⁰ Goryoŋ Aaronna lay aŋ lasi baraw namma tasiya, cilisi gandina kayam may, cilisi gaɗamulla dlaɗ ŋgolla kasi may.

⁴¹ Aŋ cuk barawna ta wayaŋŋa Aaron u goryomu aŋ fuurusi ki u mbulna, ɦasi sunda may, lasi ki teteɗ kay asi a li sunda li ɓivunna.

⁴² A baarasi siili masira kira ni, aŋ cilisi kalasoŋga u baraw dlemba, col ha hurusi ta ta tew ay ɓalasiya.

⁴³ Aaron u goryom cuk kalasoŋ ndaɗta ni hu li ma asi a cuk hu mbutluɓma, ɗowba hu li ma asi a tuɗ eg givin ma togolla, kay a li sunda hu Li ma Teteɗna, kay ana asi fi dla cora miɗ kiɗi. Gaɗ ndaɗta ni ka gaɗta maa kiɗi, kam lay, kay njafam ma hin kana lay.