JOB 37 - Boy Lonana

¹ Kay ndaɗta hurun ka mbusuk kurufu hurun cocoo. Nam ka bu na vik vik.

² Humugi del Lona ta bayra haa. Delem ka ɓak ay u saɓakŋa cocoo, ka yala.

³ Lona kal weleɗ mamba ki hu lina halaŋ. Weleɗ mamba tuɗ ta ta tew vun ndaŋgara do ay na dora.

⁴ Ŋgoo dagan ay hum del Lona ka baya. Del Lona bay u saɓakŋa cocoo. Kak ew olo ni Lona gi weleɗta ay ni na gaw.

⁵ Lona bay ni u saɓakam halaŋ. Dlaamba mbuɗ mbuɗta ta sa ka ndak a waɗ uɗɗira.

⁶ Lona di dlaŋmagina ana, «Aŋ yak ga kay ndaŋgara.» Nam sun mboom ay si kay ndaŋgara ŋgol cocoo.

⁷ Nam ɓalak sunda vi suu warnara kiyo, kay a suuna wam sun mam namba kiyo.

⁸ Vabakgina cuk hu zulusiya. Asi tuɗ buu kay zibok masina.

⁹ Babaa ma ŋgolna col ay ni daliya. Semeɗ ma ŋgaɓa ŋgaɓana col ay ni mbayaw may.

¹⁰ Musukka Lona musuk ay nara mbona halaŋ nek kiyo. Mbo ma hu lummana mbuɗ ki eŋga ko ndal kawina na.

¹¹ Lona mbuɗ ɗugulla ay ki mbona, ɗugul ndaɗta lay ka li kiɗikka kiyo.

¹² Nam ka pereɗ tlena kolo halaŋŋi, ko ndaɗta na kay a asi li halaŋŋi, u min mamba dlara nam min a asi laɗ hu duliyara tanira halaŋ.

¹³ Lona ka tak min mamba ki kay ndaŋgara, lini a gi sa daŋgayna ɗowba a li jivira.

¹⁴ Tin humuŋ hum jiviya, Job, col na zol ni gol dlara mbuɗ mbuɗta vi Lonara.

¹⁵ Hu li ma nam ka li tle asina ni aŋ wi su? Aŋ wi dla mayra nam ka weleɗ kolo duk ɗugulla wandara su?

¹⁶ Aŋ wi va ma ɗugulla coli kamma su? Ndaɗ ka tak dlara mbuɗ mbuɗta ki cocoo.

¹⁷ Aŋ ma hu li ma semeɗ ma dalina mbay wa ni, baraw maŋŋa mbuɗ egeŋ zamal cocoo.

¹⁸ Aŋ ndak a njun Lona hu li ma nam ka min huulonana su? Nam eŋ cocoo ko ndal kotorom kawina na.

¹⁹ Aŋ tuk takan dlara an a dambara ay tu gige. Ay ka ndak a ci way u nam ko ndufunda ka kay wandaɗi.

²⁰ Hu li ma an ka ɓakŋa sa ndak a tuɗ dam yam ha ki ana an ka ɓaka su? Sa ma tuɗ a cuɗum dla ndaɗta cuɗi su?

²¹ Li na gaw ni sa ka wi kiɗikka oloɗi. Ɗugulla kuluɓ lina ki ndufunda wa. Olo ni, babaana paɗ aya, tok ɗugul ndaɗta ki wa.

²² Kiɗik mayra wi cocora col ay mbayaw na. Ŋguy kay Lona na weleɗ mayra li tara ndaana cocora.

²³ Ni saɓak ma ay ka ndak a tew egembina. Ŋgol coco u saɓakŋa lay u ɗegeera lay. Nam ka li sa ma ɗegeera ka hurum coconaɗi.

²⁴ Kay ndaɗta suu warna lam ndaaramu. Nam may ni ka caa yam kay suu ŋga tasi ana asi wi dla ɦaynaɗi.