JOB 39 - Boy Lonana

¹ Aŋ wi til ma ɦura boyna vuɗ huna su? Aŋ wi dukka vuɗta seŋ dew su?

² Aŋ ndumusi tilisi ma vuɗta su? Aŋ wi buu maa asi a vuɗ huna may su?

³ Buu maa asi vuɗ huna asi las cocoo may kak njokŋi asi vuɗ ki gaw. Tasi koɗ ki ko las ndaɗta.

⁴ Goryosi wula, fi saɓakŋa may. Asi cuki bunsuwa ni ka hoŋ ay dagan oloɗi.

⁵ Sa ma buɗ korra ŋgoo bagira kina ni gege? Sa ma fokoɗ zew ma seɗna ki hiniɗ ndaɗ tuɗ ki buɗina ni gege?

⁶ An cukuɗ ha ki hu li ma yo ka huɗina. Ha ki kay ndaŋgara galak cocora.

⁷ Ndaɗ ka ŋgaf u kiɗikka hu ɦoŋzi ŋgolnaraɗi. Ndaɗ ka hum bayra vi malaɗnaraɗi lay.

⁸ Tiiɗna ni ɦinira ndaɗ ka poy kolo kaɗta. Ndaɗ hal haɗ ma ŋgolomma kolo kay ɦinira ni u mbeleŋŋa cocoo.

⁹ Vunda ndak a mbay a laŋ sun maŋga su? Ndaɗ ndak a mba buu vo u katlaŋ maŋga may su?

¹⁰ Aŋ ndak a haɗaɗ a zumuŋ sene maŋŋa su? Haɗaɗ a ndaɗ nja yam zumma hu ɦuɗugumba su?

¹¹ Aŋ ndak a tin huruŋ kay saɓak maɗna a hiniɗ sunda loɓoŋ taŋga koɗ halaŋ su?

¹² Aŋ ndak a tiniɗ a yowoŋ wa maŋŋa ay vora a feɗeŋ tlena ay vora su?

¹³ Garaŋ erketta viriw u furira, aŋ goloɗ ha na ni ko ndal garaŋ bakŋa u tlimiɗta hura na.

¹⁴ Ndaɗ tos seeɗ ga duk ŋgetlna, nam gi sena ki kura, hin etlem ay kiyo.

¹⁵ Humuɗ maa ki kayra ana sem sa hin tayam ki kalagera. Vabak ma ŋgoo bagi hin tayam ki ga kalage.

¹⁶ Suusi golosi ni ko gor suu daŋŋa na ka caa yaɗ kasiɗi lay. Ndaɗ ka loɓ taɗ kasi ana asi hin ba ki kalageraɗi.

¹⁷ Kay ana Lona ɦaɗ yalna kaɗi, mbeleŋ ma wi dla ka iriɗɗi lay.

¹⁸ Lini ndaɗ col ki kolo wa a liŋŋa ni ndaɗ san u kulumina u suu fuli kasina ni sanni ɦawaa.

¹⁹ Aŋ ɦal saɓakŋa maŋ kulumma ni aŋ su? Aŋŋi sa ma dayam belesemma su?

²⁰ Aŋŋi sa ma lam a weɗ kolo ko baa njeena nana su? Gu digimba tii ha ɦirra mbuɗ sa ma babali mamma ndaana.

²¹ Nam ci sem kaŋga kay ndaŋgara hu ɦuɗugumbara u furira u saɓakam halaŋ. Nam gi tam fok kawi ma duuna vi suu babali mamsina.

²² Nam san u suu ndaana ni sanaya. Nam ka caa yam kay dlaɗi lay. Duuna hoŋom ka ki dagan ni nambi lay.

²³ Gu mbuurura u saɓagina soo kammi na ɦur. Kawina ɓo kolo ni na buruk buruk.

²⁴ Siisi vira na njim njim ka ndaŋgara kolo na dis dis. Hu li ma asi hum bu tokolomma wa ni, tasi ka viɗi.

²⁵ Asi hum bu difna wa ni, san ki ana ha ha. Ha ki na day lay ni asi ɓorow della duuna ki u del sa ma ŋgol asgaana ta bay ayra kiyo.

²⁶ Aŋŋi sa ma di yarakka ana ndaɗ pii tin iriɗ ha ki dali nana su? Hu li ma ndaɗ ka ko garaŋaɗ a piirana aŋ daɗ ni aŋ su?

²⁷ Bakŋa col min ziim kolo kay ɦinira na day ni dammi aŋ su?

²⁸ Nam cuk ha ki kolo kay ɦinira min ziim ha huwa. Kolo kay yamba feɗira day hu li ma sa ka ndak a tuɗ huɗina.

²⁹ Ay kolo hu li namma nam ka gol tiim ma nam a tamma. Irim wi lina ha ki ni na day.

³⁰ Goryom ci a yona ni busuna. Li ma vana ka ci huna ni asi tuɗ ni huwa.