JOB 29 - Boy Lonana

Boy ma Job dam a doogo yam dewrana

¹ Job tuɗ fok u boyna di ana,

² Ҥii, va ma ndak a hoŋon hu balaman ma ay fok jewna ni mege? Hu li ma Lona ay golonna.

³ Ni hu li ma pindil mamba ka tini kanna, li ma kiɗik mamba ka tuɗ fokon duk ndufundana.

⁴ Hu li ma an ay u zoŋ tan tuna, ni hu li ma galamba vi Lona ka juɓun hu mbutluɓ mannara.

⁵ Nam ma Saɓakŋa ay u anu. Goryon ay ŋguy kan halaŋ, gor njufii mansina.

⁶ Hu li namma mbiira ka em ŋgol cocoo, mbul conona ka yoori coco lay.

⁷ Lini an a kal ki bunsu vun grekŋa hu li ma an tin dlam manda ki kiɗikŋa.

⁸ Gorzoŋina wan kagira na ni hoŋ ay gaw. Suu marina yow ki kolo u sesiya.

⁹ Suu kaɓakŋa seŋ ɓak masina ni na gaw, dug kosi funusiya.

¹⁰ Del mulina ka hum oloɗi. Sinisi nereɗ ki kolo u yiriɗisi ni na gaw.

¹¹ Hum suu may suu humunna di ana furira ka kaŋu. Iira ka golonda diki kan lay.

¹² Kay an suɗ suu hawra suu ka yi kolo ana njunusiyana kiyo. Njun u gor suu kuyu suu sa ka kasiɗina may.

¹³ Paɗvun ma vi sa ma miɗ kina mbay ki ni kanu. Boyogi suu donona an mbuɗusi hurusi ki furira.

¹⁴ Ɗegeera ay cuki egenni a baraw manna. Dlaanda jivira ni a baraw man ma doɓolok ma cuki egenna a jumba tini kanda lay.

¹⁵ An ay ni a ii suu ki dugina, a sem suu ki dalina may.

¹⁶ Suu hahawra an ay ni a busiya. Dlara ndi kay koynara an daɓaɗ ki gaw.

¹⁷ An to sii suu ci maɗna kiyo. An ɓaɗasi tlesuu asi tlasi funusina ay kiyo.

¹⁸ An ɓak tan ana, «An hin miɗ hu ziinu. Ko lay ma yam ana feniksŋa na. an hin kak iiri ni na gak gak.

¹⁹ Mbona is kaŋga u sariyan tew tew. Njeŋge halaŋŋi mbaɗagira ka gi kan tew tew.

²⁰ Bibiŋil manda ka ni u heɓpa tew tew. Mbuuru manda ka furi hu duk konu.»

²¹ Suu humun boy mannana ka humum jiviya. Asi hum dlara an daɗta ni u ɗigilla.

²² An di boyna wa ni sa ma di va dagan kaɗi. Boy manna yak ay kasi ni ko mbona na.

²³ Asi ka juɓunni ko ndal suuna juɓ yo lona na. Vunusi ki malira na hoŋ a furyunda.

²⁴ Asi ka golon vogon ma ka ŋgafasi ha u sandana. Hu li ma an sanasi na ni, asi lakira na en.

²⁵ Ana takasi voɗta. An kaki fokosi ni ko nulna na. An ka ɗil ii suu hurusi ki ɓalakina halaŋ.