KALKIRA 17 - Boy Lonana

Mbona sel ay ki duk ɦinira

¹ Suu Israelna hin fulla Sinda ka tani tuɗ fokko ko Yawe ka ɗegeeresira na. Asi cuk ziisi hu Refidim, hu li namma ni yo ma asi ci ka huɗi.

² Suu Israelna yal u Moiz ana, «Ҥami yo ma cira aya.» Moiz dasi ana, «Agi yalanni kay mege? Agi min a tuk Yawe ni kay mege?»

³ Hu li namma suuna laara casi cocoo, suu Israelna gurni eg Moiz ana, «Aŋ a cukumi ay ki hu Egipte ni kay mege? Hin a laɓami ki u laara, ami lay, goryomi lay, yoori mamisina lay ni amege?»

⁴ Moiz cen Yawe ana, «An hin li suu asina ni ana mege? Hin ew ni asi hin gikin ki ni u gogoyra.»

⁵ Yawe di Moiz ana, «Jak fok suu Israelna, yow suu ŋgolo uŋ ɦiw, tli tokolo maŋga aŋ waɗ lumma Nilna ay u ndaɗta may, tuɗa.

⁶ An hin col ha fokoŋ kay Ҥinira Horebba may. Aŋ tuɗ waɗ ɦinira, mbona hin sel ay kiyo, suu Israelna hin ciya.» Moiz li na fok suu ŋgolo suu Israelna halaŋ.

⁷ Nam tin sem li namma ana Massa u Meriba, Tukka u Honira, ni ko yal ma suu Israelna yal u namma. Kay asi tuk Yawe di ana, «Na ni Yawe ka dukuygi gasi su?»

Amalek duu u suu Israelna

⁸ Amalek mba duu tam u suu Israelna hu Refidim.

⁹ Moiz di Josuwe ana, «Manay suuna cukugi ki vin a tuɗ duu u Amalek, an hin col kolo kay lii mbuuyna, ni tokolora vi Lonara kon may.»

¹⁰ Ko Moiz damba na may ni, Josuwe yow suu duuna a duu Amalekka may. Asi duu na ni Moiz may, Aaron may, Hur may ɗiŋ ki kolo kay li mbuuyna.

¹¹ Moiz tli kom kolo wa ni suu Israelna mbuɗ saɓak cocoo, hu li ma Moiz gi kom ga wa ni Amalek mbuɗ ay saɓak coco may.

¹² Moiz kom loɓ ki wa, mbuɗ nek cocoo, asi lagaɗ ɦinira gamba um nam kak kaɗu. Gi Aaron u Hur sa col keŋem hiŋŋa dew may dew may, yowom kom koloo. Kay ndaɗta kom col kolo eŋ ta ta faɗta ɗika.

¹³ Josuwe su kay suu duu suu vi Amalekŋa casi u ŋgewina cocoo.

¹⁴ Yawe di Moiz ana, «Ɓii boy namma kaŋgaa, hinim a maa kiɗi. Di boy namma maŋ Josuwe may. An hin bulum Amalek ki duk suu warna. An bulumum sem ki kay ndaŋgara halaŋ.»

¹⁵ Moiz min givin ma togolla, tinim sem ana, «Yawe ni sa ma haɗanna.»

¹⁶ Hin di ana, «Sana tli kom kolo eg dlamba mulla vi Yawe, ni duuna duk ɦoŋ Yawe u Amalek a fafaɗta.»