KALKIRA 22 - Boy Lonana

¹ Lini sana fi sa ma kulla a vek u zira cam ki maɗna wa ni sa ka hal dlara saam sugulumbi.

² Lini faɗta day ki wa kay sa namma ni ka cam oloɗi. Hu li namma sa ma kulla mba warak va ma nam kulumma, lini va ka kombi ni gusum tamba ki a warak dlara nam laɗta.

³ Lini yoo ma kulumma, mbutl kala, kor kala, timii kala, famma kom iiri tuwa ni, nam warak u va namma sem mba'.

Lini yoorina ɓeŋ sene ma vi sanna

⁴ Lini sana taa yoori mamsina hu sene mamma wana, ɗowba sene gugutlura, nam hinisi a cuk duk senena vi sa ma daŋ wa ni, nam warak sa namma ki ni u sene mam ma jivi cocona.

⁵ Lini kura ndi ay ŋgal wana ki hu senena wa ni, sa ma gi ku ndaɗta ayna mba warak wa ma vi sa nammana.

⁶ Lini sana ɦal gursura ha ko ndaramma kolo a ŋgayra, ɗowba va ma daŋŋa ha a ŋgayra, suu kulna kul va namma wa, nam fam wa ni sa namma warak sem mba'.

⁷ Lini fi sa ma kul namma kaɗi, malaŋ zina mbay hu ziŋ Lonara kay a wi ki ana nam ŋgen gasi kom ka eg va nammaɗira.

⁸ Kay tlesuu ba na na halaŋ ko ndal mbutlna, korra, timiina, barawna u tlesuu viɗ vona halaŋ ma sana di ana ni vaannana boy namma mba tew ki fok Lona. Sa ma Lona gam um kina warak ndaramma sem mba'.

⁹ Lini sana ɦal vana ha a golla ko ndaramma, mbutl kala, kor kala, timii kala, yoo ma daŋ kala ni, va namma miɗ wa, ɗowba daka sem kus ki kala sa wi kaɗi,

¹⁰ suu asina ndak a suu tasi u sem Yawe kay ana sa namma basam vaamma ka basiɗi, malaŋ yoona ndak kaka, ka joɓ warak kayambi.

¹¹ Lini yoo namma kulum ay ki ni varamu ni, nam ndak warak malaŋ vana.

¹² Lini yoo namma va vammi viiya ni, nam mbaaram ɦaaram ay ki fok suuna asi wi kiyo, ni malaŋ vana ka joɓ warak kambi.

¹³ Lini sana vi yoona ha vi ndaramma, nam dak kala, miɗ ki kala, bay malamma wiya ni, nam sa ma vam ayna warakamu.

¹⁴ Lini dla ndaɗta li ni ii malaŋ vana ni nam ka warakgi may. Lini nam vammi a li sunu ni nam ɦal ni va ma ŋgaam kay sun ndaɗtana doy hol.

Hum u Lona u kak ma duk taŋ u suuna jivina

¹⁵ Lini sana ganyam go tamara buu u ndaɗu, ndaɗ ka caambaɗi lay ni, nam ndak warak bege ma kaɗna ɗumuɗ ki a cara.

¹⁶ Lini bu goora ka min a ɦambaɗi ni, nam warakŋi ko bege ma ɗum cara na may.

¹⁷ Cara hal li dlara kumuna agi caɗ kiyo, hiniɗ iiriɗi.

¹⁸ Sa ma buu u yoonana, cam ki ciiya.

¹⁹ Mul ma li ɓivunna maŋ loogi suu ɦawana ka maŋ Bu Suunaɗina, cam kiyo.

²⁰ Agi ka las ŋgay ma kaki varaginaɗi, kay agi ay ŋgayra hu Egipte ni na may.

²¹ Agi ka las cara donoraɗi, las go kuyunaɗi lay.

²² Lini aŋ lasamu, nam yi ha kolo egen wa ni, an humum tii mamma.

²³ Hurun ɓeŋ egegiya, an hin cagi kiyo, hinigi boyogogi ki donora, hinigi goryogi ki kuyura may.

²⁴ Lini aŋ ɦal gursu kay sa ma wihaw ma ka duk suu mansinana ni, aŋ lam ko sa ma aŋ a fi mbo gursu maŋga egemma naɗi. Aŋ ka joɓom gursura kom u mbooɗi.

²⁵ Lini aŋ cen barawna ay ko ndaraŋ ma vok zina ni, hoŋomma ki ni bay faɗta ɗika.

²⁶ Kay nam kom dew ni vaam ma ŋgom tamma. Aŋ buurumma ki wa ni nam hin buu njeŋge ni u mege? Aŋ li ka ɦammaɗi, nam tii ha kolo egen wa ni an humum tii mamma kay anni sa ma wi hahaw suuna.

²⁷ Aŋ ka ɓak boy ma co eg Lonaɗi, aŋ ka ŋgul mul ma hu njafaŋŋaɗi lay.

²⁸ Aŋ ɦan yam tlegeyeŋ suu neeyna ay ki na zak gaw. Gor njufii suu vuɗ jew varaŋŋa ki ni mansina.

²⁹ Aŋ li u mbutlina ni na lay u timigiina ni na lay, asi vuɗ wa ni li buuna u susi kiɗisiya, hu buu ma kalavandina ni aŋ ɦansina ay ki gaw.

³⁰ Agi hin ki ni a suu man suu teteɗna. Agi ka kom ɦaanaɗi, agi fi ɦaana wa ni ɦam ki maŋ diginina.