KALKIRA 20 - Boy LonanaGaɗta doogora 1 Lona njaɗ boy mamma halaŋ di ana, 2 «Anni Yawe, Lo maŋŋa, ma kalaŋ ay ki hu mbassa Egiptera, ay ki hu mbaɓura. 3 Aŋ vi u lo ma daŋgi ni kan anu. 4 «Aŋ mba vi u loogi suu ceɗesi ceɗinaɗi, u tlesuu kolo huulonaɗi lay, u tlesuu kay ndaŋgaranaɗi lay, u tlesuu ga duk mbona u ndaŋgara ganaɗi lay. 5 Aŋ mba goɓ ga fok loogi suu asinaɗi, sunusiɗi lay, kay anni Yawe, Looŋŋa, Lo ma hurum ya cocona, an tin cora vi somora ha kay goryosiya ha kay njafasi fokosi hindi lay, fiɗi lay, lini asi ka hum unɗi. 6 May kay suu li u gaɗ mandana, an li jivira ha kay njafasi fokosi buɓ buɓ lay suu minin gaɗ manda li uɗ mayna. 7 «Aŋ yi sem Yawe, Lo maŋŋa, ɦawa na gorɗi kay Yawe kaɓakŋa kay suu yam sem gor gorna. 8 «Humuŋ gaŋ kay buu ma koɗ tara, buu namma aŋ golom ki teteɗ. 9 Aŋ li sun maŋga buuna karkiya, li sun maŋga halaŋ, 10 Hu buu ma kiɗisiyana ni buu ma vi Yawe, Looŋŋana. Aŋ li sun hu buu nammaɗi, taŋga lay, goroŋ lay, goroŋga tamara lay, saaŋ ma li sunda varaŋŋa lay, goora sunda lay, yoori maŋsina lay u koy ma mbay varaŋŋa lay, 11 kay Yawe li huulona u ndaŋgara ni hu buu ma karkiyana, li mbo lumma u tlesuu dukumma halaŋ. Hu buu ma kiɗisiyana nam koɗ tamu. Kay ndaɗta Yawe paɗ vunum ki kay buu namma, lam ki teteɗ may. 12 «Aŋ hum ugi buŋ u suŋ jiviya kay a buu maŋ ma Yawe Looŋŋa ɦaŋŋana mbuɗ ŋgol kay ndaŋgara may. 13 «Aŋ ci maɗɗi. 14 «Aŋ li zoŋgaɗi. 15 «Aŋ kulɗi. 16 «Aŋ di dlara co kay ndaraŋgi. 17 «Aŋ ŋgiziɗ ziŋ ndaraŋŋanaɗi. Aŋ ŋgiziɗ caŋ ndaraŋŋaraɗi, ŋgiziɗim saam ma li sunda varammaɗi lay, goora li sunda varambaɗi lay, mbutl mammaɗi lay, korro mambaɗi lay, tlesuu varamma halaŋ maa na nde lay, aŋ ŋgenembi.» Lona tak tam ki olo 18 Suuna hum della, wi welera, hum diffa bura, wi ɦinira ɗus ndoosna may, asi vi tasiya, lak ha ki na day. 19 Asi di Moiz ana, «Ɓakami ay u taŋga ami huma, ka Lona ɓakami ay nambi, lini namu ni ami miɗ kiyo.» 20 Moiz di suuna ana, «Lagi ndaaɗi, Lona mba ni a tukugi ni tukiya kay a ndaaram hin kaki na din din, kay agi li dla coɗi.» 21 Suuna mol ha ki na day. Moiz ɦuɗ tam ha hu li ma ndufun coco ma Lona ka huna. Gaɗta kay li ma ŋgaɗ ɓivunna 22 Yawe di Moiz ana, «Aŋ tuɗ njaɗ suu Israelna ana, cemi agi wi ki ana an ɓakagi ay ni kolo huulona day. 23 Agi ka golonni ko lo ma mini u doonora ɗowba u lorra ɦawa naɗi, ka agi li lo ma minim mininaɗi. 24 «Aŋ minin givin ma togolla u ndaŋgara a lan ɓivunna hura, a li ɓivun ma ŋgalam kina u ɓivun ma heɓpa u yoori suu goorina u suu ŋgolona, hu li ma an tak sen huna halaŋ. An hin mbay egeŋu, hin paɗ vunun ki kaŋu. 25 Lini aŋ min givin ma togolla u gogoyra ni, minim u gogoyra agi ceɗeɗ ceɗiraɗi, kay hu li ma agi a ceɗeɗna ni ndaɗta mbuɗ ki ni njenjee. 26 Aŋ min givin ma togolla ni lam kolo dayɗi, kay a mul ma li ɓivunna ɗiŋ ha kolo na ni suu gana wam siili mamba kiɗi.» |
Bible Moussey © Bible Society of Chad, 2002.
Bible Society of Chad