JOB 28 - Boy Lonana

Wira kay ndaŋgara ka daɓbi

¹ Li ma veg doonora ay huna kaa. Li ma yoo lorra ay huna ka may.

² Ɓalaŋŋa halaŋ vegem ay ni ga duk ndaŋgara. Lomba yoo ay ki ni gogoyra.

³ Suu veg kawina fi kiɗikka ay ni ga duk ndaŋgara. Asi hal gak gak tew ay hu li ma saɓakasi do ay huna. Gogoyra warra ki ndufun cocoo.

⁴ Asi veg zulla ha ki hu li ma sa war ka huɗina, hu li ma sem sa ka tuɗ huɗina. Asi hin ki gaɓi kolo duk ɦawa na.

⁵ Ndaŋgara ka ɦal tina maŋ suunara. Asi vegeɗ yaɗ ki wa, mbuɗ ko ndal ku ŋgalaɗ ki ŋgali na.

⁶ Duk gogoy ndaɗta fi ɦinira gus loɓma, ta yaɗ ana safirra ay ni huwa. Duk ndaŋga ndaɗta fi lorra ay ni huwa.

⁷ Layagi suu kom tliwna ka wi voɗ ndaɗtaɗi. Ii kolo kolora ka waɗɗi lay.

⁸ Vabagi suu bagina wi li namma kaɗi. Dlona lay ka wi li nammaɗi.

⁹ May sa warna hal ta ta tuɗ ga u ɦinira. Nam hal duk ɦinira ta ta ga hu uɗta do dora.

¹⁰ Duk ɦinira sana wak voɗta huwa. Tlesuu jivi suu duk ɦinirana halaŋ ii sana wasi kiyo.

¹¹ Nam suɗ mbo lum ma ɓaɗna kiyo. Mbaa tlesuu jivi suu ay ŋgay dukŋa ki kiɗiki.

¹² Na ɗaŋŋi yalna col ay ni arage? Mbeleŋŋa ka ni ara na ɗowge?

¹³ Sa war ma wi li ma nam col ay huna kaɗi. Nam ka ni ga duk suu warna hu duliyara taniɗi.

¹⁴ Zul ŋgolla di ana, «Nam ka varan taniɗi.» Mbo lum ŋgolna lay ana, «Nam ka varan taniɗi.»

¹⁵ Sa ka ndak a gus yalna u lorɗi. Ka u gursu ma ɦam ŋgol coconaɗi lay.

¹⁶ Lorra jivira ka ndak a gusumbi. Ҥinira jivi ɦayra oniks u safirɗi lay.

¹⁷ Lorra u kotoromma ka tew u gusumbi. Sa ka ndak a fam kay ŋgal lorɗi lay.

¹⁸ Hedew ma jivina u kristal ka yasi sesi hu kekgi. Mariyaɗ ni ciw yalna su hedew ma gus loɓma.

¹⁹ Ҥini mayra Etiyopira ka ndak a gusumbi lay. Lor mayra ki yoori jivi coco ɦayra lay ka ndakgi.

²⁰ Na may yalna col ay ni arage? Mbeleŋŋa ka ni ara na ɗowge?

²¹ Nam ki ni ŋgay ii suu warna halaŋ. Nam ki ŋgay ii layagi suu pii kolona lay.

²² Zul ŋgolla u lina vi suu miɗina di ana, «Humummi hum dla sem ma tiina.»

²³ Lona dew ni sa wam voɗ mamba na. Nam wi li ma nam ka buu huna.

²⁴ Ni hu li ma nam ka wi ha ki hu vun duliyara ma do ayna halaŋ. Nam wi tlesuu ga u huulona ki halaŋ halaŋ.

²⁵ Nam ka ŋga nek babaana lay. Ŋga mbo ŋgolna ki lay.

²⁶ Nam ŋga yo lona a si ni na gara may. Min voɗta ki fok ɗugulla a tuɗta lay.

²⁷ Hu li namma nam ka ɓorow ii yalna kiyo. Nam wamu, tukum saɓakam lay.

²⁸ Nam hin di sa warna ana, «Ndaa ma lam u Bu Suunana ni yalna gaw. Ka taɓ taŋ eg dla coraɗi ni mbeleŋŋa gaw.»