KALKIRA 25 - Boy Lonana

LONA TAKASI YAL MBUTLUƁMA Ҥalla ɦal maŋ Lonara

¹ Yawe di Moiz ana,

² Tuɗ di suu Israelna asi taaran tlena. Ni kay suuna halaŋ u huu ma jivina, agi mba tok tle asina.

³ Gola tlesuu asi hin a taarasina ni ko wanda na, lorra, doonona, kawi ma tlawna,

⁴ baraw tlawna, baraw ma wili wilina u baraw ma tlaw keŋ keŋŋa, baraw dlemba u tlimiɗ ɦugunina,

⁵ bak timigii suu ki coori tlawna, bak vabak ma lus duk mbona, gu akasiyana,

⁶ mbul ma vi kura, mbidla li mbul ma his ma fuu suuna u mbul ma his jivi ma vo kay kura,

⁷ ɦinira yaɗ ana oniks, u ɦinira daŋga taɗ ndalira ta tinisi eg efod u gudikŋa ma gaɓam kay efodna vi mul ŋgol ma li ɓivunna.

⁸ Asi minin mbutluɓma, an hin kak dukusiya.

⁹ An hin takaŋ yal mbutluɓ ma minim namma, yal tlesuu a li sunda huna halaŋ, ni agi hin li ni ko ndaɗta na may.

Zandukka takkira, Tabulla u Pindilla

¹⁰ Asi min Zandukka u gu akasiyana, fiyekeɗ ŋga meter dew u nus, hayaɗ ni meter dew lay, wuluɗ ma kolona ni meter dew lay.

¹¹ Aŋ hooroɗ taɗ ki u lorra, hooraɗ ŋgoroɗ lay, huruɗ lay. Aŋ ŋguyuɗ keŋeɗ ki u lorra halaŋ.

¹² Aŋ yooroɗ ɓalaŋ lorra keŋeɗ na fiɗi, aŋ tiniɗta ga u seɗ fiɗi halaŋ, keŋ hiŋŋa mba' may, mba' may.

¹³ Aŋ ka tokolo akasiyana na mba' hooroɗ taɗ ki u lorra may.

¹⁴ Aŋ kalaɗ hu ŋgil ɓalaŋ lorra aŋ laɗ keŋ mba' may, mba' mayra, tokolo ndaɗta kali hu ni kay a tli Zandukka.

¹⁵ Tokolora hin kali hu ni a fafaɗta ka paɗaɗ ki oloɗi.

¹⁶ Aŋ cuk ɦinira ceɗi mba' ta gaɗta ɓiiri hura hu Zandukka.

¹⁷ Aŋ min vun Zandukka u lorra sasak, fiyekeɗ ni meter dew u nus, hayaɗ ni meter dew may.

¹⁸ Aŋ min Serubim mba' u lorra. Aŋ yoorosi kolo kay yam Zandukka, kak ay keŋ hiŋŋa dew may, dew may.

¹⁹ Li Serubim dew ay keŋ hiŋŋa ma mbana ha keŋ hiŋŋa may. Aŋ lasi ni laki kolo kay Zandukka keŋ vunuɗ jak.

²⁰ Serubimma baa garaŋasi ki kay Zandukka a juɓuɗ uɗta. Asi kakŋi ŋgaf vogosi fun tasiya, gol irisi ni ga kay Zandukka.

²¹ Aŋ dug vun Zandukka kolo kayami, hu Zandukka kurufu ni aŋ cuk ɦinira ceɗi ta gaɗta ɓiiri kaɗta hu may.

²² Hu li namma ni an mba ŋgaf u aŋŋi huwa, duk ɦoŋ Serubimma. Kolo kay Yam Zandukka, an hin daŋ dla mayra an min a daɗ maŋ suu Israelnara ka halaŋ.

Tabulla cuk fu ma ɦam maŋ Lonana kaɗta

²³ Na ɗaŋŋi aŋ ɓal tabulla u gu akasiyana, fiyekeɗ meter dew, hayaɗ nus meter dew may, wuluɗ meter dew u nus may.

²⁴ Aŋ hooroɗ taɗ ki u lorra sasak, aŋ ŋguyuɗ vunuɗ ki u lorra may.

²⁵ Aŋ ŋgaɗ gu ma daŋŋa cakaɗna keŋeɗu, hoorom tam ki u lorra may.

²⁶ Aŋ gun ɓalaŋ ma lorra hu keŋeɗ fiɗi halaŋ, ɓalaɗ kawi namma keŋeɗu.

²⁷ Aŋ ɓal kawi namma ni eg gu ma aŋ cakaɗna keŋeɗna na tok, ni kay a hin kal tokolora keŋeɗ a tlaɗ kolora may.

²⁸ Aŋ min tokolo ndaɗta ni u gu akasiyana, aŋ hooroɗ taɗ ki u lorra may, ndaɗ ndak li sunda ni a tli tabulla kolora.

²⁹ Aŋ yoo gi tassana u kop ma ci tlena, u ŋgalina, kay a asi hin vo mbul ma hisna, aŋ yoo tle asina ni u lorra halaŋ.

³⁰ Aŋ cuk fu ma ɦam maŋ Lonna kay tabulla hu buuna tew tew fokonu.

Pindilla koɗ garaki kiɗisiyara

³¹ Aŋ li va ma tin kura, minimmi u lorra sasak, aŋ min pindilla ni uɗta gaara u go gor koɗu, li ma vo mbulna huna u liiɗ ma tin kura hu halaŋ.

³² Koɗ maa hindi keŋ hiŋŋa may, hindi keŋ hiŋŋa may.

³³ Ko ma hindi hiŋŋa li ma vo mbulna a tin kura ka hu may, ma hiŋŋa ni na lay, hu koɗ ma karkiyana halaŋŋi kura cuk ay ki huwa.

³⁴ Eg guuɗ ma ŋgolna ni li ma vo mbulna ka hu fiɗi u liiɗ ma li sunda, u ɓooɗ hu lay.

³⁵ Li ma a tin kura huna ka hu koɗ ma dukŋa mba', ka hu koɗ ma keŋŋa mba' may, ta ta koɗ karkiya taɓ ha eg gu pindilla ma ŋgolna dew.

³⁶ Zuluɗ ma zeɗ zeɗ namma taɓi halaŋ yoori ko tasi dew ni asi mbuɗ ni a pindilla dewra yoori ni u lorra sasak.

³⁷ Aŋ hin laɗ ni a pindilla koɗ zeɗ zeɗ kiɗisiya, asi tin pindil ndaɗta ni a gol li ma fokosina.

³⁸ Li ma vo mbulna u li ma cuk buɗna yoorosi ni u lorra sasak.

³⁹ A min li ma vo mbulna u li ma cuk buɗna ni aŋ yow lorra ii kelew dok-hindi.

⁴⁰ Aŋ tuɗ gol jiviya, a asi min ko ndal an takaŋ mbeleŋ namma ha kolo kay ɦinira wanda na may.