JOB 38 - Boy Lonana

Bol Lonara nam daɗ maŋ Jobpa Job 38.1—42.6 Boy ma Lona dam jewna

¹ Yawe hoŋ dira ay maŋ Job duk babaa ma ŋgolna di ana,

Lona

² Sa ma ndak a doron ŋgom manda u boy ma bolow um kaɗina ni gege?

³ Min taŋ, col ko sa njufna na, an min joɓoŋu aŋ hoŋon dira aya.

⁴ Hu li ma an min ndaŋgarana ni aŋ ka ni arage? Aŋ sa ma wi dlara cocona may ni hoŋon dira aya.

⁵ Sa ma ŋgaaɗna ni gege, aŋ wam su? Sa ma yow zewna kom a ɓiiriɗna ni gege?

⁶ Va ma vaɗ kolo eŋŋa um coli ni kay mege? Sa ma gi gogoyra kaŋga a miniɗ uɗ jewna ni gege?

⁷ Na may ciciwra u vel ma fo lina ka gi soolla furira. Suu sunda huulonna ka li furira cocoo.

⁸ Sa ma dug vun mbo lum ŋgolna ki hu li ma nam a ɓaɗ ay ki hu zulumma ni gege?

⁹ Hu li ma an kuluɓum ɗugulla ndufunda ki kamu, dugum ki u kut ma doɓlok cocona may.

¹⁰ An ŋgaam liim ma nam do huna ki wa. An dugum vunum ki u cokoromma.

¹¹ An dam ana, «Aŋ do ni tani na ga, jak fokgi. Bil maŋ ma ɓaɗ guk gukŋa do ni tani na ga.»

¹² Hu li ma aŋ ka iiri dayna buu maa dew aŋ gaɗ lina ana nam fo ay ki toŋgo zak ɦoy su? Aŋ tak lina maŋ maɗiira a ndaɗ fo ay ki hura dew su?

¹³ Kay a maɗiira fo ki kay yam ndaŋgara halaŋ, a gi u suu li dla cora ay duk njeŋgerana kiyo.

¹⁴ Ndaŋgara mbuɗ ki tlaw tlawra ko luɓu dlarina na. Mbuɗ ki ko ndal barawna tam joki zeɗna na.

¹⁵ Na may suu li dla cora kiɗik masira ka oloɗi. Kosi ma li dlara saɓakŋa kus ki wa.

¹⁶ Aŋ do u mbo lum ŋgolna ta daɓpa ay ki yaŋ dew su? Aŋ poy ay ki hu zul ŋgol mayra uɗ ka doɗira dew su?

¹⁷ Sa takaŋ vun grek ma vi suu miɗina ay ki wa su? Aŋ wi ŋgus lina vi suu miɗina ay ki wa su?

¹⁸ Aŋ ndak a wi ŋgol ndaŋgara ta minira su? Ɓiiriɗ bubuuɗ ay gege, aŋ sa ma waɗ ki cocona.

¹⁹ Li ma kiɗikka col ay huna ni ara na ɗowge? Li ma ndufunda buuri huna ni arage?

²⁰ Aŋ ndak a wi li ma voɗoɗ tli huna su? Aŋ ndak a daɗ ana ndak hoŋ voo na su?

²¹ Aŋ ndak a wasiya, kay aŋ ay ki ni vuɗiya. Basaɗaŋga kay ndaŋgara wanda ŋgol cocoo.

²² Aŋ tuɗ ta ta wi li ma dlaŋmagina ay cuki huna ki lay. Aŋ wi u li ma nam col ay huna kiyo.

²³ An ɗokommi kay buu maa yoora, kay buu maa duuna u njogoɗta.

²⁴ Li ma faɗta kal ay ki huna ni ɓal manage? Babaa ma u maɗiinana col irim ay ni ara na ɗowge?

²⁵ Sa ma wak voɗ mbo lo ma si ay kolo huulonna ni gege? Sa ma tak voɗ ɗugulla a poy kolora ni gege?

²⁶ Ndaɗ si mbona ha ki kay yam mbassa sa ka cuki huɗira, si ha ki ŋgoo bagi hu li ma sa war ka huɗina lay.

²⁷ Kay a loɗ yam ndaŋgara, a ɗuf tlena kay ndaŋgara, a mbuɗ tlesuu iirina hu li ma va ka huɗina.

²⁸ Mbo lona na ni bum ka may su? Sa ma gi mbaɗagira ayna ni gege?

²⁹ Mbo ma nek kina col ay ni huu gege? Sa ma gi kuɗna ay kolo huulonna ni gege?

³⁰ Mbona mbuɗ ki ko ndal ɦinira na. Gaalina tos ki lay.

³¹ Gol dumussa kolo huulona gige. Aŋ ndak a taɓasi ki kel tasi na dew su? Aŋ ndak a ja zew ma taɓ duk ciciwra eg tasina ki su?

³² Ndak a tak ciciwra zeɗ zeɗ doogo yam mba' u tilna halaŋga ki su? Tuɗ vel ŋgol ma yam ana Ursna u ciciwra um gorira hu voɗosi ɗegee may su?

³³ Aŋ wi gaɗta vi huulonara su? Aŋ ndak a takasi gaɗ masira ki kay ndaŋgara tani may su?

³⁴ Aŋ ndak a ɓak ha maŋ ɗugulla ana ndaɗ si mbona ay kay ndaŋgarara su?

³⁵ Aŋŋi sa ma ndak a sun kiɗikka daɗ ana ndaɗ liya ni ndaɗ ndak humuŋ vunuŋ di ana gola an wanni na su?

³⁶ Sa ma ɦal yalna huu lay ma ciw goloŋiina ni gege? Sa ma ɦal mbeleŋŋa huu golok tlekŋana ni ge mayge?

³⁷ Sa ma yal coco ɦay ma wi ndum ɗugulla kina ni gege? Ma ndak a vo mbo ma kolo huulonna ay ki ga halaŋŋa ni gege?

³⁸ Ndaŋgara coɓ ki kel taɗ eŋga ko ndal gogoyra na. Huu senena mbuɗ ki deɓelekka ko li ma yoyolla na.

³⁹ Aŋ ka ɦal tina maŋ dlona ni aŋ su? Aŋ ka wulum goryommi aŋ su?

⁴⁰ Hu li ma asi ka juɓ mbuurina hu zulusiya, asi ka buuri juɓ ti ma asi a tamma.

⁴¹ Sa ma ɦal tina maŋ gagawna ni gege? Hu li ma goryom ka tii kolo a juɓ Lona. Asi ka mbuɗ maŋiya kay va ma asi tam kaɗi.