KALKIRA 15 - Boy Lonana

Soolla vi Moiz u Miriyam

¹ Moiz taɓ u suu Israelna gi soolla maŋ Yawe di ana, An min geleɗ bibiŋil Yawera, nam weleɗ wele mamba. Nam ndak a suuna ŋgaam cocoo. Nam li dlara mbuɗ mbuɗta ta ŋgolla. Kulumina u suu kasina, nam cukusi ki duk mbo lumma.

² Saɓakan u sool manda ni Yawe. Nammi sa ma suɗun kina. Nammi Loonna an geleɗemu. Lo ma vi bunna an ŋgaamu.

³ Yawe ni sa ma duuna. Semmi ana, Yawe.

⁴ Pus pusna u suu duuna vi Faraw. nam cukusi ki duk mbo lum ŋgolna. Suu duu mam suu nam mansina cim kaŋga duk mbo Lumma Cerewna.

⁵ Asi ba kaŋga hu gaalina. Asi sel ga hu zul ŋgolla ko ndal gogoyra na.

⁶ Yawe bikiŋ ma njufna ka takaŋ saɓak maŋŋa kiyo. Bikiŋ ma njufna, Yawe, kus suu babali maŋsina kiyo.

⁷ U ŋgol maŋga cocora, aŋ ci suu babali maŋsina kiyo. Huruŋ ɓeŋ wa ni aŋ lasi coo, aŋ ŋgalasi ki ko ŋgayara na.

⁸ Semeɗ ma cuk ay ki ciniŋŋa tok mbona ki kel tamu. Mbo ma ɓaɗna col ki kay tam ko daamma na. Gaalina tos ki lay.

⁹ Suu gonok mamisina di ana, ami dikisi usi tuɗ vasi ɗaŋ. Ami hin ɓorowosi tlegeyesi ki komiya, hoɓ hayami ki ɗaŋ. Ami guu sii ŋgewi mamisina komi ki mini a kara may.

¹⁰ Aŋ gi babaa ma ŋgolna aya. Mbo lumma hoŋ kuluɓ kasiya. Asi sii ga u lumma ko kawi ma nekŋa na. Ni duk mbo ma ŋgol cocona.

¹¹ Yawe, duk loogina halaŋ ma ko ndal aŋ nana ni gege? Sa ma ki teteɗ ko aŋ nana ni gege? Ma ndaki a li dlara mbuɗ mbuɗta nana ni gege?

¹² Aŋ maɗ koŋ ma njufna ki na ni, ndaŋgara likisi gaw.

¹³ U ɗegee maŋga aŋ tak voɗta maŋ suu maŋ suu aŋ buɗusi ay kina. Aŋ golosi u saɓak maŋŋa. Tinisi ki hu liiŋ ma teteɗna.

¹⁴ Suu daŋŋa hum na ni mbuɗ ki ndaa cocoo. Suu Filistina halaŋ mbuɗ ki ndaa cocoo.

¹⁵ Muli suu Edomma mbuɗ ki ndaana. Muli suu hu Moabma mbuɗ dlak ndaana lay. Suu cuki hu mbassa Kanaanda halaŋ paɗ ki kolo na fak.

¹⁶ Ndaa ma ŋgolna ndi kay suu asina cocoo. U bik koŋ ma saɓak cocona asi seŋ vunusi halaŋ halaŋ. Hu li ma suu maŋsina ka jakŋa, Yawe, suu aŋ suɗusi ay kina hu li ma asi tuɗna.

¹⁷ Aŋ, Yawe, tuɗusi kiyo, lakasi kay ɦini maŋga ni hu li ma aŋ hin kak dukusina. Koŋ min li namma ni namu, Bu Suuna, min ni mbutluɓ ma teteɗna.

¹⁸ Yawe kaki mulna ni a fafaɗta.

¹⁹ Kulum ma vi Farawna u pus pus mamsina u suu kulumina, u suu mam suu duuna cuk duk mbo lumma. Yawe hoŋosi mbo lumma ay kasiya, may suu Israelna calaɗ lumma kini sesi laɓ kaɗi.

²⁰ Miriyam, cara jok vun Lona, wayaŋ Aaronda, tli dadarira koɗu, boyogina cuk ay ki uɗ halaŋ halaŋ, gi soolla, luu may.

²¹ Miriyam gasi u soolla ana, «Geleɗegi bibiŋil Yawera, nammi sa ma saɓak cocona. Nam ndak a suuna ŋgaam cocoo, kulumina u suu kasina halaŋ nam cukusi duk mbo lumma.»

SUU ISRAELNA POY ŊGOO BAGIYA Mbo ma hu Marana

²² Moiz u suu Israelna hin lum ma Cerewna ka ki tani tuɗa, asi tin irisi ŋgoo hu fulla yaɗ ana Kurra na ɗow. Asi tuɗ ta ta buuna hindi ŋgoo hu fulla ka fi yoɗi lay.

²³ Asi tew hu li ma dew yam ana Mara, asi ka ndak a ci yo ma hu Maranaɗi, kay nam galaari, ni ko sem tini wanda na. Mara ni ana galaara.

²⁴ Suu Israelna gijaŋ gurni u Moiz ana, «Aygi hin cini mbo mege?»

²⁵ Moiz cen Yawe, Yawe takam gu ma dew, ana nam gam duk mbona, ni mbona hin mbuɗ ki jiviya. Hu li namma ni li ma nam tinisi gaɗta u dlara asi a laɗta ay huna. Nam ɦasi mbo ma cira may.

²⁶ Nam dasi ana, «Anni Yawe, Loogina. Lini agi hum unu, lini agi li dlara an miniɗta, lini agi vi u gaɗ manda halaŋŋi, an ka tinigi tuguɗira an tiniɗ ay kay suu Egiptena wanda kagiɗi. Kay anni Yawe ma garaɗagi kina.»

²⁷ Asi tew hu Elim, hu li namma asi fi mbo ma lawra huna zeɗ zeɗ doogo yam mba', ŋgus manawra hu li namma na dok-kiɗisiya may. Asi vi ziisi tok eg mbo namma.