JOB 32 - Boy Lonana

Bol Elihura Job 32—37

¹ Suu hindi asina seŋ boy ma asi njaɗam maŋ Jobma. Kay nam gol tammi ana nam ɗegee.

² Na may Elihu hurum ɓeŋ ki eg Job cocoo. Elihu ni goŋ Barakel ma Buzna hu njaf Ram, hurum ɓeŋ ki ni kay Job gol tam ki ni ɗegee su Lona tamba gaw.

³ Hurum ɓeŋ ki eg banayam suu hindina bel lay. Kay ana asi fi hoŋ dira kaɗi. Gol ko ana Lona li cora ni namura na.

⁴ Elihu vi tam min ka a ɓak Job cocoɗi ni kay ana banayam suu hiniŋŋa ki ni ŋgolo suumu.

⁵ Hu li ma nam wi ki ana suu hindi asina fi dlara hoŋ di kaɗi ni, nam ɓalak hurum ki cocoo.

Elihu Boy ma Elihu dam jewe

⁶ Elihu ma goŋ Barakel ma Buzna gijaŋ njaɗta di ana, anni goozoŋŋa ɦawaa. Agi ni suu maarina. An ka ndak a li ndaa a hin bay dagi dlaanda hurunda kiɗi.

⁷ An joɓ tan anaba, «Basara ndak a ɓak su? Ndum basara bolow cocora ndak a haɗ yalnaɗi su?»

⁸ Na may a gasira huu sa warna ni musukka ɦawaa. Haɗta vi ma Saɓakŋa tak yalna maŋ sana ni ndaɗu.

⁹ An mbuɗ ki ni sa ma maanara ka haɗaŋ yalna ni ndaɗtaɗi. Suu maarina ka ndak a ɓorow ii dlara ɗegeera kiɗi lay.

¹⁰ Kay ndaɗta an di ana, «Humun vunun haa, an min daŋ dlaanda an waɗta ha may.»

¹¹ An juɓugi boy magina ni cocoo. An jeɓeregi dlaagira agi daɗta jivi ɦay. An gologi ni dlaagira agi a hin daɗ kay boy nammara.

¹² An humugi boy magina wanni agi sa ma ndak a hoŋ dira maŋ Job dew kaɗi. Sa ma di ana boy mamma ni coo ka na dewɗi lay.

¹³ Ka dagi ana, «Ami wi dlara wa, Lona dew ndak a su kammi namu ka sa warɗi.»

¹⁴ Nam di bol mamba halaŋŋi ka kanɗi, di dlara ni kagi na ɗow. An hin hoŋom dira ni u boy magi ma agi damma.

¹⁵ Agi cemi ni vunugi ki ni seŋiya. Agi ka wi yal boy ma agi a damma oloɗi.

¹⁶ An juɓmi cocoo. Agi ka min ɓakgi may. Agi cemi ni agi maŋ ki cocoo, saɓakagi ka oloɗi.

¹⁷ Cemi ni ŋguy manda may ɗaŋ, an min a tak wiinda an waɗ ndera ki may.

¹⁸ An cemi dlara an min a daɗta oy ki hurun cocoo. Yal man ma zulzulna zuɗun a an ɓaka.

¹⁹ Nam ndi ay hurun sulul ko sum veŋŋa haa mbu yo ma nam seli huna kira na.

²⁰ Ko agi hinin an ɓaka ni hurun hin cuk ga mariyaɗ. An ndak a hoŋogi dira ki dew dew halaŋ.

²¹ An ka a njunni u sa dewɗi lay, ka a bok ii sa bokiɗi lay.

²² An lay ni yal bok iira ka irinɗi lay. An li wa na ni malan ma lanna can ki ni na gaw.