JOB 36 - Boy Lonana

Boy ma Elihu dam a fiɗirana

¹ Elihu tuɗ fok u boyna di ana,

² Vi taŋ na nde, humun vunun haa. An min haɗaŋ dlara vi Lonara haa.

³ An min haɗ ni dlara ay ki na dayra a tak ki ni sa ma lanna.

⁴ A gasira ni boy manna ni ka kaboyɗi. Sa ma egeŋ wanna ni sa ma wi dlara ki gasina.

⁵ Gol ɦiza vi Lonara gige. Nammi ka sa ma di ana, «Va ma wanna ka karam konɗinaɗi.» Nammi ɦizi hu dlaamba nam min a laɗta bel.

⁶ Nam ka hin sa ma dlam cona kak iiriɗi. May nam wi hahaw suu ka lasna.

⁷ Nam ka tli irim ki kay suu ɗegeenaɗi. Asi ka laki kay dlamba mulla u mulina dew, asi lak hu na gak gak. Asi may ni ŋga tasiya.

⁸ Lini asi ka vii daŋgayna njuni ga u kinjiŋŋa, lini asi njuni ga u zewna hu lassa,

⁹ Lona takasi sun masira asi laɗta ki irisiya. Asi mbuɗ suu duu u Lonana ni kay ŋga taasira.

¹⁰ Nam vasi humusi ki jivi kay gaɗta nam dasirara. Nam dasi ana asi hin dlaasira cora kiyo.

¹¹ Lini asi huma, hoŋ yasi ga wa ni, nam hin daɓasi buu masina ni u furira. Basa masira hin daɓmi u jivira may.

¹² Lini asi ka humbi ni, asi hin miɗ ni maɗ kawina. Asi hin ba ki ni kay dla coosira may.

¹³ Li ni kay suu ka wi Lonaɗina suu hurusi ki sooyna ni, nam dugusi daŋgayna wa ni ka caa yam kasi a malasi ki oloɗi.

¹⁴ Asina ba ki ni u gori tasiya. Iiri masira ba ha ki ni duk gawlaŋina.

¹⁵ Lona buɗ suu wihawra ki hu hahaw masira. Nam neesi ki ni u lassa asi ka las wandara.

¹⁶ Aŋ may ni nam min paɗaŋ ay ki duk wihawra, mbaraŋ ki hu li ma va ka ɦeɓeŋ oloɗina. Tabul ta aŋ ti kaɗta yaɗ hin oy ki u ti ma jivina.

¹⁷ Lini aŋ tuɗ fok u huu ma cona eg Lona ni, ɓakŋa vaŋ wa.

¹⁸ Ka a huruŋ ma ɓeŋ kina, zuɗuŋ a ŋgul Lonaɗi. Ka aŋ ganyam taŋ ana aŋ ndak a gus jivira ko Lona u tlesuu aŋ ɦasina naɗi.

¹⁹ Ɓege maŋga u lor maŋga lay ni ka ndakgi. Saɓak maŋŋa lay ni ka ndakgi.

²⁰ Tin saa maŋga kay njeŋgera suuna halaŋ hin ba ki huraɗi.

²¹ Gol taŋ jiviya, hin taŋ a hoŋ hu dlara dadambaɗi. Kay ndaɗta lassa laŋ cocora ni na.

²² Gola, Lona nam saɓak coco hu dlaamba. Sa ma ndak a haɗ jivi suumma ni gege?

²³ Sa ma ndak a golom poy mamba ka su? Sa ma ndak a dam ana, «Aŋ li ni coona ni gege?»

²⁴ Sun mamba halaŋŋi humuŋ gaŋ kaɗu. Saɓagelay ni suuna ka ŋgaamu.

²⁵ Suu hu duliyarna halaŋ ka golom dlaamba. Asi lak na jim. Ha na day ni suuna ka ɓorowoɗ iriɗ kiyo.

²⁶ Lona nam ŋgol cocoo. Ay ka ndak a ŋgaambi. Basaɗam ka ndak a ndumbi lay.

²⁷ Nam taɗ mbona aya, hin lawam ay ki gorira, si mbo lona ay kaŋgaa.

²⁸ Ɗugulla ka si mbona ay kaŋgaa, nam njay ha ki kay suuna bel bel.

²⁹ Sa ma wi ana ɗugulla tuɗ ni na nana ni gege? U bayra Lona bayra sa ma waɗna ni gege?

³⁰ Gola, Lona ŋguy kiɗik mamba ki kam halaŋ. Nam kuluɓ yam ɦinira u mbo lum ma ŋgolna ki halaŋ.

³¹ U tle asina nam kaɓakŋa kay suuna. Nam ka ɦal tina maŋ suuna ŋgol coco lay.

³² Duk kom ma mbana halaŋ ki oy u welera. Nam tak li ma gogoyna tuɗ ndi huna ni namu.

³³ Bay mamba ka di ki kay mbara nam hin a mbara. Yoorina lay tak ki ana nam hin ay ni toko.