JOB 33 - Boy Lonana

Lona ɓak sana u lassa

¹ Cemi ni aŋ, Job, humun boy manna haa, mal humuŋ ha ki jivi hum boy ma an damma.

² Gola cemi an mal vunun ki wa, sinin ka njaɗ boyna ay hu ŋgotlonu.

³ An ɓak ha ki ni boy ma col ay hurun gasina daŋ may. Vunun di ha ki ni gasira, kaboy ka huɗi.

⁴ Musukka vi Lonara lanni ndaɗu. Yal ma vi sa Saɓakŋa Kom Belna kakan iirira ni namu.

⁵ Lini aŋ ndaka ni hoŋon dira aya, can wayra ay fununu, min taŋ kiyo.

⁶ Gola fok Lona anni sana ko aŋ na may. Lanni u luɓuna may.

⁷ Anni ka sa ma aŋ a lan ndaaranɗi. Saɓak manna ni ka va ma laŋ taŋ ndaaɗi lay.

⁸ Aŋ di boyna an humum ki u zul humun lay. Cemi lay an ka hum boy namma tu gak

⁹ ana, «An ki ni teteɗ suluk ka egenɗi. An vuɗ ay ni dla co ka egen na ndeɗi.

¹⁰ Lona cuk cifiɗim egenni namu. Nam lan ko saam ma babalira na.

¹¹ Nam cukun keged kegedna senu. Nam cuɗun sen ma tuɗ kaŋgana ki halaŋ.»

¹² Gola, ni an ndak di ana boy maŋŋa ni kaboyna. Kay Lona suu sa warna ki ni na day.

¹³ Aŋ hin yakam ana nam ka hoŋoŋ dira kay joɓ maŋgaɗi ni ana mege?

¹⁴ Doli ɗini Lona ɓak sana u mbeleŋ ma daŋŋa, hin jok yal ma daŋŋa, sa ka caa yam kay boy mammaɗi.

¹⁵ Nam ɓak hu doyra, hu dlara tak taɗ ii sana njeŋgera. Hu li ma suuna buuri sen ŋgolnana, hu li ma suuna buuri ga kay lay masinana.

¹⁶ Nam mal hum suuna kiyo, neesi kay dlara nam dasira ayra.

¹⁷ Kay ana sana hin sun mamba cora kiyo, kay a sa ma saɓakŋa hin ŋga tara ki may.

¹⁸ Ni nam suɗum ki ko ndira nam a ndi hu zullara. Suɗum ki ko maɗ kawina may.

¹⁹ Buu maa daŋŋa ni nam gaɗ sana u lassa ay kay liim ma buuna. Njogoɗta duk sokom ma tamma ha ni na gak gak.

²⁰ Fu ma tira emem vunummi emmi na ɗow, ti ma jivina mayam ka kam oloɗi lay.

²¹ Nam iɗ ki cocoo, sa ka wam ana ni namura oloɗi, hin cukira ni sokom ɦawa na ca.

²² Iiri mamba hinni fun zulla na tok, kak mam ma iirina hinni hu duk ko suu ci maɗna.

²³ May lini sa sunda huulona maa dew duk suu buɓma a mbay njunum a vam u dlara kiyo, a tak sunda vi sana ta nam laɗta ki may.

²⁴ Nam hin wam hahawamu, hin di ana, «Buɗum kiyo ka hinim a kal hu li ma girmindiŋŋaɗi. An fi va ma mbuɗumma wa.»

²⁵ Ni tliwim hin hoŋ balamam ko ay u zoŋ tamba na. Nam hin mbuɗ ni ko nam ay jew gogoonara na.

²⁶ Nam hin cenni Lona ma wam hahawamma, nam hin wam irim u furira. Lona hoŋ ɗegeera vi sanara egemu.

²⁷ Nam hin gi soolla fok suuna di ana, An li cora, an ŋgel gaɗta. Nam may ni li ka ko an lira naɗi.

²⁸ Nam suɗun ay ki ni gii fun zulla. Cemi iiri manda ka gol kiɗikka.

²⁹ Gola dla ndaɗta halaŋŋi Lona ka laɗ kiyo. Sem mba' lay, hindi lay, nam ka njun kay sana.

³⁰ Kay a paɗam ay ki hu zulla, kay a kakam ki duk kiɗikka vi suu iirina.

³¹ Tin humuŋ ha jiviya, Job, humun vunun haa. Seŋ vunuŋ haa, hinin an ɓak ha ni anu.

³² Va ma aŋ dam kaɗi, humun ha ni boy manna. An min goloŋ ki ana aŋŋi ɗegee sura.

³³ Li ka naɗi ni aŋ humun vunun haa. Seŋ vunuŋ haa, an min haɗaŋ yalna.