JOB 24 - Boy Lonana

Lona ka caa yam kay suu conaɗi

¹ Ma Saɓakŋa tak buu mam ma nam kaɓakŋana ka kiɗi ni kay mege? Suu mam suu ɗegeena ka wi buu nammaɗi ni kay mege?

² Suu cona jok ii hakara vi ndarayasina kiyo, asi kul yoorina, hin taarasi lay.

³ Asi yow ki ni korra vi gor suu kuyuna. Mbutlugi suu vi boyogi suu donona asi vasi balna ni asiya.

⁴ Suu hawra asi dikisi ki hu voɗta. Suu haw suu hu mbassana halaŋ ŋgay tasiya.

⁵ Suu hawra ni ko ndal korra na. Maɗii feɗet asi tuɗ a hal tlesuu tira, hu fulla asi fi tlesuu goryosi a hin tasina.

⁶ Asi feɗ tlena hu sene ma vi sa ma ka wi vaɗina. Asi duɗ gugutlura ni vi sa ma dlam cona.

⁷ Njeŋge ni asi tuɗ ni siiliya kay baraw kaɗira. Hu li ma semeɗna lay ni borgo ma baa kasi kaɗi.

⁸ Asi kolo kay ɦinira lona si ni kasiya. Zi ma buu ka kasiɗi, asi ɗiŋŋi kolo kay ɦinira.

⁹ Asi paɗ vun gogoo ma kuyuna ay ki fun pona. Suu hawra asi tinisi lamanna kasiya.

¹⁰ Asi tuɗusi ki siili bay barawna usiya. Suu mayra casina asi cukusi a zi haɗna.

¹¹ Hu kaa ma vi suu daŋŋa asi ka emmi mbulna. Suu ka em summana laara ka casi may.

¹² Hu ɦoŋzi ŋgolna suuna ka yoo tasiya. Suu daki u mbilnana ka yi kolo a njunusira. Lona ka caa yam kay cen masiraɗi.

¹³ Suu daŋŋa ka min kiɗikkaɗi. Yal ma hal kiɗikkana ka irisiɗi. Asi ka min tuɗ hu voɗta ndaɗtaɗi lay.

¹⁴ Ŋgarpira ni sa ma ci maɗna col kolo, ci suu hawra u suu wihawra kiyo. Njeŋgera ni nam mbuɗ tam ki sa ma kulna.

¹⁵ Sa ma li zoŋga juɓmi njeŋgera a mbara. Nam di tam ana, an jakŋi sa ka wanɗi. Nam baa yam ki u barawna.

¹⁶ Duk njeŋgera nam kus vun ziginina vi suuna. Faali ni sa ka wambi, nam ŋgay tam kiyo. Nam ka wi dlara faliraɗi, ka miniɗi.

¹⁷ Suu asina maɗiira irisi ni ŋgus maɗna, ni va ma casina kay asi li ndaa faalira cocoo.

¹⁸ Sa ma cona ni mege? Nammi ko tlesuu feɗ suu dol ki kolo kay mbona ɦawa na. Sene mamma ni hu mbassa ki daɓira, va ka jiv huɗi. Sa ma tuɗ ha hu a em gugutluna gege?

¹⁹ «Ko ndal eŋga u lii zamalla ci mbona kira na, lina vi suu miɗina hin lik sa ma li dla cora ki ni na may.

²⁰ Sum mayra vuɗumba maa ki kamu. Tliwim fun njufulna ni a ti ma jivina. Hum sa ka gam kam oloɗi. Sa ma cona hin kus ki ni ko ndal guna na.»

²¹ Suu asina las boyogi suu vuɗ gor kaɗina. Asi ka caa yasi kay cara donoraɗi lay.

²² Lona ka u saɓakŋa a ɓalak suu saɓak cocona kiyo. Nam col ay wa ni, suu asina ka saa ana asi hin lak iiriya oloɗi.

²³ Doli ɗini nam ka hinisi laki u heɓpa. Irim ka gol poyra vi suu daŋŋa may.

²⁴ Suu asina sesi tii ni kay buu ew ɦawaa. Kak njokŋi asi ka oloɗi. Yasi hom ay ki ga ko usu ma sooyna na. Hin kaasi ki ni ko ndal suuna feɗ yam wanara na.

²⁵ Dla ndaɗta ni ka naɗi su? Sa ma ci wayra u anna ni gege? Sa ma ndak a bulumun boy manna ki ɦawa na ni gege?