JOB 31 - Boy Lonana

Job ɗoɓ boy mamma kiyo

¹ An doo irin kiyo, tin saa manda ka kay go tamaraɗi.

² Warak ma ka juɓun ko Lona ni manage? Warak ma Saɓakŋa ɦam ha kolo dayna.

³ Sa ma ci maɗna fi ni hahawra. Agi di naɗi su? Suu may suu li dla cora fi ni gaɗta eŋga.

⁴ Nam tamba ka wan poy mandaɗi su? Nam ka ndumun sen ma tuɗta halaŋ layɗi su?

⁵ Na ɗaŋŋi an poy ko tan u sa ma kaboy su? Sen ɓaɗ kay a tuɗ li dla co ɦoy su?

⁶ Nam tlan neken kolo kay kelew mam ma ɗegeena. Lona hin wan ɗegee manda.

⁷ Lini sen tuɗ voɗta coo, lini hurun tuɗ ni u irin ɗegee may, lini kon ŋgen va ma njenjee,

⁸ na ni tlesuu an zaarasina sa ma daŋŋa hin tasi ki ni namu. Tlesuu day ki kolona suu daŋŋa mba paɗasi kiyo.

⁹ Lini ca taa ganan yan a mbuɗun hurunu, lini an tuɗ buu vun grek vi ndaran ma vok zina a kuɗukum ziimu,

¹⁰ na ni ko caanda mbuɗ luɗ ni wa ma vi sa daŋŋana, ko sa ma daŋŋa buu u caanda,

¹¹ Kay an li ni dlara ci maɗna, lini sa ma kaɓakŋa managelay ni ndak kaan ɓakŋa kanu,

¹² Coonda ni ko ndal kura ŋgalla na. Ndaɗ ndak a ŋgalan ki naa gelek gelek, ɓalakan tlegeyen suu konna ki bel lay.

¹³ Lini an li ii suu man suu sunda kay vaasiya, hu li ma asi mba ci wayra u anna,

¹⁴ Lona hin col ay kolo wa ni hin li ni ana mege? Nam li ka joɓa ni hin dammi ana mege?

¹⁵ Nammi sa ma lan ay huu sunna, lasi ni ka nam layɗi su? Lo namma lami ay hu somoyomi ni nam halaŋ.

¹⁶ An doo joɓpa vi suu hawra ka kiɗi. An hin boyogi suu donona ka bay njun usi ɦoyɗi lay.

¹⁷ An ti fuunna ni vay dan dew, ɦal ka maŋ gor suu kuyunaɗi su?

¹⁸ Ay u gooron day kemba kuyura wul varanni ko vi busira na. Ay u gooron day ni an ka njun u boyogi suu donona.

¹⁹ An wi sa ma hahaw ma baraw ka egembina wa, wi sa ma ki kaɗaki va ma baa kam kaɗina wa ni,

²⁰ Suu asina ka hin bay a gan deɓpaɗi, kay an cukusi baraw ma ku ma doo semeɗna kasiya. Baraw ma cilim u tlimiɗ timigii mansinana.

²¹ Lini an las gogoo ma kuyu fun ɓakŋa wa ana suu kaɓak suu njun unna ka cocoo ni,

²² Ko bikin paɗ ha ki kolo hu pel bikin na fak fak. Ko kon kus ha ki kolo u ŋgolofon na mbak mbak.

²³ An li ndaana cocoo ka ɓak ma vi Lonna vanɗi. Kay an ka ndak a col fok ŋgol mambaɗi.

²⁴ Lini an tin saa manda ni kay lorra, lini an di kawi ma jivi ɦayna ana, «Aŋŋi va ma njun kanna,»

²⁵ lini an li furira ni kay tlesuu ka kon coco ɦayna, ni kay tlesuu an fasi u bik konna ɦawaa ni,

²⁶ buuna halaŋ faɗta ka li kiɗikka kanu, tilna ka li kiɗik mamba may.

²⁷ An li dlara ɗuɗ tan a goɓ faɗta u tilna kaɗi. An ŋgaasi ka ko Lona naɗi lay.

²⁸ An li wa na ni sa ma ka ɓakŋa ndak a kaan ɓakŋa kanu, kay an tin fununni kay Lona ma ha kolo dayna.

²⁹ An furi ki kay hahawra fi sa ma babali manna dew su? Hu li ma dlara yoora famma an ka furiɗi.

³⁰ An u tanda hin sinin ka a di dlara coɗi. Ka min a kal vunun hu dlara co ta baam kiraɗi.

³¹ Suu mbay vo varanna halaŋ di ki kan ana, «An ay vo varam wanni hoɓ ki u tliwna cocoo.»

³² Koy ma mbay vo varan ka buu ki bunsuɗi. Suu mba varanna halaŋ an malasi vun zina kiyo.

³³ Anni ko ndal Adam na a baa coonda ga su? Ŋgay suluk manna hurun kurufu na ŋgay su?

³⁴ An ka li ndaa a tak tan ki duk suunaraɗi. An ka ŋgay ana ndarayanna hin pananuraɗi lay. An ka ni sa ma dakinaɗi.

³⁵ Sa ɦan sa ma humun boy manna ayna ni gege? Gola ni boy manna, ma Saɓakŋa hoŋ dira ni namu. Kay yakka suu babali mansina ka yakanda.

³⁶ An gaɓaɗ ki bikinni ko zewna na. An njunuɗ ki kanni ko ndal gaɗamulla na.

³⁷ An hin cuɗum dlaanda ki dew dew bel. An ɦuɗ tan ay egem ko eg mulnara na.

³⁸ Lini sene manna hurum ɓeŋ egen sekenu, yam zumma mbuɗ tii ki u simina.

³⁹ Lini an feɗ tlena ki hu sene ma vi suunana ɦawaa, caa yan ka kay loɓ masinaɗi,

⁴⁰ Hin dlara tlesuu tira dayra tani, tlesuu siina day ki hu senena. Ciŋirira ko day ki huwa. Boy ma vi Jobma daɓmi na.