KALKIRA 14 - Boy Lonana

Faraw cuɗ u suu Israelna

¹ Yawe di Moiz ana,

² «Di suu Israelna ana asi hoŋ ay mba cuk fok Pi Hahirot na, duk ɦoŋ Migdol u lum ŋgolna na. Ni vok tasi u Baal-Sefon na, agi cukŋi fun lumma kolo na peɗeɗ gaw.

³ Faraw hin dini ana, Ŋgola suu Israelna viɗ ki wa, asi ka dafaɗ ŋgoo bagi hu fulla hu mbas mayra tuwa. Bagira dug vunuɗ kasi wa.

⁴ An hin so huu Faraw, nam hin dikisi usiya. An hin ŋga tan kay Faraw u suu duu mamsina, suu Egiptena hin wi ki ana anni Yawe.» Asi hin li ni na may.

⁵ Asi tuɗ di mulna ana suuna pii wa. Faraw u suu sun mamsina mbuɗ hurusi ni na gaw kay suu Israelna, asi di ana, «Aygi a li na ni dla mege? Aygi hin suu Israelna hiniygi sunda ka koygi na ni nanage?»

⁶ Nam gan kulumina u pus pus mamma, yow suu mamsina um may.

⁷ Nam yow kulumi suu pus pusna kis kis karkiya, kulumi suu pusna suu hu Egiptena halaŋ u suu duuna kasi bel bel.

⁸ Yawe so huu Faraw mul ma Egiptena, nam dik u suu Israelna, suu Israelna cuk ay ki ni u furira kosi tlii kolo cocoo.

⁹ Suu Egiptena cuɗusi usiya, tuɗ fasi fun lumma, kay asi cukŋi fun lumma huwa, kulumina u suu fuli kasina halaŋ, Faraw u suu duu mamsina bel hin tok a tew hu Pi Hahirotta, fok Baal-Sefon.

¹⁰ Faraw mbay egesi na tok, suu Israelna gol irisiya ni suu Egiptena egesi ni na tok gaw ka cuɗusi usi aya. Suu Israelna mbuɗ ki ndaa cocoo, asi gijaŋ yi kolo eg Yawe.

¹¹ Asi di Moiz ana, «Aŋ a mbaarami ki tani na ni ndaŋgara pamira ha ka hu Egipteɗi su? Aŋ mba baami ki ŋgoo tani ni kay mege? Aŋ a lami egemi na ni dla mege?

¹² Ami daŋ ay Egipte ni ana mege? Ana hinimi ami sun suu Egiptena, jivira ni ami sun suu Egiptena su mayra ami miɗ ki ŋgoo tani wanda.»

¹³ Moiz di suuna ana, «Lagi ndaaɗi, lakagi jiviya, gologi suɗta Yawe hin suɗugi ki karamba. Suu Egipte suu agi wasi karam wanna, agi hin ka wasi oloɗi.

¹⁴ Yawe hin duu kagi ni namu. Agi may ni lakagi na en.»

Lona mal voɗta duk mbo lumma

¹⁵ Yawe di Moiz ana, «Aŋ tii egenni kay mege? di suu Israelna asi cuk tasi hu voɗta.

¹⁶ Aŋ may ni tli tokolo maŋga, maɗ koŋ kolo kay mbo lumma ɓorowom irim kiyo a suu Israelna tuɗ duk mbo lumma ni sesi laɓbi.

¹⁷ An may ni hin so huu suu Egiptena a asi cuk ha u suu Israelna dagan may, an hin ŋga tan kay Faraw u kulumi suu duu mamsina u suu mam suu duuna halaŋ, suu kulumina lay.

¹⁸ Suu Egiptena hin wi ki gasi ana anni Yawe, ni hu li ma an hin ŋga tan kay kulumi suu pus pusna vi Faraw u suu mam suu duunana.»

¹⁹ Sa sunda huulona ma tuɗ fok suu Israelna jak a tuɗ ha fok suu Israelna gi tam ha kay ceresiya ɗugulla tuɗ ha fokosi may, hin col ŋgoorosi hu may.

²⁰ Ɗugulla kal ki duk ɦoŋ suu Israelna u suu Egiptena. Ɗugulla ka may, ndufunda li cocoo kay suu Egiptena. Njeŋge ni ndaɗ li kiɗikka kay suu Israelna, may ni asi jakŋi sa ka ɦuɗ eg tam tokgi.

²¹ Moiz maɗ kom ki kay mbona, Yawe hu njeŋge ndaɗta ni tok mbona ki keŋ u babaana ŋgol cocoo, nam so mbo lumma ki halaŋ, mbona wak ki duku,

²² Suu Israelna calaɗ mbo lumma kini sesi laɓ kaɗi, mbona col ki keŋesi ko ndal gulumunna na, ki bik njuf may, bik gulu may.

²³ Suu Egiptena cuɗusi usi ay cuk usi duk mbona may. Ni kulumi suu pus pus suu vi Farawna u suu duuna halaŋ, mba tew ki duk lummara gay gayra.

²⁴ Col ay njeŋge day u kura ka vi kasi hu ɗugullara, Yawe ka gol suu Egiptena may. Nam gasi dlara da damba dukusiya.

²⁵ Nam ɓalakasi sem pus pus masisina kiyo, tuɗ masira tuɗ u suu Israelna mbuɗ loɓ cocoo. Suu Egiptena di ana, «Piiriygi ki day eg suu Israelna, kay Yawe ka njun kasi ni namu.»

²⁶ Yawe di Moiz ana, «Maɗ koŋ kolo kay mbona, mbona hoŋ ay ga kay suu Egiptena, kay pus pus masisina u suu kulumina.»

²⁷ Moiz maɗ kom kay mbo lumma, ni lina hin tok a fo kira may, mbona hoŋ ay hu balamam ma jewna halaŋ. Suu Egiptena pii ni hoŋ hani dukum na ɗow. Yawe yow kom ki kay suu Egiptena duk mbo lumma.

²⁸ Mbona hoŋ ay tluɓ kulumina u pus pusna u suu kulumina u suu duuna vi Faraw halaŋ, suu may suu cuk ay duk mbona u suu Israelna bel bel sa maa hin ka ki dewɗi.

²⁹ Na may suu Israelna jak ay duk mbo lumma ni sesi lay laɓ kaɗi. Mbona col ay ki keŋesi kolo ni ko ndal gulumunna na, kay bikisi njuf may, gulu may.

³⁰ Hu buu namma Yawe suɗ suu Israelna ki ko suu Egiptena. Suu Israelna wi suu Egiptena miɗi ɗoŋ lumma cocoo.

³¹ Suu Israelna wi dlara eŋga Yawe laɗ eg suu Egiptenara ki u irisiya. Suu Israelna li ndaa Yawe cocoo, asi tin hurusi kay Yawe kay Moiz saam ma sunda lay.