JOB 35 - Boy Lonana

Boy ma Elihu dam a hindirana

¹ Elihu tuɗ fok u boyna di ana,

² Ҥay, Job, aŋ tuɗ fok u ɗegee maŋ ndaɗta na gak su? Kay aŋ di ana, «An ki ni ɗegee su Lona.»

³ Kay aŋ u vun taŋga di ana, «Va ma ndolna ni mege? Va ma an a fam ana an li dla coɗi namma ni mege?»

⁴ Boy namma an ndak a daŋ ana agi u banayaŋŋa halaŋŋi fun tagi dew.

⁵ Aŋ gol huulona kolo gige. Gol ɗugulla kolo kaŋga gige. Ndaɗ ti mulla kaŋ lay.

⁶ Lini aŋ li dla cora ni va ma ndol Lona huna ni mege? Hu li ma aŋ ŋgel humuŋ ki nana ni va ma ŋgen Lona huna ni mege? Va ma ndol Lona ka hu na ndeɗi.

⁷ Lini aŋ ɗegee lay ni va ma nam fam huna ni mege? Va ma Lona a hin fam ha koŋ ka may su?

⁸ Dla cooŋga daɓmi eg ndarayaŋ suu warna. Ɗegee maŋga ni maŋ suu warna ɦawaa.

⁹ Hu li ma lassa ka cocona ni suuna tiira. Asi ka yi kolo kay suu ka lasasina.

¹⁰ Na may sa ma di ana, «Lona ma lanna ni arage kaɗi. Nammi sa ma ay gi soolla njeŋge lay a geleɗemma.

¹¹ Nam laygi jivi suu yoori suu kay ndaŋgarana. Nam miniygi yal suu layagi suu pii kolona.»

¹² Sana ka yi koloo u tiina. Nam ka hoŋ diraɗi. Ni ko ŋga tara vi suu dlasi cona.

¹³ Asi di ni boy ma um kaɗina, ni ma Lona ka humumbina. Ma Saɓakŋa ka vi boy nammaɗi.

¹⁴ Aŋ hin di ana aŋ wam ka tuɗi. Aŋ ka juɓummi namu. Aŋ tin dlaaŋga ni fokomu.

¹⁵ Olo, aŋ di ana yaamba ki ni bay uɗu. Nam ka wi huu sana ma cona ki ŋgolɗi.

¹⁶ Dlara Job daɗta halaŋ jakŋi ko ndal semeɗna ɦawa na. Nam zul njaɗta ni ka wi va ma nam dammaɗi.