KALKIRA 24 - Boy Lonana

Lona li u galam mamba u suu Israelnara

¹ Yawe di Moiz ana, «Ɗiŋ ay kolo egenu aŋ may, Aaron may, Nadab u Abihu may, suu ŋgolo suu Israelna suu dok-kiɗisiyana may, agi tuɗ goɓ Lona ha ki na ɦuɗ.

² Moiz dew ni sa ma hin ɦuɗ tam ay eg Yawena. Asi suu hiŋŋa ɦuɗ tasi ay kaɗi. Suu halaŋŋa ɗiŋ ay koloɗi kama.»

³ Moiz mba cuɗ boy ma Yawe damma ki maŋ suuna halaŋ u gaɗta lay. Suuna halaŋ hoŋ dira vunusi na dew ana, «Boy ma Yawe damma halaŋ ami min a li umu.»

⁴ Moiz ɓii boy ma vi Yawena ga halaŋ. Nam col kolo maɗii na feɗet min givin ma togolla ga u ɦinira u gogoyra doogo yam mba' kay njaf suu Israelna.

⁵ Nam sun gorzoŋii suu Israelna, asi tuɗ li ɓivun ma ŋgalam kina, hin ŋgaɗ gor mbutlina a li ɓivun ma heɓpa maŋ Yawe may.

⁶ Moiz vo busu maa hu tassana ɦiw voom hu va ma vo busuna u ma hiŋŋa nam yamam kay givin ma togolla may.

⁷ Nam tli maga mayra galamba ndumuɗ maŋ suuna, asi di ana, «Dlara Yawe daɗta halaŋ ami min li uɗu, ami min hum uɗu.»

⁸ Moiz tli busu ma vooy hu tassanana yamam ta suuna di ana, «Gola ni busu ma Galamba Yawe vaɗ u agira kay boy ma nam damma halaŋ.»

⁹ Moiz ɗiŋ kolo kay ɦinira, asi ugi Aaron, Nadab, Abihu u suu ŋgolo suu Israel suu dok-kiɗisiyana may.

¹⁰ Asi wi Lona ma suu Israelna goɓomma, u sem ga ni ko ɦini mayra yaɗ ana Safirra na, gi mbaɗagira ko ndal huulona na.

¹¹ Suu Israelna gol Lona na may Lona lasi va ma co egesiɗi, asi ti lay, ci lay.

Moiz kolo kay Ҥinira Sinayra

¹² Yawe di Moiz ana, «Ɗiŋ ay kolo egen kay ɦinira tani mbay kak tani, kay an min ɦaŋ ɦinira ceɗira ta gaɗ manda halaŋ ka ɓiiri hura, a aŋ haɗaɗu.»

¹³ Moiz col kolo u Josuwe saam ma njun umma. Moiz ɗiŋ kolo kay Ҥinira vi Lonara.

¹⁴ Hu li ma nam di suu ŋgolona ka ana, «Agi juɓumi ka tani ta ta hu li ma ami hin hoŋ ay egegina. Agi gola gi Aaron u Hur hin ka fokogi wanna, sa maa fi dla ay kom wa ni mbay egesiya.»

¹⁵ Moiz ɗiŋ kolo kay ɦinira, ɗugulla kuluɓ yam ɦinira ki na halaŋ.

¹⁶ Bibiŋilla vi Yawera ka kolo kay Ҥinira Sinayra, ɗugulla kuluɓ ki kay ɦinira ta ta buuna karkiya. Hu buu ma kiɗisiyana, nam yi Moiz ay duk ɗugulla.

¹⁷ Bibiŋilla vi Yawe tak taɗ ii suu Israelna ni ko kura ŋgalla na, ay kolo kay ɦinira.

¹⁸ Moiz kal ha duk ɗugulla, ɗiŋ ha kolo kay ɦinira, Moiz kak kolo kay ɦinira buuna dok-fiɗi.