KALKIRA 19 - Boy Lonana

LONA VI GALAMBA U SUU ISRAELNA Suu Israelna tew kay Ҥinira Sinayra

¹ Hu til ma hindina dagan asi cuk ay ki hu mbassa Egiptera, karam na gawni suu Israelna tew ŋgoo bagi hu fulla Sinayra.

² Asi yow ay hu Refidim mba tew hu fulla Sinayra asi vi ziisi ŋgoo hu fulla. Suu Israelna cuk zina ni vok Ҥinira Sinayra na gay.

³ Na may Moiz ɗiŋ kolo kay ɦinira a ŋgaf u Lona. Yawe yam ay kolo kay ɦinira dam ana, «Aŋ di goryoŋ Yakobma ana, Haɗta wanda aŋ jokoɗ ha ki maŋ goryoŋ Israelna.

⁴ Agi wi dla mayra an laɗ ay eg suu Egiptena u ii tagira, an yowogi ay ki ko bakŋa yow goryom ay kay garaŋamba na, mbaaragi ay ki egenu.

⁵ Wan dara ni lini agi humun delenu, li u galam manda an vaɗ u agira may ni, duk suuna halaŋ agi hin kini a suu mansina. Kay ana ndaŋgara halaŋŋi varanu.

⁶ Agi hinni a muli man suu ɓivunna, agi ki ni a njaf ma teteɗna. Ni boyma aŋ tuɗ dam maŋ suu Israelnana.»

⁷ Moiz mbay kala ni yi suu ŋgolo suu Israelna egemu, cuɗusi boy namma ki halaŋ, boy ma Yawe damma ayna.

⁸ Suuna halaŋ hoŋ dira ana, «Dlara Yawe daɗta halaŋ ami min laɗu.» Moiz hoŋ boy ma suuna damma maŋ Yawe may.

⁹ Yawe di Moiz ana, «Gola an min mbay ta ta egeŋ u ɗugulla doɓorokka, kay ana hu li ma an ɓak u aŋŋa ni suuna hum may, aŋ ɓak u anni asi hum may, a asi tin saa masira kan a fafaɗta.» Moiz tuɗ boy ma vi suunana maŋ Yawe may.

Lona ŋgaf u Moiz kay Ҥinira Sinayra

¹⁰ Yawe di Moiz ana, «Tuɗ eg suu Israelna asi li tasi ki teteɗ karami, vinni asi mbus barawi masisina ki may.

¹¹ Hu buu ma hindina ni asi juɓa, kay hu buu ma hindina ni Yawe hin cuk ay ga kay yam ɦinira ii suuna halaŋ.

¹² Aŋ ŋga li ma suuna mba lak huna kiyo, dasi ki jiviya, hin sa a ɗiŋ ay kolo kay ɦiniraɗi, ka sa ŋgen kom egeɗɗi lay. Sa ma tin kom eg ɦinira tana cam kiyo.

¹³ Sa ma ŋgen kom eg ɦinirana sa ka tin kom egembi lay, agi hin gikim ki u gogoyra ɗowba cokom u yagara. Va ma ŋgen ɦinirana, lini sa war lay, yoo lay ka kak iiriɗi. Hu li ma tokolomma bu wa ni suu ɦiw hin ɗiŋ kolo kay ɦinira.»

¹⁴ Moiz cuk ay ki ga kay ɦinira mbay eg suuna. Nam li suuna ki teteɗ, asi mbus barawi masisina kiyo.

¹⁵ Nam di suuna ana, «Hu buu ma hindi cana ni agi lak juɓpa, sa ŋgen tam eg caambaɗi.»

¹⁶ Hu buu ma hindina maɗiira a fo kira ni, della ɓak may, welera li may, ɗugulla doɓorokka kuluɓ ki kay ɦinira, del diffa bu ay saɓak cocoo, suuna hu ɦoŋzina halaŋŋi dlak ki na jik jik.

¹⁷ Moiz cuk suuna ay ki doŋ kaana a tuɗ ŋgaf vok Lona, asi mol ga u ɦinira halaŋ.

¹⁸ Ҥinira Sinayra ɗus kini ndoosna bel bel. Kay ana Yawe cuk ay ga ni u kura. Ndoosna wul kolo ko ndoos kura ay ga hu zul ŋgollara na, ɦinira halaŋ geŋeɗ kini na jik jik.

¹⁹ Del diffa col kolo ni coli na ɗow ɗow, Moiz ɓak ha may, Lona hoŋom dira ay ko lo ma bayra na.

²⁰ Yawe cuk ay ga kay Ҥinira Sinayra. Ay kolo kay yam ɦinira ni Yawe yi Moiz ay kolo kay yam ɦinira. Moiz ɗiŋ ha kolo may.

²¹ Yawe di Moiz ana, «Ɗiŋ ha ki ga tuɗ ne yam suuna ha kiyo, ka asi calaɗ li ma ŋgaam ki maŋ Yawe a golomma kiɗi. Asi li wa na ni asi hin puk cocoo.

²² Muli suu li ɓivunna lay lini asi a ɦuɗ tasi ay eg Yawe ni li tasi ay ki teteɗ, li ka naɗi ni Yawe casi kiyo.»

²³ Moiz di Yawe ana, «Suuna ka ndak a ɗiŋ kolo kay Ҥinira Sinayraɗi. Kay aŋ neemi ki ana, Ŋga ii li ma suuna lak huna kiyo, li ma teteɗna hinim ki may.»

²⁴ Yawe dam ana, «Hoŋ ha ki gaa, kay aŋ hin ɗiŋ ay kolo ni ko taŋ u Aaron. Muli suu li ɓivunna u suu halaŋŋa ka asi ɦuɗ tasi ay ɗi.»

²⁵ Moiz ɗiŋ ay ki ga eg suuna dasi ana.